Երևանի «Ալաշկերտն» առաջին անգամ նվաճեց Հայաստանի գավաթը: Երևանյան ակումբը 1:0 հաշվով առավելության հասավ Վանաձորի «Լոռիի» նկատմամբ: Երեկվա մրցավեճը հատկապես հետաքրքրություն էր առաջացրել մարզչական պայքարի տեսանկյունից: Մասնավորապես, «Ալաշկերտը» գլխավորում է տեղացի լավագույն մասնագետներից Աբրահամ Խաշմանյանը, իսկ «Լոռիի» ղեկին Հայաստանի ազգային հավաքականի նախկին գլխավոր մարզիչ Արթուր Պետրոսյանն է: Խաշմանյանը միայն վերջերս էր աշխատանքի անցել «Ալաշկերտում»: Ակումբի ղեկավարությունն այնքան էլ գոհ չէր Արամ Ոսկանյանի աշխատանքից և գրանցված արդյունքներից, որից հետո գլխավոր մարզչի պաշտոնը կրկին վստահվեց հենց Խաշմանյանին:
Կարող է այս դիտարկումը ոչ միանշանակ արձագանք ստանալ, բայց կարծում ենք՝ «Ալաշկերտի» հաղթանակը գավաթի եզրափակչում խիստ կանխատեսելի էր և տրամաբանական: Հայաստանի Բարձրագույն խմբի առաջնության առաջին հատվածում «Լոռին» աչքի էր ընկնում տպավորիչ խաղով, և նույնիսկ խոսվում էր այն մասին, որ թիմը չեմպիոնի կոչման իրական հավակնորդ է: «Լոռին» կայացած և մարտունակ կոլեկտիվ էր, որը գլխավորում էր Արմեն Ադամյանը: Ձմեռային դադարի ժամանակ, սակայն, ակումբի ղեկավարությունը Ադամյանի փոխարեն թիմի գլխավոր մարզիչ նշանակեց Արթուր Պետրոսյանին: Ինչո՞ւ: Ինչպե՞ս կարելի է կայացած թիմը վստահել մի մարզչի, որն իր կարիերայի ընթացքում որևէ լուրջ հաջողություն չի գրանցել: Ավելին, առանց բավարար փորձի գլխավորելով Հայաստանի ազգային հավաքականը՝ Պետրոսյանը ուղղակի տապալել էր այն: Հիշենք միայն 2017 թվականին Երևանում կայացած աշխարհի առաջնության ընտրական փուլի Հայաստան-Լեհաստան հանդիպումը, որը ցայտուն կերպով արտացոլում է Պետրոսյանի մարզչական որակները: Որտե՞ղ է տրամաբանությունը:
Անփորձ մարզչին լուրջ թիմ վստահելու տխուր ավանդույթի սկիզբը դրել էր ՀՖՖ նախկին նախագահ Ռուբեն Հայրապետյանը՝ մեր ազգային հավաքականը վստահելով Սարգիս Հովսեփյանին: Վերջինս ձախողվեց, սակայն ՀՖՖ ղեկավարության համար դա դաս չեղավ, և որոշ ժամանակ անց հավաքականը գլխավորեց Արթուր Պետրոսյանը:
Ի տարբերություն Պետրոսյանի՝ Աբրահամ Խաշմանյանը հայկական տարբեր ակումբներում և միջազգային ասպարեզում գրանցել է արդյունք: Կրկին գլխավորելով «Ալաշկերտը»՝ Խաշմանյանը կրկին ցույց տվեց արդյունք՝ թիմը նվաճեց տիտղոս, ինչը սպասելի էր: Ի տարբերություն «Լոռիի»՝ «Ալաշկերտն» ուներ հաղթանակի բավական լուրջ նախադրյալ՝ ի դեմս Խաշմանյանի:
«Լոռիի» և Արթուր Պետրոսյանի օրինակը պետք է հերթական «մեսիջը» դառնա ՀՖՖ ղեկավարության և մասնավորապես Արթուր Վանեցյանի համար: Անցյալ տարվա հոկտեմբերին մեր հավաքականը կրկին վստահվեց մի մասնագետի, որը հատկապես միջազգային ասպարեզում որևէ արդյունք չէր գրանցել: Դրա տրամաբանական շարունակությունը եղավ այն, որ մեր գլխավոր թիմը ձախողվեց Ազգերի լիգայի խաղարկությունում և երկու չափազանց թույլ հանդիպում անցկացրեց մարտին մեկնարկած 2020 թվականի Եվրոպայի առաջնության ընտրական փուլում:
Կարևոր այս մրցաշարի առաջին տուրում Արմեն Գյուլբուդաղյանցի գլխավորությամբ Հայաստանի ընտրանին նախ զիջել էր Բոսնիա-Հերցեգովինային, այնուհետև Ֆինլանդիային: Վանեցյանը մտադիր է Գյուլբուդաղյանցին արդյունք ցույց տալու հնարավորություն տալ, բայց… Արդյունք չգրանցած մարզչին աշխատանք տալը կարող է ունենալ թերևս մեկ բացատրություն: Հիմնվելով սուբյեկտիվ կարծիքի վրա՝ տեղի է ունենում նշանակումը, և ոմանց թվում է՝ տվյալ մասնագետը ի զորու է հաջողություններ գրանցել: Ռուբեն Հայրապետյանին թվում էր, թե Հովսեփյանը կամ Պետրոսյանը պոտենցիալ ունեցող մարզիչներ են և կարող են պատվով կատարել իրենց աշխատանքը: «Լոռիի» ղեկավարներին թվում էր, թե Արթուր Պետրոսյանն այնուամենայնիվ լավ մարզիչ է և կարող է օգնել «Լոռիին»: ՀՖՖ-ում էլ կարծում են, որ Գյուլբուդաղյանցը լավ մասնագետ է և մեր հավաքականը կարող է դուրս բերել ճգնաժամից:
Վերջին 5 հանդիպումներում «Լոռիին» հաջողվել է վաստակել ընդամենը մեկ միավոր: Թիմը կրել է 4 պարտություն: Եթե ամիսներ առաջ Վանաձորի թիմը Բարձրագույն խմբում պայքարում էր մրցանակային տեղերի համար, ապա այսօր միայն տեսական հնարավորություն ունի լավագույն քառյակում հայտնվելու: «Լոռին» այն ակումբներից է, որը զարկ տալով նաև մարզային ֆուտբոլին՝ լուրջ աշխատանքներ է կատարում, ունի պոտենցիալ: Տեղի ունեցածը, կարծում ենք, հիմք կհանդիսանա այս ակումբի ղեկավարության համար, և տեղի կունենան մարզչական փոփոխություններ:
Հուսանք նաև, որ մեր ազգային հավաքականում էլ այնուամենայնիվ տեղի կունենան նորմալ նշանակումներ: Յուրաքանչյուր պարտության մեջ կարելի է գտնել բազմաթիվ պատճառներ, բայց եթե խնդրին ավելի խորն ես մոտենում, հասկանում ես, որ գոյություն ունեն շատ ավելի գլոբալ հարցեր, որոնք ուղղակի կապ ունեն գլխավոր մարզչի հետ:
Վերջում ցանկանում ենք շնորհավորել Երևանի «Ալաշկերտին» և Աբրահամ Խաշմանյանին Հայաստանի գավաթին տիրանալու կապակցությամբ:
Լուսնկարը՝ Armsport.am-ի