Մոսկվայի «Դինամո»-ի ու Հայաստանի ազգային հավաքականի դարպասապահ Ռոման Բերեզովսկին կարծում է, որ ԲԿՄԱ-ի իր գործընկեր Իգոր Ակինֆեևը Ռուսաստանի ընտրանու անվիճելի հիմնական դարպասապահն է: Հիշեցնենք, որ, Ակինֆեևից զատ, 2014թ. աշխարհի առաջնությանը մասնակցելու հրավերներ են ստացել նաև Յուրի Լոդիգինը («Զենիթ») և Սերգեյ Ռիժիկովը («Ռուբին»):
«Ակինֆեևն այս մրցաշրջանում իր ուժերին կասկածելու որևէ առիթ չի տվել. նա եղել ու մնում է Ռուսաստանի լավագույն դարպասապահը:
Լոդիգինը բարձրակարգ դարպասապահ է, որը լավ է խաղում մրցակցի հարձակման գծի դեմ, համարձակորեն դեմ հանդիման է գնում դեպի հարձակվողը: Իմ կարծիքով, նրան չի բավականացնում ոտքերով խաղը գնդակի հետ: Լոդիգինն ամբողջ առաջնության ընթացքում շատ օգնեց իր թիմին, բայց վերջնամասն այդքան էլ հաջող չստացվեց:
Առհասարակ, Ռուսաստանի հավաքականը դարպասապահական ուժեղ գիծ ունի: Ռիժիկովը նույնպես հիանալի մրցաշրջան անցկացրեց, թեև իր թիմը նշանակալի հաջողությունների չհասավ»,- Բերեզովսկիի խոսքերը մեջբերում է «Р-Спорт»-ը: