Լոնդոնի «Չելսին» կապիտուլիացիայի ենթարկեց «Արսենալի» Եվրոպա լիգայի խաղարկության եզրափակչում: «Արսենալը» ձախողեց մրցաշրջանը՝ չնվաճելով ոչ մի տիտղոս: Մրցաշրջանի կարևորագույն խաղում Էմերին նախընտրել էր խիստ կանխատեսելի և պարզունակ մարտավարություն: Մասնավորապես, բոլորի համար էր պարզ, որ «Արսենալը» խաղալու է երկու հարձակվողներով ի դեմս Լակազետի և Օբամեյանգի: Այս ֆուտբոլիստները Եվրոպա լիգայում աչքի էին ընկել արդյունավետությամբ էապես նպաստելով լոնդոնյան ակումբի եզրափակչում հայտնվելուն: Եթե պաշտպանությունն ու հենակետային օղակը կառուցելու Ունայ Էմերին մի քանի տարբերակ ուներ, ապա առջևի գծում Օզիլը Լակազետն ու Օբամեյանգը ուղղակի այլընտրանք չունեին: Էմերին ձեռքի տակ ուներ ընդամենը մեկ ենթահարձակվողի և ուզած-չուզած մեկնարկային կազմում էր ընդգրկել Օզիլին: Եթե Մխիթարյանը կամ Ռեմսին լինեին Էմերիի տրամադրության տակ վստահ ենք, որ պատկերը բոլորովին այլ կլիներ: Այդ դեպքում Էմերին կպայքարեր երկու ենթահարձակվողներով՝ ուժեղացնելով դաշտի կենտրոնը:
Եթե Մխիթարյանը մեկներ Բաքու, ապա Էմերին ամենայն հավանականությամբ կնախընտրեր ոչ թե 3-4-1-2, այլ 3-4-2-1, կամ 4-3-2-1 դասավորությունը: Հաշվի առնելով «Արսենալի» հատկապես կիսապաշտպանության միջին հատվածի թուլությունը «Չելսիի» գլխավոր մարզիչ Մաուրիցիո Սարին հրահանգել էր ակտիվ պրեսինգ կիրառել: Նկատենք, որ «Չելսիի» բոլոր երեք գոլերը ծնվեցին «Արսենալի» ֆուտբոլիստների սեփական կիսադաշտոււմ կոպիտ սխալների և դրանց հաջորդած գնդակի կորստի հետևանքով ինչի հիմքում հենց մրցակցի պրեսինգն էր: Սպասվածի համաձայն Սարի հրահանգով հատուկ հսկողության տակ էին Լակազետն ու Օբամեյանգը, ինչի հետևանքով էլ «Արսենալի» գրոհները ուղղակի չէին ստացվում: Ոչնինչ չկարողացավ անել նաև Օզիլը, որը ստանալով գնդակը՝ չէր իմանում ինչ անել: Հանդիպումից անմիջապես հետո, բազմաթիվ լրատվամիջոցները «Արսենալի» պարտության գլխավոր պատճառ նշեցին Մխիթարյանի բացակայությունը: Հանդիպման ընթացքն իսկապես ցույց տվեց, որ հայ ֆուտբոլիստը օդի և ջրի պես անհրաժեշտ էր «Արսենալին» և նրա ներկության դեպքում հնարավոր է բոլորովին այլ արդյունք գրանցվեր: Որպես պարտության հիմնական պատճառ կարելի է նշել կադրային լուրջ խնդիրները: Էմերին գործի դրեց այն գործիքակազմը, որն ուներ, սակայն դա բավարար չէր:
«Մենք ավելի ուժեղ դարձանք այս մրցաշարի ընթացքում, սակայն դա բավարար չէր: Պետք է շարունակենք աճել, քանի որ «Արսենալի» շատ խաղացողների համար սա առաջին եզրափակիչն էր: Հիասթափված ենք, բայց մեծ քայլ ենք կատարել առաջ»,- խաղից հետո ասել է Էմերին: Վերջինիս խոսքով «Արսենալը» լավ խաղ ցուցադրեց առաջին կեսում, սակայն հանդիպման ընթացքը բեկեց առաջին բաց թողած գնդակը: «Բաց թողած գնդակից հետո պետք է հանդարտություն ցուցաբերեինք, ինչը` չարեցինք»,- ավելացրել է Էմերին:
«Չելսիի» գլխավոր մարզիչ Սարիի կարծիքով իր թիմն արժանի էր հաղթանակի և այս տիտղոսը հետևողական աշխատանքի արդյունք է: «Շատ երջանիկ եմ: Այս տիտղոսը շատ կարևոր է ակումբի համար: Մենք իսկապես արժանի էինք դրան: Հունվարին և փետրվարին մենք դժվարություններ ունեինք, բայց մենք ճիշտ ժամանակին սթափվեցինք, ինչն անելն Անգլիայի Պրեմիեր լիգայում անելն այդքան էլ հեշտ չէ: Մեզ հաջողվեց տեղ նվաճել բրոնզե մեդալը, հաղթեցինք Եվրոպա լիգայի 12 խաղ և խաղացինք Անգլիա լիգայի գավաթում: «Սիթիի» հետ 0:6 հաշվով կրած պարտությունից հետո մենք էական փոփոխություններ կատարեցինք: «Արսենալի» դեմ եզրափակիչ մրցավեճը 64-րդն էր ընթացիկ մրցաշրջանում: Բաքվում շատ շոգ էր և ֆիզիկապես շատ դժվար էր խաղալը: Կարծում եմ լավ աշխատեցինք և երկրորդ խաղակեսում խաղի թելը մեր ձեռքում էր: Իսկապես լավ խաղ ցուցադրեցինք «Արսենալի» դեմ: Կարողանում էինք մրցակցի արգելակել դաշտի միջին հատվածում և սուր հակագրոհներ ձեռնարկել: Շնորհակալություն եմ հայտնում «Չելսիի» բոլոր երկրպագուներին: Մենք նվաճեցինք գավաթը համատեղ ուժերով: Սա բոլորիս հաղթանակն էր»,- ասել է Սարին: Նշենք, որ «Չելսին» 5 տարի անց կրկին դարձավ Եվրոպայի լիգայի հաղթող:
Լոնդոնյան թիմն այս մրցաշարում հաղթել էր նաև 2012/13 մրցաշրջանում: «Չելսիի» հարձակվող Օլիվյե Ժիրուն դարձավ Եվրոպա լիգայի 2018/19թթ. մրցաշրջանի լավագույն ռմբարկու: Ֆրանսիացին իր 11-րդ գոլը խփեց «Արսենալի» դեմ եզրափակիչ խաղում: Ռմբարկուների ցուցակում երկրորդ հորիզոնականում է «Այնտրախտի» հարձակվող Լուկա Յովիչը: «Չելսիի» հետ հանդիպումը վերջինն էր «Արսենալի» դարպասապահ Պետեր Չեխի համար, որն ավարտեց կարիերան: «Ես հպարտանում եմ, թե ինչպես եմ անցկացրել իմ կարիերայի վերջին խաղը: Քանի որ, եթե այն եզրափակչում է, ճնշումը շատ մեծ էր: Ես պետք է խաղայի և պետք է նշեմ, որ արել եմ ամեն ինչ:
«Արսենալն» արժանի չէր պարտության: Մենք շատ մեծ աշխատանք էինք կատարել: Իմ ապագա՞ն: Ես դեռ մեկ ամիս էլ «Արսենալի» ֆուտբոլիստ եմ համարվելու»,- ասել է Չեխը:
