Էլբասան քաղաքի «Էլբասան Արենա» մարզադաշտի մամուլի ասուլիսների սրահում ավարտվել է Հայաստանի ազգային հավաքականի գլխավոր մարզիչ Բեռնար Շալանդի մամուլի ասուլիսը: Այդ մասին հայտնում է Հայաստանի ֆուտբոլի ֆեդերացիայի պաշտոնական կայքը:
«Իմ աշխատանքի մեջ մտնում է Ալբանիային ուսումնասիրելը: Ես դիտել եմ մեր մրցակցի մասնակցությամբ խաղեր, ներկա եմ եղել Իտալիա-Ալբանիա հանդիպմանը: Ես Շվեյցարիայից եմ, որտեղ հանդես են գալիս բազմաթիվ ալբանացիներ: Ես գիտեմ Ալբանիայի բոլոր խաղացողներին, ովքեր հանդես են գալիս են եվրոպական առաջնություններում. դա իմ աշխատանքն է»-ասաց Շալանդը, որից հետո հնչեցին հարցերը.
– Դուք համաձա՞յն եք ոչ–ոքիին:
– Ոչ. համաձայն չեմ: Միգուցե խաղից հետո այլ կարծիք հայտնեմ, բայց այս պահին գոհ չեմ: Մենք խաղալու ենք հաղթանակի համար: Մենք ունենք ընդամենը 1 միավոր, իսկ Ալբանիան՝ 4: Պետք է հաղթենք:
– Ալբանիայի կազմում ո՞ր խաղացողներից եք վախենում:
– Ես չեմ վախենում, ես հարգում եմ: Ես գիտեմ, որ Դե Բիազին հիանալի աշխատանք է կատարել, լավ թիմ է ստեղծել: Կան հիանալի խաղացողներ՝ Կանան, Գաշին, Չակա: Ինձ համար կարևոր է թիմը, ոչ թե անհատները: Կարևոր է, թե ինչպես է թիմը գործում, այլ ոչ թե առանձին անհատները:
– Ի՞նչ կարող եք ասել Գաել Անդոնյանի մասին: Արդյո՞ք նա կարող է վաղը խաղաժամանակ ստանալ:
– Ես չեմ կարող ինֆորմացիա տալ կազմի մասին: Անդոնյանը լավ երիտասարդ խաղացող է և կլինի հայտացուցակում: Նույնը կարող եմ ասել Ռուսլան Կորյանի մասին: Ես նրան տեսել էի դեռևս Թուրքիայում, երբ նա «Լոկոմոտիվ»-ի կազմում ժամանել էր հավաքների: Նա լավ խաղացող է և կարող է օգուտ տալ:
– Եթե Հայաստանը վաղը պարտվի, Դուք կթողնե՞ք պաշտոնը:
-Այդ հարցը ինձ չպետք է ուղղել: Ներկայումս ես եմ մարզիչը, ես կատարում եմ իմ աշխատանքը: Իմ գլխում այժմ մի բան է. ինչպե՞ս հաղթել Ալբանիային: Իմ խնդիրը ընտրական փուլի արգելքը հաղթահարելն է: Իմ ապագան այդքան կարևոր չէ, որքան թիմի ապագան:
Ես գիտեմ, որ Դե Բիազին մարզիչների «կիլլեր» է, բայց ես չեմ վախենում:
– Ի՞նչ կասեք վաղվա մարտավարության մասին:
– Մամուլի ասուլիսին ես այդ մասին չեմ խոսում:
– Արդյո՞ք սա Հայաստանի լավագույն թիմն է 1992 թվականից սկսած:
– Ես չեմ կարող ասել: Այո, մենք ունենք լավ խաղացողներ, բայց ես մեկ տարի եմ Հայաստանում և չեմ կարող հստակ ասել:
