Եվրոպա լիգայի խաղարկությունում Երևանի «Փյունիկի» և «Ալաշկերտի» ելույթները ըստ էության արթնացրին հիասթափված և հուսալքված հայ ֆուտբոլասերին: Ուշագրավ է, որ ակումբային ֆուտբոլի զարթոնքը տեղի է ունենում հայկական ֆուտբոլի համար բավական կարևոր մի ժամանակահատվածում: Ավելի ստույգ, մեր թիմերը պատմական հաջողություն գրանցեցին այն բանից հետո, երբ հայտնի դարձավ 16 տարի մեր ֆուտբոլը ոտնակոխ արած ՀՖՖ-ի նախագահ Ռուբեն Հայրապետյանը այլևս չի վերարտադրվի պաշտոնում:
Շատերն այն կարծիքին են, որ այս փաստը ոչ միայն դրական լիցքեր է հաղորդել երկրպագուներին, այլև ակումբներին: Հիշեցնենք, որ Հայաստանի Բարձրագույն խմբի բոլոր 9 թիմերը պաշտոնապես հայտարարել են, որ սեպտեմբերին տեղի ունենալիք ՀՖՖ-ի նախագահի ընտրություններում սատարելու են ԱԱԾ-ի տնօրեն Արթուր Վանեցյանի թեկնածությունը: Կարծես թե ամեն ինչ պարզ է: Շատ շուտով տեղի կունենան արմատական փոփոխություններ և բոլորս լիահույս ենք, որ Վանեցյանին կհաջողվի ոտքի կանգնեցնել արդեն իսկ անդունդում հայտնված ֆուտբոլը: Ակումբներից զատ՝ Վանեցյանի ՀՖՖ-ի նախագահ դառնալու փաստը ոգևորություն է առաջացրել երկրպագուների շարքերում: «Հանրապետական» մարզադաշտում Վանեցյանի մրցավեճերին ներկա գտնվելու մասին հայտարարությունն արժանանում բուռն ծափողջյունների: Ո՞վ կմտածեր, որ երբևէ մեր երկրում ԱԱԾ-ի ղեկավարին այսպես կողջունեն, շարունակ ասում էին մարզադաշտ եկած ֆուտբոլասերները: Բնական է, որ Վանեցյանի մարզադաշտ այցելելը պայմանավորված չէ միայն մարզական հետաքրքրությամբ:
«Հանրապետականում» ԱԱԾ տնօրենի ներկա գնտվելու և այդ մասին հայտարարությունը նպատակ ունի նաև ստուգելու հանրային կարծիքը: Ու հիմա Վանեցյանը վստահաբար կարող է հայտարարել, որ ՀՖՖ-ի նախագահ դառնալու հարցում ունի թե ակումբների, և թե ֆուտբոլասերների աջակցությունը: Բազմաթիվ ֆուտբոլասերներ Արթուր Վանեցյանի «Հանրապետական» մարզադաշտ այցելություններում որոշակի նյուանսներ են նկատել: Հիշեցնենք, որ Վանեցյանը ներկա էր գտնվել օգոստոսին 2-ին կայացած «Ալաշկերտ»-«Սուտյեսկա» և օգոստոսի 9-ին տեղի ունեցած «Ալաշկերտ»-«Կլուժ» հանդիպումներին: Նշենք, որ երկու դեպքերում էլ ցուցադրելով դժգույն խաղ երևանյան թիմը առաջին դեպքում 0:0 էր խաղացել, իսկ երկրորդ դեպքում պարտվել 0:2 հաշվով: Այս հանդիպումներից երկու օր առաջ՝ հուլիսի 31-ին և օգոստոսի 7-ին «Հանրապետականում» Եվրոպա լիգայի շրջանակներում ելույթ էր ունեցալ Երևանի «Փյունիկը»: Վերջինիս ցուցադրած խաղը, մարզադաշտի էներգետիկան ուղղակի չես համեմատի «Ալաշկերտի» մասնակցությամբ խաղերի հետ: Ընդամենը մեկ ամսում «Փյունիկը» դարձել է երկրպագուների սիրելի թիմը, որը ցուցադրելու է տպավորիչ՝ գրագետ խաղ:
Սպասվում է, որ Վանեցյանը ներկա կգտնվի օգոստոսի 7-ին կայացած «Փյունիկ»-«Մաքաբի» հանդիպմանը, որը շատ ավելի լավ առիթ էր երկրպագուների «ռեակցիան» ստուգելու համար, բայց․․․: Վանեցյանը մարզադաշտ եկավ երկու օր անց: Եկավ այն պահին, երբ «Ալաշկերտը» պարտվում էր 0:2 հաշվով: Ավելին, ինչպես խաղից հետո նշել էր «Ալաշկերտի» կիսապաշտպան Արտակ Գրիգորյանը՝ Արթուր Վանեցյանը «Ալաշկերտի» սեփականատեր Բագրատ Նավոյանի հետ այցելել էր հանդերձարան և ասել, որ պատասխան խաղում միայն ու միայն հաղթանակ է ակնկալում:
Նշենք, որ այս տարվա հունիսին Պետեկամուտների կոմիտեի (ՊԵԿ) քննչական վարչության տարածած հաղորդագրության համաձայն Նավոյանը մեղադրվում է առանձնապես խոշոր չափերով հարկեր վճարելուց խուսափելու մեջ: Երկրպագուների շարքերում «Ալաշկերտի» նկատմամբ վերաբերմունքը փոխվեց նաև այն բանից հետո, երբ Ռուբեն Հայրապետյանի կողմից «Շիրակին» չեմպիոնությունից զրկելուց հետո «Ալաշկերտը» ցնծությամբ ընդունեց ոսկե մեդալները: Շատ ֆուտբոլասերների պնդմամբ՝ «Ալաշկերտը» այսպես ասած լեգիտիմ չեմպիոն չէ: Ու հիմա ոմանց մոտ հարց է ծագել, թե ինչու է Վանեցյանը այցելում հենց «Ալաշկերտի» հանդիպումներին: Սա հարց է, որի պատասխանը դժվար է գտնել:
Հավանական է, որ տեղի ունեցածը պատահականություն է, քանզի ԱԱԾ տնօրենը խիստ զբաղված է և ազատ ժամանակ է գտել հենց «Ալաշկերտի» հանդիպումների ժամանակ: Ընդունենք նաև, երկրպագուների կողմից Նավոյանի թիմի հանդիպումներին այցելելու մեջ միտում տեսնելը կարծում ենք այնքան էլ ճիշտ չէ: Այս պահին գլխավորն այն է, որ ՀՖՖ-ի հաջորդ նախագահի ձեռքը հայկական ֆուտբոլի զարկերակի վրա է: Եվ որ ամենակարևորն է՝ Վանեցյանի թեկնածության շուրջ կա համախմբում, ինչը ֆուտբոլը ոտքի կանգնեցնելու հիմնական նախապայմանն է: