Հոկտեմբերի 5-ին Վազգեն Սարգսյանի անվան «Հանրապետական» մարզադաշտում ֆուտբոլի Հայաստանի ազգային հավաքականը կմրցի ենթախմբի առաջատար Լեհաստանի ընտրանու հետ: Վերջինիս համար այս հանդիպումը ավելի քան կարևոր է, քանզի նույնիսկ ոչ-ոքի արդյունքը կարող է կասկածի տակ դնել մասնակցությունը 2018 թվականին Ռուսաստանում կայանալիք աշխարհի առաջնությանը: 8-րդ տուրից հետո Լեհաստանն ունի 19, իսկ երկրորդ և երրորդ հորիզոնականներում գտնվող Դանիան և Մոնտենեգրոն՝ 16-ական միավոր: Վերջին հանդիպումը լեհերը կանցկացնեն հոկտեմբերի 8-ին՝ սեփական հարկի տակ մրցելով Մոնտենեգրոյի հետ: Հայաստանին հաղթելու դեպքում Լեհաստանի հավաքականին խմբում հաղթող ճանաչվելու համար վերջին տուրում բավարար կլինի նույնիսկ ոչ-ոքին:
8-րդ տուրից հետո Հայաստանի հավաքականը 6 միավորով գտնվում է նախավերջին՝ 5-րդ հորիզոնականում: Այս արդյունքը ոչ այլ ինչ է, քան ձախողում: Խայտառակ արդյունքի հետևանքով Հայաստանի հավաքականը Ազգերի լիգայի խաղարկությանն ընդառաջ ամրապնդվել է ամենաթույլ զամբյուղում և հանդես կգա վերջին՝ D դիվիզիոնում:
Հիշեցնենք, որ 2015 թվականի նոյեմբերին ՀՖՖ նախագահ Ռուբեն Հայրապետյանը հայտարարել էր, որ 2018 թվականի աշխարհի առաջնությունում մեր հավաքականի ձախողվելու դեպքում հրաժարական կտա: Իսկ ձախողում նշանակում է չտիրանալ եզրափակիչ փուլի ուղեգրին: Մեր հավաքականի վերջին ձախողումներից հետո շատերն են հիշատակում Ռուբեն Հայրապետյանի խոսքերը: «Եթե չստացվի, ես հեռանալու եմ: Ես գնում եմ: Երբ եմ ասել, թե այս շրջափուլը չեղավ՝ ես կգնամ: Ես ստախոս չեմ: Ես իմ խոսքը պահում եմ. եթե չկարողացա կարգավորել, գնալու եմ: Հայկական առաջնությունում տոտալիզատոր է մտել, եթե չկարողանամ վերացնել, գնալու եմ: Եթե անկարգապահությունը չկարողանամ վերացնել, գնալու եմ: Հաճույքով կգնամ, ուղղակի հիմա թասիբի են գցել, դրա համար չեմ գնում»,- ասել էր Հայրապետյանը:
Հայաստան-Լեհաստան խաղը ընթացիկ շրջափուլի երևանյան վերջին մրցավեճն է: Պաշտոնական հաջորդ հանդիպումը Հայաստանի ազգային հավաքականը կանցկացնի մոտ մեկ տարուց՝ 2020 թվականի Եվրոպայի առաջնության շրջանակներում կամ Ազգերի լիգայի մրցաշարում: Ուստի հոկտեմբերի 5-ին տեղի կունենա նաև վերջին հանդիպումը ֆուտբոլասերների և ազգային թիմի ֆուտբոլիստների միջև, վերջին հանդիպումը երկրպագուների և ՀՖՖ նախագահի միջև: Հանդիպում, որը կարող է վճռորոշ նշանակություն ունենալ հայկական ֆուտբոլի համար:
Շատերը, հուսահատված լինելով, կոչ են անում ուղղակի բոյկոտել Լեհաստանի հավաքականի դեմ հանդիպումը: Շատերը ուղղակի հնարավորություն չունեն 4-10 հազար դրամ վճարելու և խաղին հետևելու: Իրավիճակն այնպիսին է, որ բոյկոտը միայն ու միայն կօգնի ՀՖՖ նախագահին, ով ամենևին մտադիր չէ լքել պաշտոնը:
Ֆուտբոլի ֆեդերացիան առաջիկա հանդիպմանը չի հավատարմագրել aysor.am-ի թղթակցին այն պատճառով, որ լրագրողը հրապարակել է Հայրապետյանի հնարավոր հրաժարականի մասին նյութեր: Կարծում ենք՝ մեկնաբանությունն ավելորդ է: Այո, հայկական ֆուտբոլի ներկայիս իշխանության արմատներն այնքան խորն են, որ փոփոխություններն անհավանական են թվում: Այդուհանդերձ, Լեհաստանի հետ հանդիպումը հնարավորություն է, առիթ պահանջ ներկայացնելու, հաշիվ ու պատասխան պահանջելու: Դատարկ տրիբունաները կնշանակեն միայն ու միայն հուսահատություն: Հուսահատությունից ոչ ոք ապահովագրված չէ, բայց հուսահատությունը ոչ թե «թքելու ու հեռանալու», այլ իրավիճակը շտկելու առիթ պետք է հանդիսանա:
Լեհաստանի հետ հանդիպումը այն բացառիկ հանդիպումներից է, որը ֆուտբոլասերին ոչ թե մարզադաշտ պետք է տանի ֆուտբոլ նայելու, այլ ֆուտբոլը փրկելու նպատակով: Բոլորի համար է պարզ, որ Լեհաստանը հաղթելու է, և ըստ էության նայելու կամ մերոնց ոգևորելու որևէ մոտիվացիա չկա: Ցավալի է, բայց նման հանդիպումները շարունակական բնույթ կկրեն այնքան ժամանակ, մինչև արմատական փոփոխությունը չդառնա հասարակական պահանջ: Պահանջն ըստ էության ունենք, մնում է միայն այդ պահանջը ներկայացնել՝ մատուցել ճիշտ ժամանակին և ճիշտ վայրում: