Կիպրոսում ուսումնամարզական հավաք անցկացնող Երևանի «Միկա»-ի 21-ամյա կիսապաշտպան Տիգրան Բարսեղյանը Եկատերինբուրգի «Ուրալ»-ի կազմում մասնակցեց լիտվական «Սուդավա»-ի հետ ստուգողական հանդիպմանը, տեղեկացնում է «Միկա»-ի մամլո քարտուղարությունը:
Հայկական և ռուսական թիմերի միջև ջերմ բարեկամական հարաբերություններ են: Անցյալ տարի Կիպրոսում «Միկա»-ի 4 ֆուտբոլիստ՝ Գոռ Պողոսյանը, Արթուր Ադամյանը, Ալիկ Առաքելյանը և Հայկ Ոսկանյանը «Ուրալ»-ի կազմում մասնակցել էին ստուգողական հանդիպման:
Տիգրան Բարսեղյանը մասնակցեց «Սուդավա»-ի հետ հանդիպման առաջին կեսին: Հենց խաղասկզբում լիտվացիների հաջողվեց բացել հաշիվը, սակայն առաջին կեսի վերջում Տիգրան Բարսեղյանի ջանքերի շնորհիվ հաշիվը հավասարվեց:
Երիտասարդ ֆուտբոլիստը, որը հանդես էր գալիս աջ եզրային գոտում, գնդակով ներխուժեց տուգանային հրապարակ և արդեն պատրաստվում էր հարվածել, սակայն նրա նկատմամբ խախտեցին կանոները, և մրցավարը խաղի կանոնների խախտում չարձանագրեց, քանի որ գնդակը մնաց «Ուրալ»-ի մոտ և Սապետան հավասարեցրեց հաշիվը:
Առաջին կեսից հետո Ալեքսանդր Թարխանովն փոխեց ամբողջ կազմը: Ասպարեզ դուրս եկավ նաեւ Հայաստանի ազգային հավաքականի անդամ Էդգար Մանուչարյանը, որը երկու գոլային փոխանցման հեղինակ դարձավ: «Ուրալ»-ը հաղթեց 5-1 հաշվով:
Հանդիպումից հետո «Ուրալ»-ի գլխավոր մարզիչ Ալեքսանդր Թարխանովը գովեստի խոսքեր ասաց Տիգրան Բարսեղյանի հասցեին: «Միկա»-ի կիսապաշտպանը վաղը՝ փետրվարի 12-ին «Ուրալ»-ի կազմում կմասնակցի նաև չինական «Շիցզյաչժուան Յունչան» թիմի հետ հանդիպմանը:
