Ֆուտբոլի Հայաստանի ազգային հավաքականի բոլոր ժամանակների լավագույն ֆուտբոլիստներից մեկը՝ Ռոման Բերեզովսկին, նշանակվեց Երևանի «Փյունիկի» գլխավոր մարզիչ:
Բերեզովսկին որպես ֆուտբոլիստ հանդես է եկել «Սյունիք Կ.», «Կոսմոս Կիրովեց», «Սմենա-Սատուրն», «Զենիթ», «Տորպեդո Մ.», «Դինամո Մ.» և «Խիմկի Մ.» ակումբներում: Ռոման Բերեզովսկին ֆուտբոլիստի կարիերան ավարտել է 2015-ին: Ֆուտբոլիստի կարիերան ավարտելուց հետո մարզչական գործունեություն է ծավալել Մոսկվայի «Դինամոյում», Սոչիում և Հայաստանի հավաքականում: Ռոման Բերեզովսկուց բացի՝ «Փյունիկի» մարզչական շտաբին է միացել Սերգեյ Չիկիշևը (օգնական), ով մինչև «Փյունիկ» տեղափոխությունը մարզչական գործունեություն է ծավալել «Իրտիշ», «Տյումեն», «Սպարտակ Մ.» և «Դինամո Մ.» ակումբներում: «Փյունիկի» մարզչական շտաբում կշարունակեն մնալ Ռոբերտ Արզումանյանը, Հայկ Կիրակոսյանը և Չիրո Հոսեինի Վերդին: Ընթացիկ մրցաշրջանում Բերեզովսկին զբաղեցնում էր «Սոչիի» գլխավոր մարզչի օգնականի պաշտոնը: Նոյեմբերի 20-ին նա նշանակվեց նաև «Սոչիի» գլխավոր մարզչի պաշտոնակատար, սակայն դեկտեմբերի 8-ին ռուսական ակումբը հայտնեց Վլադիմիր Ֆեդոտովի նշանակման մասին: Բերեզովսկու գլխավորությամբ «Սոչին» Ռուսաստանի առաջնությունում անցկացրեց երկու հանդիպում՝ երկու դեպքերում էլ ոչ-ոքի՝ 1:1 խաղալով «Ուֆայի» և «Ռուբինի» հետ:
Ինչևէ, վերադառնալով Հայաստան՝ Ռոման Բերեզովսկին կարևորագույն քայլ կատարեց թե՛ իր կարիերայի և թե՛ հայկական ֆուտբոլի համար: Անցյալ տարվա հոկտեմբերին, երբ Արմեն Գյուլբուդաղյանցը հրաժարական տվեց, շատերը Բերեզովսկուն տեսնում էին մեր գլխավոր թիմի գլխավոր մարզչի ժամանակավոր պաշտոնակատարի դերում: Ռոման Բերեզովսկին երկրպագուների շրջանում ունի բանիմաց և բարձր ինտելեկտի տեր ֆուտբոլային ֆիգուրի համբավ: Բերեզովսկու կարիերայում «Փյունիկը» կարելի է համարել իրական տրամպլին:
Այսօր մենք ունենք բարձրակարգ մասնագետների մեծ կարիք: Տարիների ընթացքում մեր ազգային թիմը գլխավորել են բազմաթիվ հայաստանցի մասնագետներ, սակայն արդյունքները, մեղմ ասած, գոհացնող չեն եղել: Այս պահին վստահաբար կարող ենք ասել, որ Բերեզովսկին առաջիկա տարիներին Հայաստանի ազգային հավաքականի գլխավոր մարզչի պոտենցիալ թեկնածու է:
«Ես շատ մեծ տպավորություններով եմ հեռանում «Սոչիից»: Սոչին ոչ միայն հիանալի քաղաք է, այլ նաև հիանալի ակումբ: Ինձ համար շատ կարևոր էր, որ ծանոթացա մեծ թվով մարդկանց հետ, որոնք իրենց գործի իսկական պրոֆեսիոնալներ են։ Այնտեղ ես թրծվեցի ու էլ ավելի գնահատեցի մարդկային հարաբերությունները: Հուսով եմ, որ ապագայում «Սոչին» կհասնի մեծ բարձունքների, իսկ դրա համար բոլոր նախադրյալները կան. առաջին հերթին թիմն ունի հիանալի ղեկավարություն, հրաշալի մարզադաշտ ու ֆանտաստիկ երկրպագուներ: Եթե ես հնարավորություն ստանամ ստանձնել հայկական թիմի մարզչի պաշտոնը, կարծես թե տուն կվերադառնամ: Ֆուտբոլային իմ կյանքը սկսվել է Հայաստանում, ու այդ կապը երբեք չի խզվել: Եթե դառնամ հայկական ակումբի գլխավոր մարզիչ, շատ կուրախանամ ու կնվիրվեմ իմ գործին ինչպես հարկն է: Չէ՞ որ այդ դեպքում ես ավելի կմոտենամ ազգային հավաքականին, ու չի բացառվում, որ նաև ֆուտբոլիստ նախապատրաստեմ մեր առաջին ու ամենակարևոր թիմի համար»,- 2019 թվականի դեկտեմբերի 27-ին հայտարարել էր Բերեզովսկին:
Կարելի է ասել, որ այս հայտարարությամբ Բերեզովսկին բարձրաձայնել էր իր գլխավոր նպատակի մասին: Ինչ խոսք, Ռուսաստանում հեղինակություն վայելող մասնագետը կարող էր ավելի շահավետ պայմաններով աշխատել Պրեմիեր լիգայի ակումբներից մեկում՝ որպես երկրորդ կամ դարպասապահների մարզիչ: Բայց Բերեզովսկին ընտրեց բոլորովին այլ ուղի:
Այս որոշումն իսկապես բացառիկ է: Մոտ 20 տարի խաղալով Հայաստանի ազգային թիմում՝ Բերեզովսկին 5 մատի պես գիտի այն ճանապարհը, որ անցել ենք: Բնական է, որ անցյալից փորձն աչքի տակ ունենալով՝ Բերեզովսկին ունի նաև իր տեսլականն ազգային թիմի հետ կապված:
Հարկ ենք համարում արժանին մատուցել «Փյունիկին», որ թիմի համար ոչ այնքան բարենպաստ ժամանակաշրջանում գլխավոր մարզչի պաշտոնը վստահեց հենց Բերեզովսկուն: Հայաստանի Բարձրագույն խմբի ընթացիկ առաջնությունում 15-րդ տուրից հետո «Փյունիկը» 20 միավորով միայն 7-րդ հորիզոնականում է գտնվում:
Հիշեցնենք, որ առաջնության նոր ձևաչափի համաձայն՝ երկու շրջանների ավարտից հետո լավագույն վեցյակում տեղ զբաղեցրած թիմերը պայքարելու են մրցանակային տեղերի համար: Այս պահին «Փյունիկը» 4 միավորով զիջում է 6-րդ տեղում գտնվող «Նոա»-ին: Բնական է, որ Բերեզովսկու գլխավոր խնդիրը «Փյունիկին» լավագույն 6 թիմերի շարքում տեղ ապահովելն է: Երկրորդ շրջանի ավարտին մնացել է ընդամենը երեք տուր: