Ամերիկացի մուլտիմիլիոնատեր Սթեն Քրոնքեն կգնի Լոնդոնի «Արսենալ»-ը: Գործարքի ընդհանուր արժեքը 827 մլն եվրո է:
Առաջիկա օրերին Քրոնքեն «Արսենալ»-ի բոլոր բաժնետերերին բաժնետոմսերը գնելու առաջարկություն կանի:
Այս մասին հաղորդում է Sky News-ը:
Մինչ այժմ Քրոնքեին էին պատկանում ակումբի բաժնետոմսերի 29.99 տոկոսը: Լոնդոնի ֆոնդային բորսայի օրենքներով, երբ բաժնետերերից մեկի բաժնեմասը գերազանցում է 29.99 տոկոսը, ապա նա պարտավոր է սկսել ակումբի մնացած բաժնետոմսերի պարտադիր գնման գործընթացը:
Sky News-ի հաղորդմամբ, Քրոնքեն արդեն վերջնական պայմանավորվածության է եկել Դենի Ֆիշմանի, որին պատկանում են բաժնետոմսերի 17 տոկոսը, և Նինա Բրեյսուլի (16 տոկոս) հետ: Այդ պարագայում Քրոնքեին կպատկանի բաժնետոմսերի գրեթե 63 տոկոսը:
«Արսենալ»-ի սեփականատեր դառնալու հավակնություն ուներ նաև ռուսաստանցի միլիոնատեր Ալիշեր Ուսմանովը, ում պատկանում է բաժնետոմսերի 27 տոկոսը, սակայն «Արսենալ»-ի տնօրենների խորհուրդը բազմիցս հայտարարել է, որ իրենք դեմ են Ուսմանովի ակումբի սեփականատեր դառնալուն: «Արսենալ»-ի նախագահ Փիթեր Հիլլ-Վուդը որպես պատճառ մասնավորապես նշել է ռուսաստանցի միլիոնատիրոջ գումարների ծագման կասկածելի աղբյուրները:
Մինչ այժմ «Արսենալ»-ն անգլիական առաջատար ակումբներից միակն էր, որ այլազգի սեփականատեր չուներ: «Մանչեսթեր Յունայթեդ»-ը պատկանում է ամերիկացի Մալքոլմ Գլեյզերին, «Չելսի»-ն` ռուս Ռոման Աբրամովիչին, «Մանչեսթեր Սիթի»-ն` արաբ շեյխ Մանսուրին: