Երեկ Գյումրիի «Շիրակ»-ի երկրպագուները մոտ 3 ժամ փակել էին Երևան-Գյումրի մայրուղին: «Շիրակ»-ի երկրպագուները պահանջում են ՀՖՖ նախագահ Ռուբեն Հայրապետյանի անհապաղ հրաժարականը: Շուրջ երկու հարյուր ավտոմեքենաներ Ազատանի հատվածում խաթարել էին կարևորագույն ճանապարհի բնականոն աշխատանքը: Հազարից ավելի երկրպագուներ երթ նախաձեռնեցին Հայաստանի երկրորդ քաղաքի փողոցներով:
Սա իրական հեղափոխություն էր հայկական սպորտում: Երբևէ ֆուտբոլին առնչվող խնդիրների համար անկախ Հայաստանում նման լայնածավալ բողոքի ակցիա տեղի չէր ունեցել մեր երկրում: Նոր Հայաստանում ֆուտբոլը այսուհետև պետք է պատկանի հասարակությանը: Այս գաղափարի շուրջ համախմբվել են հազարավոր երկրպագուներ:
Այսօր հայկական ֆուտբոլը հայտնվել է ոչ միայն ճգնաժամում, այլև փակուղում: Կարծում ենք՝ բոլորի համար է պարզ, որ այսպես այլևս չի կարող շարունակվել: Այսօր ունենք Ռուբեն Հայրապետյան և նրա կամակատար անդեմ մի քանի թիմեր՝ ի դեմս «Ալաշկերտ»-ի, «Բանանց»-ի… Այս թիմերը արժեքը կորցրած մեդալների և եվրագավաթների խաղարկությանը մասնակեցելու համար կորցրել են իրենց համբավն ու արժանապատվությունը երկրպագուների շրջանում: Այսօր արդեն իսկ երբեմնի Հայաստանի չեմպիոն «Ալաշկերտ»-ը ֆուտբոլասերների շրջանում ստացել է «Նեմեցի Ալաշկերտ» պիտակավորումը: Եթե այս կարգավիճակը ձեռք է տալիս «Ալաշկերտ»-ի ֆուտբոլիստներին և այս ակումբի ղեկավարությանը, ապա այս թիմին մնում է մաղթել միայն նորանոր հաջողություններ:
Այսօր հայկական ֆուտբոլում՝ ի դեմս «Շիրակ»-ի և գյումրեցի երկրպագուների, իրավիճակ է փոխվում: Կասկածից վեր է, որ Հայրապետյան Ռուբենը հեռանալու է: Նրա հրաժարականի և պատասխանատվություն կրելու պահը հասունացել է: Ֆուտբոլասերին, սակայն, հուզում է մի հարց:
Ինչպե՞ս է նոր Հայաստանի նոր ֆուտբոլում ելույթ ունենալու «Նեմեցի Ալաշկերտը» կամ «Նեմեցի Բանանցը»: Այս թիմերի պապան՝ Ռուբեն Հայրապետյանը, չգնահատելով իրավիճակը և ոտնատակ անելով օրենքը, փորձում է շարժվել առաջ:
Ընդամենը օրեր անց ՀՖՖ նախագահի ամենակարող և ամենաուժեղ տղայի կերպարն ի չիք է դառնալու: Ֆուտբոլը Ռուբեն Հայրապետյանինը չէ, ֆուտբոլը նրա գլխավորած կառույցինը չէ, ֆուտբոլը նրա կամակատար և արժանապատվությունից զուրկ աշխատակիցներինը չէ: Ֆուտբոլն այն երկրպագուներինն է, որոնք այսօր հանուն արդարության փակել էին Գյումրի տանող ճանապարհը: Նրանք նման քայլի դիմել էին հանուն ֆուտբոլի և ընդդեմ Հայրապետյան Ռուբենի ռեժիմի:
Նախօրեին Նոր Հայաստանի վարչապետ Նիկոլ Փաշինյանը կրկին անգամ հասարակությանը հորդորեց վերջ տալ անհնազանդության գործողություններին: Մասնավորապես, Փաշինյանը հայտարարել էր, որ այս օրերին անհնազանդության բոլոր ակցիաները պետք է որակել որպես սաբոտաժ և նոր՝ ժողովրդի կողմից ընտրված կառավարության դեմ ուղղված գործողություններ: Փաշինյանի հայտարարությունը միանգամայն տեղին էր, հիմնավոր և ընկալելի: Այնուամենայնիվ, միանգամայն տեղին ու արդարացված կարելի է համարելի գյումրեցի երկրպագուների երեկվա քայլը: Հայկական ֆուտբոլը ժամ առաջ պետք է ազատագրվի Ռուբեն Հայրապետյանից: Հապաղելու և ժամանակ կորցնելու պարագայում կարող ենք անդառնալի կորուստներ ունենալ: Ֆուտբոլն ապաքաղաքական, բայց հասարակական ուժեղ մի օղակ է, որը պետք է իր ուրույն տեղն ունենա երկրի ղեկավարների շրջանում: Լինելով «Իմ քայլը» նախաձեռնության առաջնորդ՝ Նիկոլ Փաշինյանը երթի ժամանակ այցելել էր նաև ՀՖՖ: Նա ծակ և ցեխոտ գնդակ էր նետել Ռուբեն Հայրապետյանի գլխավորած կառույցի ուղղությամբ:
«2015 թվականի նոյեմբերի 30-ին հրապարակվել է ՀՖՖ նախագահ Ռուբեն Հայրապետյանի հայտարարությունը: Հայտարարության մեջ նա ասել է, որ եթե աշխարհի 2018 թվականի առաջնության առաջիկա ընտրական փուլը Հայաստանի հավաքականը ձախողի, ես հրաժարական կտամ: Հայաստանի ֆուտբոլի հավաքականը դուրս է մնացել այդ շրջափուլից, և Ռուբեն Հայրապետյանը Սերժ Սարգսյանի նման մինչև օրս հրաժարական չի տվել: Եվ մենք կարծում ենք, որ ինչպես Սերժ Սարգսյանը ստեղծել է ստահոդ պետություն, էնպես էլ Ռուբեն Հայրապետյանը ստեղծել է ստահոդ ֆուտբոլ, և ես կարծում եմ, որ սա մարտահրավեր է Ռուբեն Հայրապետյանին, թե ինքն էլ իր կուսակցական շեֆի նման խոսքի տեր չէ, խոսքից թռնող է: Եթե խոսքի տերն ես, Ռուբեն Հայրապետյան, դու ձախողել ես հայկական ֆուտբոլի զարգացումը, դե՛, հեռացի՛ր քո խոստմանը համապատասխան»,- ասել էր Նիկոլ Փաշինյանը:
Համաժողովրդական շարժման արդյունքում՝ ի դեմս Նիկոլ Փաշինյանի, մենք ունենք լեգիտիմ վարչապետ, որը ներկայացնում է ժողովրդի շահերն ու դիրքորոշումը: Մեր վարչապետը ցավում է ֆուտբոլի համար, ինչը պարզ դարձավ նրա քայլից: «Շիրակ»-ի երկրպագուները կատարել են իրենց քայլը: Մեր տեղեկություններով՝ գյումրեցի երկրպագուները պատրաստվում են էլ ավելի մեծ և վճռական ակցիաներ իրականացնել ընդդեմ Հայրապետյանի ռեժիմի:
Ստեղծված իրավիճակում ակնհայտ է մի բան. Նիկոլ Փաշինյանը պետք է իր դիրքորոշումը և կարծիքն արտահայտի ստեղծված իրավիճակի վերաբերյալ: Շուտով տեղի կունենա Չեմպիոնների լիգայի խաղարկության որակավորման փուլի վիճակահանությունը, և ամենևին ցանկալի չի լինի, որ կարևոր այս մրցաշարում Նոր Հայաստանը ներկայացնի «Նեմեցի Ալաշկերտը»: Թիմ, որը չի նվաճել Հայաստտանի Չեմպիոնի տիտղոսը: Եվրոպական մրցասպարեզում մենք պետք է ունենանք լեգիտիմ թիմ, լեգիտիմ չեմպիոն:
Ինչ խոսք, մեր երկրում այսօր շատ խնդիրներ կան, որոնք ֆուտբոլից ավելի կարևոր են: Բայց մեր ֆուտբոլը արդեն իսկ անդունդում է, և մեր երկրի ղեկավարների միջամտությունը Ռուբեն Հայրապետյանի ռեժիմի դեմ պետք է տեղի ունենա ժամ առաջ: Երկրպագուներն արել են իրենց քայը, և ժամանակն է, որ «Իմ քայլը» նախաձեռնության առաջնորդն ասի իր խոսքը ֆուտբոլը փրկելու վերաբերյալ:
