Վերջին 10 օրերի ընթացքում «Չելսի»-ի սեփականատեր Ռոման Աբրամովիչը 3 անգամ հանդիպել է թիմի գլխավոր մարզիչ Անդրե Վիլլաշ-Բոաշի հետ և հայտնել իր դժգոհությունը` կապված թիմի ցույց տված արդյունքների հետ: Daily Telegraph-ը տեղեկացնում է, որ թիմը ճգնաժամից դուրս բերելու համար ռուս միլիարդատերը պորտուգալացի մասնագետին հատկացրել է 1 շաբաթ ժամանակ: Այլապես Վիլլաշ-Բոաշը կհեռացվի «արիստոկրատներ»-ի գլխավոր մարզչի պաշտոնից:
Առաջիկա երկու խաղերում մայրաքաղաքային ակումբն իր ուժերը չափելու է «Բիրմինգհեմ»-ի (Անգլիայի Գավաթի խաղարկության շրջանակներում) և «Նապոլի»-ի (Չեմպիոնների Լիգայի Գավաթի խաղարկության 1/8 եզրափակիչի շրջանակներում) հետ: Այդ խաղերում անհաջողության մատնվելը կնշանակի, որ «Չելսի»-ն գործնականում կզրկվի ընթացիկ մրցաշրջանում տիտղոսներ նվաճելու հնարավորությունից:
Հիշեցնենք, որ Անգլիայի Պրեմիեր Լիգայի իր վերջին խաղում «Չելսի»-ն մրցակցի հարկի տակ 2:0 հաշվով պարտվեց «Էվերթոն»-ին: