Հայկական արմատներ ունեցող ռուսաստանցի ֆուտբոլիստ Արսեն Զախարյանը բացառում է ՀՀ քաղաքացիություն ստանալու տարբերակը:
«Արմենպրես»-ի հաղորդմամբ` «Вышли!» յութուբյան ալիքին տված մեկնաբանությունում Զախարյանը շեշտել է, որ տեսել է համացանցում տարածված լուրերը Հայաստանի քաղաքացիություն ստանալու տարբերակի մասին, որը կհեշտացնի նրա տեղափոխությունն անգլիական «Չելսի»:
«Քաղաքացիություն փոխել պետք չէ, ինչ-որ զրույցներ են, ես ոչինչ չեմ արել։ Հայաստանի անձնագիր ստանալու մտադրություն առայժմ չունեմ»,-ասել է նա:
Նախորդ տարվա սեպտեմբերին հայտնի էր դարձել, որ հայկական արմատներով ռուսաստանցի ֆուտբոլիստ Արսեն Զախարյանը չի տեղափոխվի Լոնդոնի«Չելսի»: Զախարյանի տեղափոխությունն անգլիական ակումբ չէր կայացել Ռուսաստանի Դաշնության դեմ գործող պատժամիջոցների պատճառով: Արսեն Զախարյանի ներկայիս պայմանագիրը Մոսկվայի «Դինամո»-ի հետ նախատեսված է մինչև 2024 թվականը: 2021 թվականին Զախարյանը նորամուտն է նշել Ռուսաստանի ֆուտբոլի ազգային թիմի կազմում և մինչ օրս անցկացրել է 4 հանդիպում:
