Մոսկվայում ավարտվեց Տալի հուշամրցաշարը: Երեկ տեղի ունեցան մրցաշարի վերջին տուրի հանդիպումները: Մինչև եզրափակիչ տուրի մեկնարկը` մրցաշարի գլխավոր մրցավար Անատոլի Բիխովսկին շնորհավորեց Լևոն Արոնյանին` ծննդյան 34-րդ տարեդարձի կապակցությամբ:
9-րդ տուրում Լևոն Արոնյանի մրցակիցը Վիշվանաթան Անանդն էր: Պարտիայում կիռառվեց իտալական պաշտպանություն: Այն անցավ բավականին հետաքրքիր պայքարում, սակայն կողմերից և ոչ մեկը չկարողացավ ստանալ առավելություն: 40-րդ քայլին կողմերը հաշտություն կնքեցին:
Մրցաշարի առաջատար Յան Նեպոմնյաշչին դժվարին պայքարում կարողացավ հասնել ոչ-ոքի արդյունքի Բորիս Գելֆանդի հետ պարտիայում: Անիշ Գիրին, ով մրցում էր չինացի գրոսմայստեր Չաո Լիի հետ, ուներ լավ հնարավորություն հաղթելու և միավորներով հավասարվելու Նեպոմնյաշչուն, սակայն չինացի գրոսմայստերը պաշտպանվեց շատ հստակ և պարտիան ավարտվեց ոչ-ոքի արդյունքով:
Ոչ-ոքի արդյունք գրանցվեց նաև Եվգենի Տոմաշևսկի – Պյոտր Սվիդլեր պարտիայում, իսկ տուրի միակ հաղթանակը տոնեց Շահրիյար Մամեդյարով. նրա մրցակիցն էր Վլադիմիր Կրամնիկը:
Արդյունքում մրցաշարի միանձնյա հաղթող դարձավ Յան Նեպոմնյաշչին, ով վաստակեց 6 միավոր: Անիշ Գիրին առաջատարից ետ մնաց կես միավորով և գրավեց երկրորդ հորիզոնականը, իսկ 5 միավոր վաստակած Լևոն Արոնյանը եզրափակեց լավագույն եռյակը:
