Հանգստյան օրերին կայացան Հայաստանի առաջնության երկրորդ տուրի հանդիպումները: Շաբաթ օրը կայացան «Արարատ»-«Միկա» և «Բանանց»-«Ուլիս» հանդիպումները: Եթե «Միկա»-ի տոնած հեշտ հաղթանակը կանխատեսելի էր, ապա «Բանանց»-ի պարտությունը կարելի է որոշակիորեն անակնկալ համարել: Առավելևս, եթե հաշվի առնենք, որ տանտերերը Բռուն Կորրեայի խփած գոլի շնորհիվ ընդմիջման գնացին հաղթողի կարգավիճակում: Ելնելով առաջին խաղակեսի ընթացքից, կարելի էր ենթադրել, որ «Բանանց»-ը հեշտ հաղթանակ կտանի հյուրերի նկատմամբ, սակայն Սևադա Արզումանյանն ու իր սաները բոլորովին այլ կարծիքի էին: Ընդմիջումից հետո «Ուլիս»-ն ասես կերպարանափոխվեց և կարողացավ երեք անպատասխան գնդակ ուղարկել տանտերերի դարպասը: Արտյոմ Ադամյանը, Նորայր Սահակյանն ու Գեորգի Կրասովսկին կերտեցին իրենց թիմի կամային հաղթանակը:
«Արարտ»-«Միկա» խաղում հյուրերի առավելությունն ակնհայտ էր, և 0:3 հաշիվն ամբողջությամբ արտացոլում է հանդիպման ընթացքը: Արդեն 6-րդ րոպեին Էդնեյի և Նարեկ Բեգլարյանի գոլերի շնորհիվ հյուրերն առջևում էին` երկու գնդակի առավելությամբ: Ողջ հանդիպման ընթացքում Արկադի Անդրեասյանի սաները ընդամենը երկու վտանգավոր գրոհ կազմակերպեցին և երկուսն էլ անարդյունավետ: Այս խաղում ևս մեկ կարևոր փաստ գրանցվեց. 78-րդ րոպեին առաջին անգամ խաղադաշտ դուրս եկավ չինացի հարձակվող Դոնգ Ֆունժուն: «Մանչեսթեր Յունայթեդ»-ի նախկին ֆուտբոլիստն արդարացրեց Արմեն Շահգելդյանի վստահությունը և մրցավարի ավելցրած երրորդ րոպեին դրեց հանդիպման վերջակետը:
Այսօր կայացած հանդիպումներում նույնպես անակնկալ արդյունք գրանցվեց: Գործող չեմպիոն «Փյունիկ»-ը սեփական հարկի տակ չկարողացավ առավելության հասնել «Գանձասար»-ի նկատմամբ: 40-րդ րոպեին տուգանայինից կատարած գեղեցիկ հարվածով հանդիպման հաշիվը բացեց Հայաստանի հավաքականի կիսապաշտպան Մարկոսը: Սակայն «Գանձասար»-ի ֆուտբոլիստները չընկճվեցին ընդունած գնդակից և 78-րդ րոպեին գեղեցիկ կոմբինացիայի խաղարկումից հետո Արթուր Քոչարյանը հավասարեցրեց հաշիվը: Ընդհանուր առմամբ հավասար պայքարում անցած խաղում գրանցվեց հավասար` 1:1 հաշիվ:
Մյուս խաղում «Շիրակ»-ը Իջևանի «Արնար» մարզադաշտում ընդունեց «Իմպուլս»-ին և այս մրցաշրջանում իր առաջին հաղթանակը տոնեց: 22-րդ րոպեին հանդիպման հաշիվը բացեց Գևորգ Հովհաննիսյանը, սակայն դեռ առաջին խաղակեսում հյուրերին հաջողվեց խփել պատասխան գնդակը: Մրցավարի ավելացրած երկրորդ րոպեին աչքի ընկավ «Իմպուլս»-ի վրացի լեգեոներ Գագա Տիբիլաշվիլին: 84-րդ րոպեին դիլիջանյան ակումբի պաշտպան Միխեիլ Սիմոնյանը ձեռքով խաղաց սեփական տուգանայի հրապարակում, և մրցավարը նշանակեց 11-մետրանոց հարված: Անդրանիկ Բարիկյանը նշակետից չվրիպեց և հաղթանակ բերեց իր թիմին:
Երկրորդ տուրից հետո Հայաստանի առաջնության մրցաշարային աղյուսակում եռիշխանություն է. «Միկա»-ն, «Փյունիկ»-ն ու «Շիրակ»-ը վաստակել են 4-ական միավոր: Նրանցից ընդամենը մեկ միավորով է ետ մնում «Ուլիս»-ը: «Գանձասար»-ը, «Արարատ»-ն ու «Բանանց»-ը ունեն մեկական միավոր: Միակ թիմը, որ դեռևս միավոր չի վաստակել` «Իմպուլս»-ն է:
