Չեմպիոնների լիգայի 1/8 եզրափակիչ «Բարսելոնա»-«Արսենալ» խաղից առաջ թե՛ Արսեն Վենգերը, թե՛ «Արսենալ»-ի ֆուտբոլիստները միաբերան պնդում էին, որ իրենք պետք է խաղան իրենց հարձակվողական ֆուտբոլը: «Բարսելոնա»-ն ոչ միայն այլ կերպ չի կարողանում խաղալ, այլև դրա փորձերն էլ երբևէ չի կատարել: «Արսենալ»-ն էլ չէր փորձել, սակայն Արսեն Վենգերը ստեց, խաբեց բոլորին և փորձեց ճակատագիրը: Ինչպես հետագայում պարզվեց, առաջին հերթին խաբեց ինքն իրեն: Ստելու համար ֆրանսիացուն չի կարելի մեղադրել. դա նրա մարզչական իրավունքների մեջ է մտնում, սակայն քառորդ եզրափակիչում «Բարսելոնա»-ն է, և՝ արժանիորեն:
Այսքան դժգույն խաղ «Արսենալ»-ի կատարմամբ երևի ոչ ոք չէր տեսել: Ամբողջ հանդիպումն անցավ բացառապես կատալոնացիների գրոհներով: Եթե սկզբում լոնդոնցիները ինչ-որ չափով կարողանում էին պաշտպանվել, որոշ դեպքերում էլ սկզբում՝ Շեսնին, այնուհետև նրան փոխարինած Ալմունիան էին փրկում թիմին, ապա առաջին խաղակեսի ավելացված 3-րդ րոպեին Ինեստայի փոխանցումից հետո Մեսսին գերազանց կերպով շրջանցեց Ալմունիային և գնդակն ուղարկեց դատարկ դարպասը:
Երկրորդ խաղակեսում բոլորը սպասում էին, որ Վենգերը կվերադասվորի թիմը, և վերջապես կտեսնեն իրենց ճանաչած «Արսենալի»-ն: Հաշիվն ի վերջո հավասարվեց, սակայն լոնդոնցիներն այդ դրվագում նույնպես դիտողի դերում էին. անկյունայինի խաղարկումից հետո Բուսկեսը գլխի գեղեցիկ հարվածով գրավեց Վալդեսի դարպասը: Այդպես էլ մինչև խաղի ավարտը ոչ մի հարված չգրանցվեց կատլոնացիների դարպասին: Բարսելոնայի գրոհները գնալով ավելի մեծ վտանգ էին պարունակում իրենց մեջ: Դրան նպաստեց նաև վան Պերսիի հեռացումը. հոլանդացին սուլիչից հետո գնդակին հարվածելու համար երկրորդ դեղին քարտով պատժվեց ու հեռացվեց խաղադաշտից: Նշենք, որ հանդիպման գլխավոր մրցավար Մասսիմո Բուզական դեռ առաջին խաղակեսում կարող էր հեռացնել վան Պերսիին ոչ խաղային իրադրությունում մրցակցին հարվածելու համար: Ինչևէ, «Բարսա»-ն գրոհում էր, և գոլը հասունանում էր: 69-րդ րոպեին Ինեստա Վիլյա Չավի եռաքայլ կոմբինացիայից հետո վերջինս ստիպեց Ալմունիային երկրորդ անգամ գնդակը հանել սեփական դարպասից: 2 րոպե անց Պեդրոն բարձր արագությամբ ներխուժեց տուգանային հրապարակ: Նրա դիմաց հայտնված Կոնսելնիի գործողություններում մրցավարը կանոնների խախտում նկատեց: Մեսսին հստակ իրացրեց 11-մետրանոց հարվածը` 3:1: Մնացած 20 րոպեի ընթացքում «Բարսելոնա»-ն նվազագույնը 5 անգամ կարող էր դնել այս հանդիպման վերջակետը, բայց Գվարդիոլայի սաները շարունակում էին չօգտագործել իրենց ստեղծած գոլային պահերը և կարող էին պատժվել դրա համար: Փոխարինման դուրս եկած Նիկլաս Բենդտները միայնակ հայտնվեց Վալդեսի առաջ ու չկարողացավ լավ կասեցնել գնդակը, Մասկերանոն հասցրեց դանիացու ոտքերի տակից հանել այն:
«Բարսելոնա»-ն արժանիորեն հաղթեց և քառորդ եզրափակիչում է: Վենգերի սուտը, ինչպես պարզվեց, այնքան էլ անմեղ չէր. «Արսենալ»-ի երկրպագուներից շատ ժամանակ կպահանջվի ֆրանսիացուն ներելու համար:
