Հայաստանի ըմբշամարտի ֆեդերացիայի փոխնախագահ, հունահռոմեական ոճի ըմբշամարտի Հայաստանի հավաքականի մարզիչ, Արսեն Ջուլֆալակյանի անձնական մարզիչ Սամվել Գևորգյանն 1in.am Sport-ի հետ զրույցում ամփոփեց 2013 թվականը, հղեց իր շնորհավորական ուղերձը:
«2013 թվականը գնահատում եմ բավարար: Կարող էր ավելի լավ լինել, բայց հունահռոմեական ոճի ըմբշամարտի հավաքականը բազմաթիվ մեդալներ նվաճեց: Աշխարհի առաջնությունում 3 մեդալ նվաճեցինք: Ալեքսանյանը նույնիսկ կարող էր արժանանալ ոսկու, բայց տեսաք, թե մրցավարներն ինչպես վարվեցին:
Երիտասարդական հավաքականը 3 ոսկե մեդալ է նվաճել՝ 2-ն Աշխարհի առաջնությունում, 1-ը՝ Եվրոպայի: Լավ փոփոխություններ եղան կանոնակարգում: Սումոն վերացավ: Մարդիկ իսկական ըմբշամարտ են դիտում հիմա: Գոհ ենք փոփոխություններից:
Ամեն ինչ անում ենք, որ 2014-ի արդյունքներն ավելի լավը լինեն, քան 2013-ը: Շնորհավորում եմ մեր հայ ազգին: Թող առողջության, հաջողության տարի լինի, իսկ մարզիկները հնարավորինս շատ մեդալներ նվաճեն ու ուրախացնեն մեր ժողովրդին»:
