Չեմպիոնների լիգայի քառորդ եզրափակիչի «Ինտեր»-«Շալկե» դիմակայությունից առաջ շատերը նախապատվությունը տալիս էին իտալական ակումբին: Եթե հաշվի առնենք, որ գործող գավաթակիրը հենց «Ինտեր»-ն է, և միլանյան ակումբի խաղացողներն էլ շատ ավելի փորձառու են, քան գելզենկիրխենցիները, ապա իսկապես կարելի էր համաձայնել մեծամասնության հետ և «Ինտեր»-ին համարել ֆավորիտ: Սակայն այն, ինչի ականատեսը եղանք երեկ կայացած խաղում, բոլորովին այլ բանի մասին է խոսում:
Լեոնարդոն կորցնում է վերջին հնարավորությունները: Նրան հրաշալի շանս էր տրված մոռացության մատնելու շաբաթօրյա միլանյան դերբիում կրած խոշոր հաշվով պարտությունը: Դրա համար հարկավոր էր վստահ խաղ ցուցադրել «Շալկե»-ի հետ և հաղթել: Լեոնարդոն չկարողացավ լուծել իր առջև դրված խնդիրը: Նման բարձրակարգ և փորձառու ֆուտբոլիստներով թիմն իրավունք չունի սեփական հարկի տակ պարտվել Գերմանիայի առաջնության մրցաշարային աղյուսակի 10-րդ հորիզոնականի թիմին:
Ամեն ինչ հրաշալի սկսվեց «Ինտեր»-ի համար. հանդիպման առաջին իսկ րոպեին Դեյան Ստանկովիչը մոտ 50 մետրից կատարած խելահեղ հարվածով առաջ մղեց միլանցիներին: Ընդունած գոլից հետո Ռանյիկի սաները չկորցրին իրենց և շարունակեցին խաղալ այնպես, ինչպես և սպասվում էր: Գելզենկիրխենցիները գլխակորույս չնետվեցին առաջ, դրա կարիքն էլ չկար. առջևում դեռ 90 րոպե և ևս մեկ հանդիպում կար: Այդուհանդերձ պատասխան գոլը երկար սպասել չտվեց. 17-րդ րոպեին անկյունայինի խաղարկումից հետո աչքի ընկավ Մատիպը:
34-րդ րոպեին Միլիտոն կրկին առաջ մղեց իր թիմին, սակայն այս անգամ էլ «Ինտեր»-ի առավելությունը երկար չտևեց. 40-րդ րոպեին Էդուն բացեց իր գոլերի թիվը Չեմպիոնների լիգայի խաղարկությունում:
Երկրորդ խաղակեսը սկսվեց տանտերերի գրոհներով, և նրանք հաշվի մեջ առաջ անցնելու երկու հիանալի հնարավորություն կորցրին: Մի դեպքում Նոյերի դեմ միայնակ մնացած Միլիտոն շեղ հարվածեց, մյուս դեպքում արդեն դարպասապահը փրկեց Էտոոյի կատարած չափազանց վտանգավոր հարվածից հետո:
«Դու չես խփում՝ քեզ են խփում». ֆուտբոլի չգրված օրենքն է: 53-րդ րոպեին «Շալկե»-ն առաջ անցավ հաշվի մեջ: Եվ ով, եթե ոչ լեգենդար Ռաուլը պետք է դառնար այս հանդիպման կարևորագույն գոլի հեղինակը: Հակագրոհի ժամանակ Ֆարֆանը գրագետ փոխանցում կատարեց իսպանացուն, որը հեշտությամբ ազատվեց Կիվույի հսկողությունից ու խփեց իր 70-րդ գոլը Չեմպիոնների լիգայի խաղարկությունում:
Ինչո՞ւ էր այս գոլն ամենակարևորը, որովհետև դրանից հետո «Ինտեր»-ը փլուզվեց: 4 րոպե անց Ռանոկյան դարձավ ինքնագոլի հեղինակ` հաշիվը դարձնելով 2:4, իսկ 62-րդ րոպեին Կիվուն ստացավ երկրորդ դեղին քարտն ու հեռացվեց խաղադաշտից: Հանդիպման 75-րդ րոպեին Էդուն խփեց այս խաղում իր երկրորդ գնդակը` հաշիվը դարձնելով մեղմ ասած խայտառակ` 2:5:
Ի՞նչը կփրկի Լեոնարդոյին: Միայն հրաշքը. եթե մեկ շաբաթ անց իտալացիները կարողանան Գելզենկիրխենում հասնել ցանկալի արդյունքի ու դուրս գալ կիսաեզրափակիչ:
