Ինչպես արդեն հայտնել ենք, ԱՄՆ-ում մեծ հեղինակություն վայելող ազատ ոճի ըմբիշ, ըմբշամարտի ԱՄՆ օլիմպիական գլխավոր հույսերից մեկը համարվող 23-ամյա Կայլ Դեյկը մարտահրավեր է նետել Հայաստանի լավագույն ըմբիշներից մեկին՝ հունահռոմեական ոճի ըմբշամարտի Լոնդոնի օլիմպիադայի փոխչեմպիոն, 2014 թ աշխարհի չեմպիոն, Եվրոպայի կրկնակի չեմպիոն 27-ամյա Արսեն Ջուլֆալակյանին:
Նրանց գոտեմարտն ամերիկյան ուսանողական թիմերի ըմբշամարտի մրցաշարի, այս անգամ «Grapple in the Garden» ըմբշամարտի գոտեմարտերի մրցաշարքի շրջանակնում տեղի է ուենալու այսօր՝ դեկտեմբերի 21-ին Երևանի ժամանակով ժամը 20-ին, Նյու-Յորքի նշանավոր «Մեդիսոն Սքուեր Գարդեն» մարզապալատում: Այս մրցամարտի հովանավորը MusclePharm ընկերությունն է, որը մասնագիտացված է մարզիկների սննդի մեջ օգտագործվող կենսաբանական հավելումների թողարկումով:
Կայլ Դեյկը թեև ԱՄՆ-ի սահմաներից դուրս քիչ հայտնի է, սակայն ԱՄՆ-ում երկրի ամենահանրաճանաչ ըմբիշներից մեկն է: Նա 74 կգ քաշային կարգի օլիմպիական չեմպիոն, հռչակավոր Ջորդան Բարոուզի գլխավոր մրցակիցն է: Նրա հիմնական նվաճումները կապված են ԱՄՆ-ում մեծ հեղինակություն վայելող ըմբշամարտի ուսանողական առաջնություններում ունեցած հաջողություններևի հետ, ուր նա 4 անգամ դարձել է չեմպիոն (ընդ որում 4 տարբեր քաշային կարգերում): Հունահռոմեական ոճի ըմբշամարտի Հայաստանի հավաքականի գլխավոր մարզիչ, Սեուլի օլիմպիական չեմպիոն Լևոն Ջուլֆալակյանը ուսումնասիրել է Դեյկի մասնակցությամբ գոտեմարտերը ու այսպիսի գնահատական է տվել առաջիկա գոտեմարտին.
«Ամերիկացի ըմբիշը Արսենի համար հետաքրքիր մրցակից կլինի: Շատ շարժունակ, պայքարող, կռվող ըմբիշ է,սակայն ճիշտ գոտեմարտելու դեպքում Արսենը չպետք է ոչ մի հնարավորություն թողնի Դեյկին: Չեմ կարծում, թե մրցավարական կողմնապահություն լինի: Ինչ վերաբերում է Դեյկի հաղթանակին, ապա կարող եմ ասել` եթե Արսենը ճիշտ և գրագետ գոտեմարտ վարի՝ Դեյկին չթողնելով թաքուն ձևով օգտագործել ազատ ոճին բնորոշ հնարքներ, ապա ամեն ինչ լավ կլինի»:
Հայաստանի ըմբշամարտի ֆեդերացիայի մամլո ծառայություն
