Ֆուտբոլի Հայաստանի ազգային հավաքականի գլխավոր մարզիչ Արթուր Պետրոսյանը հրապարակեց մարտի 26-ին կայանալիք աշխարհի առաջնության ընտրական փուլի՝ Ղազախստանի ընտրանու հետ հանդիպման վերջնական հայտացուցակը: Հրավիրված 24 ֆուտբոլիստներից 18-ը լեգիորներներ են, իսկ մյուս խաղացողները ներկայացնում են հայկական թիմերը:
Հայկական ակումբները ներկայացնող 6 ֆուտբոլիստներից 3-ը դարպասապահներ են՝ Արսեն Բեգլարյանը՝ «Ալաշկերտից», Անատոլի Այվազովը՝ «Շիրակից» եւ Գրիգոր Մելիքսեթյանը՝ «Գանձասար-Կապանից»: Եթե մեր հավաքականի պաշտպանական, կիսապաշտպանական եւ հարձակվողական օղակները բալանսավորված տեսք ունեն, եւ Պետրոսյանը մեկնարկային կազմի որոշելու հարցում ունի ընտրության հնարավորություն, ապա դարպասապահի խնդիրը շարունակում է մնալ օրակարգում:
Մոնտենեգրոյի հետ մրցավեճում Բեգլարյանը չափազանց անվստահ խաղ ցուցադրեց: Նրա մեղքով հյուրերը բացեցին հաշիվը, իսկ երբ հաշվիը 2:2 էր, Բեգլարյանը, չգիտես ինչու, դուրս եկավ դարպասից. նրա պարտականությունը կատարեց պաշտպան Հրայր Մկոյանը, ով ուղղակի փրկեց մեր հավաքականին պարտությունից: Պաշտոնական հանդիպումներում դարպասապահի նման սխալներն ուղղակի աններելի են: Ազգային թիմում պետք է խաղան կայուն խաղ ցուցադրող դարպասապահները, ասել է թե՝ «լավ դարպասապահը թիմի կեսն է»: Դարպասապահը խաղադաշտում գտնվող կարեւորագույն այն ֆիգուրն է, ում շնորհիվ թիմը կարող է խուսափել պարտությունից, եւ հակառակը՝ հաղթանակի հասնել:
Բազմաթիվ են դեպքերը, երբ Հայաստանի հավաքականը հաղթել կամ ոչ-ոքի է խաղացել Ռոման Բերեզովսկու փայլուն խաղի շնորհիվ: Երբ պաշտպանները գիտակցում են, որ իրենց թիկունքում լուրջ խնդիրներ կան, խարխլվում է ողջ խաղային մեխանիզմը: Ավելի ստույգ՝ պաշտպանները ստիպված են լինում հետ քաշվել սեփական դարպասի մոտ, ինչը դժվարացնում է գնդակը մրցակցի կիսադաշտ արագ տեղափոխելու գործընթացը:
«Առաջին լրատվական»-ի տեղեկություններով՝ Ղազախստանի հետ մրցավեճում Հայաստանի ազգային հավաքականի դարպասը պաշտպանելու է Գյումրիի «Շիրակի» 20-ամյա դարպասապահ Անատոլի Այվազովը, ով արդեն ելույթ է ունեցել երիտասարդական եւ պատանեկան հավաքականներում: Այվազովը մինչեւ Հայաստանի առաջնությունում հայտնվելը հանդես է եկել Վլադիկավազի «Սպարտակի» եւ Մոսկվայի «Լոկոմոտիվի» պատանեկան թիմերում: Հայաստանի առաջնությունում նա լավ տպավորություն է թողնում եւ հատկապես հաջող է խաղում օդային պայքարում: Այս առումով Այվազովը, կարելի է ասել, նման է Բերեզովսկուն: Ղազախստանի հետ հանդիպումը լավ առիթ է նրա համար դրսեւորվելու և վստահություն ձեռք բերելու ազգային թիմի կազմում: Սա Այվազովի համար հնարավորություն է նաեւ արտասահմանյան ակումբների ուշադրությունը գրավելու համար: Կարգով ավելի բարձր առաջնությունում նա կկարողանա միայն բարելավել հմտությունը: Նկատենք, որ Ղազխստանի հավաքականը աշխարհի առաջնության ընտրական փուլում մեր մրցակիցներից ամենաթույլն է, ուստի երիտասարդ դարպասապահին խաղադաշտ դուրս բերելը Պետրոսյանի համար ամենապատեհ առիթն է:
Ռոման Բերեզովսկին Հայաստանի ազգային հավաքականում նորամուտը նշել է 22 տարեկանում` 1996 թվականի օգոստոսի 31-ին Երեւանում տեղի ունեցած Պորտուգալիայի հավաքականի հետ հանդիպմանը: Նրա գերազանց խաղի արդյունքում Հայաստանի հավաքականը անակնկալ մատուցեց՝ Եվրոպայի ուժեղագույն հավաքականներից մեկի հետ մրցավեճն ավարտելով 0:0 հաշվով:
Այվազովը 21 տարեկան կդառնա հունիսի 8-ին: Չնայած որ 21 տարեկանում դարպասապահները դեռեւս կայացման փուլում են, այդուհանդերձ, Բերեզովսկու օրինակը ցույց է տալիս, որ նույնիկ այս հասակում կարելի է հաջողության հասնել:
«Գանձասար-Կապանը» ներկայացնող Գրիգոր Մելիքսեթյանը փորձառու է եւ 2012 թվականին մեկ հանդիպում անց է կացրել ազգային հավաքականում: Ղազախստանի հետ խաղում, սակայն, նրա հիմնական կազմում հայտվելը, կարծում ենք, քիչ հավանական է:
Դավիթ Ջալալյան