Ինչպես տեղեկացնում է Երևանի «Միկա»-ի պաշտոնական կայքը, «Միկա»-ն ավարտել է իր առաջին ուսումնամարզական հավաքը, որն անցկացրել է սեփական մարզաբազայում:
Հավաքի վերջին օրը «Միկա»-ն երկկողմանի հանդիպում է անցկացրել, որին մասնակցել են նաև մի քանի պատանի խաղացողներ: Արձանագրվել է 7-5 հաշիվ: Առաջին թիմից աչքի են ընկել Սեմյոն Մուրադյանը (4), Վլադիմիր Ուլուխանյանը (2) և Վարդան Մովսիսյանը, երկրորդից՝ Հենրիկ Հարությունյանը, Սարգիս Շահինյանը, Արեգ Ազատյանը, Ռաֆայել Ղազարյանը և Գոռ Պողոսյանը:
Առաջին թիմը հանդես է եկել հետևյալ կազմով՝ Արմեն Խաչատրյան, Ալեքս Էնրիկե դա Սիլվա (Արթուր Տ. Պետրոսյան), Վարդան Մովսիսյան, Խաչատուր Թոփալյան, Գևորգ Պողոսյան, Աղվան Մկրտչյան (Վլադիմիր Ուլուխանյան), Վարդգես Սաթումյան, Արման Հակոբյան, Հայկ Գալստյան, Սեմյոն Մուրադյան: Իսկ երկրորդը՝ Արմեն Ֆիշյան, Անդրանիկ Ոսկանյան, Գոռ Պողոսյան, Աշոտ Կարապետյան, Արմեն Պետրոսյան (Ռաֆիկ Ղարիբյան), Սարգիս Շահինյան, Ռաֆայել Ղազարյան, Արթուր Ադամյան, Արեգ Ազատյան, Հենրիկ Հարությունյան:
Երկօրյա հանգստից հետո «Միկա»-ն վերսկսել է իր մարզումները և մինչեւ կիպրոսյան հավաքին մեկնելն ամեն օր մեկական մարզում կանցկացնի:
Նշենք, որ «Միկա»-ն նախատեսում է փետրվարի 12-ից երկշաբաթյա ուսումնամարզական հավաք անցկացնել Կիպրոսի Այա Նապա քաղաքում: Նշենք, որ երևանյան թիմը վերջին չորս տարիներին մշտապես իր հավաքներն անցկացնում է հենց Այա Նապայում:
Կիպրոսում Ժոլտ Հոռնյակի գլխավորած թիմն ստուգողական չորս հանդիպում կանցկացնի: Ժամկետներն ու մրցակիցներն արդեն հայտնի են: Փետրվարի 14-ին «Միկա»-ի մրցակիցը կլինի Լեհաստանի երկրորդ խմբում հանդես եկող «Բիտովիա»-ն: Բիտով քաղաքի թիմը երկրորդ խմբի արևմտյան գոտում առաջին խաղաշրջանից հետո զբաղեցնում է 2-րդ հորիզոնականը:
Փետրվարի 18-ին «Միկա»-ի մրցակիցը կլինի Հայաստանի ազգային հավաքականի նորեկ Միխայիլ Մարկոսովի թիմը՝ «Ուֆա»-ն, որը Ռուսաստանի առաջին խմբի առաջնությունում ընթանում է 8-րդ տեղով:
Ի դեպ, անցած տարի՝ կիպրոսյան հավաքի ժամանակ, «Միկա»-ն մրցել էր «Ուֆա»-ի հետ:
«Միկա»-ի երրորդ մրցակիցը դարձյալ Ռուսաստանի ներկայացուցիչ է` Օրենբուրգի «Գազովիկ»-ը, որը երկրորդ խմբի առաջնության ուրալյան գոտու առաջատարն է: Այդ հանդիպումը նախատեսված է փետրվարի 21-ին:
Իր վերջին ստուգողական հանդիպումը «Միկա»-ն փետրվարի 24-ին կանցկացնի սերբական «Չուկարիչկի» թիմի հետ: Բելգրադյան թիմը Սերբիայի առաջին խմբի առաջնության առաջատարներից է և լրջորեն հավակնում է բարձրագույն խմբի ուղեգրին:
Նշենք, որ «Չուկարիչկի»-ն բավական զորեղ թիմ է և հայտնի է իր սաներով:
«Չուկարիչկի»-ի մարզադպրոցի սան է Սերբիայի հավաքականի պաշտպան Ալեքսանդր Կոլարովը, որը 2007-ին տեղափոխվեց «Լացիո», իսկ 2010-ին 5 տարվա պայմանագիր կնքեց «Մանչեսթեր Սիթի»-ի հետ: Նրա տրանսֆերային արժեքը 18 միլիոն եվրո էր: Կոլարովը 2011 թ. ճանաչվել է Սերբիայի լավագույն ֆուտբոլիստ:
Լուսանկարը՝ թիմի պաշտոնական կայքի:
