Ֆուտբոլի Հայաստանի ազգային հավաքականը Արթուր Պետրոսյանի գլխավորությամբ երկրորդ հանդիպումը կանցկացնի՝ մարտի 26-ին Վազգեն Սարգսյանի անվան «Հանրապետական» մարզադաշտում մրցելով Ղազախստանի հավաքականի հետ:
Նոյեմբերի 11-ին՝ Մոնտենեգրոյի հետ խաղում, մեր ֆուտբոլիստներն ըստ էության պատմական հաղթանակի հասան: Հայաստանի հավաքականն առաջին անգամ, պարտվելով 2:0 հաշվով, կարողացավ երեք գնդակ խփել և հաղթել: Առաջին կեսից հետո, երբ հյուրերը առջևում էին երկու գնդակի տարբերությամբ, «Հանրապետական» եկած ֆուտբոլասերների զգալի մասը խոսում էր հերթական ձախողման մասին: Երկրորդ խաղակեսում, սակայն, տեսանք բոլորովին այլ հավաքական:
Ի՞նչ է ասել Արթուր Պետրոսյանը իր ֆուտբոլիստներին Մոնտենեգրոյի հետ խաղի ընդմիջմանը: Այս հարցի պատասխանով այսօր հետաքրքրված են ընտրական փուլում Հայաստանի հավաքականի բոլոր մրցակիցները, մասնավորապես՝ Ղազախստանի հավաքականը: Տպավորիչ հաղթանակից հետո Հայաստանի հավաքականը ստացել է մուգ նժուգի որակումը:
Ֆուտբոլում շատ են դեպքերը, երբ որևէ թիմ 2, նույնիսկ 3 գնդակի տարբերությամբ պարտվելով՝ կարողանում է կամային հաղթանակ տանել: Թիմերի մակարդակով կամային հաղթանակները միանգամայն նորմալ երևույթ են. մարզիչները ամիսներ, տարիներ շարունակ ինտենսիվորեն աշխատում են միևնույն կոլեկտիվի հետ՝ ձեռքի տակ ունենալով հանդիպումը փրկելու բազմաթիվ տակտիկական մարտավարություններ: Ազգային հավաքականի դեպքում իրավիճակը բոլորովին այլ է: Ֆուտբոլիստները հավաքականի ճամբար են գալիս խաղից ընդամենը 4-5 օր առաջ, և գլխավոր մարզչի համար բավական դժվար է ձևավորել խաղային տարատեսակ մոդելներ:
Մոնտենեգրոյի հետ խաղում Պետրոսյանը նշեց իր նորամուտը ազգային թիմում, և նա ընդամենը մի քանի օր էր աշխատել ֆուտբոլիստների հետ: Տակտիկական առումով այս խաղում տեղի ունեցած զարգացումները խոսում են մեր մարզչի ֆենոմենի մասին: Մարզիչ, ով դուրս բերեց հավաքականն անդունդից՝ հաղորդելով մոտիվացիա և հույս ապագայի նկատմամբ:
Մարտավարական ինչպիսի՞ մոդելով Պետրոսյանը կպայքարի Ղազախստանի հավաքականի դեմ: Այսօր մեր հավաքականի ֆուտբոլիստների մեծ մասի տարիքը 24-28 է: Սա ֆուտբոլիստների համար ծաղկուն շրջան է համարվում: 30 և ավելի բարձր տարիքի են միայն պաշտպան Հրայր Մկոյանը, կիսապաշտպան Մարկոս Պիզելին, հարձակվողներ Էդգար Մանուչարյանը, Արթուր Սարկիսովը, ինչպես նաև դարպասապահ Գրիգոր Մելիքսեթյանը: Փաստորեն խաղային բոլոր օղակներում Պետրոսյանի տրամադրության տակ կան փորձառու, որոշակի վերապահումով ասված, վետերաններ:
Պետրոսյանի տրամադրության տակ է Եվրոպայի լավագույն կիսապաշտպանների շարքին դասվող Հենրիխ Մխիթարյանը: Վերջինը խաղային բարձր որակներով օժտված լինելուց բացի՝ ունի նաև դաշտը տեսնելու փայլուն ունակություն: Եթե հավաքականի մարտավարությանը մոտենանք շախմատային տեսանկյունից, ապա Պետրոսյանի համար Մխիթարյանը գլխավոր ֆիգուրն է՝ «թագուհին»: Հայաստանի հավաքականի ավագը մրցակցին կարող է անհանգստացնել բոլոր խաղային դիրքերում:
Մոնտենեգրոյի հետ մրցավեճում Մխիթարյանը խաղը սկսեց կիսապաշտպանության ձախ եզրում, այնուհետև տեղափոխվեց կենտրոն: Այս փոփոխության շնորհիվ երկրորդ խաղակեսում մեր հավաքականի գրոհները էլ ավելի բուռն և վտանգավոր դարձան: Ղազախստանը կարգով զիջում է Մոնտենեգրոյին: Այս թիմերի միջև արդեն կայացած մրցավեճում ղազախները հյուրընկալվելիս 5 անպատասխան գնդակ են բաց թողել:
Օբյեկտիվորեն մոտենալով առաջիկա խաղում կողմերի հնարավորություններին՝ կարծում ենք, որ ի տարբերություն Մոնտենեգրոյի հետ հանդիպման՝ Պետրոսյանին կհաջողվի բեկել հանդիպման ընթացքն արդեն առաջին կեսում: Հայաստանի հավաքականի հնարավոր մեկնարկային կազմին կանդրադառնանք ավելի ուշ:
Լուսանկարը՝ ՀՖՖ-ի
