Ֆուտբոլի Չեմպիոնների լիգայի խմբային փուլի 4-րդ տուրում Միլանի «Ինտերը» «Կամպ նոու» մարզադաշտում դրամատիկ պայքարում ոչ-ոքի 3։3 խաղաց «Բարսելոնայի» հետ։ Հիշեցնենք, որ այս թիմերի միջև մեկ շաբաթ առաջ Միլանում տեղի ունեցած մրցավեճում «Ինտերը» առավելության էր հասել 1։0 հաշվով։ Երեկվա խաղում հաշիվը բացվեց առաջին կեսի ավարտից 5 րոպե առաջ։ Իսպանական թիմի կազմում աչքի ընկավ Դեմբելեն։ Երկրորդ կեսի սկզբնամասում՝ 50-րդ րոպեին, Բարելան հավասարեցրեց հաշիվը։ 13 րոպե անց Լաուտարոն առաջ մղեց միլանյան թիմին։ 82-րդ րոպեին Լևանդովսկին կրկին հավասարեցրեց հաշիվը։ Խաղի հիմնական ժամանակի ավարտից մեկ րոպե առաջ Գոսենսը նորից առավելությունը տվեց միլանցիներին, բայց ավելացված երկրորդ րոպեին Լևանդովսկին կրկին փրկեց իր թիմին՝ հաշիվը դարձնելով 3։3: «Բարսելոնայի» դեմ դիմակայության երկու մրցավեճերին առանց փոխարինման մասնակցեց Հայաստանի ազգային հավաքականի նախկին ավագ Հենրիխ Մխիթարյանը։ Երկու դեպքերում էլ հայաստանցի ֆուտբոլիստն աչքի ընկավ գրագետ և բարձր որակի խաղով։ Մխիթարյանը կարող էր դառնալ նաև դիմակայության իրական հերոսը, բայց․․․։
94-րդ րոպեին միլանյան ակումբը հակագրոհ ձեռնարկեց, Քրիստիան Ասլանին ու Հենրիխ Մխիթարյանը միասին դուրս եկան դարպասապահի դեմ, սակայն ալբանացի ֆուտբոլիստը ժլատություն անեց ու հարվածեց դարպասին։ «Բարսելոնայի» դարպասապահ Տեր Ստեգենի փրկեց իր թիմին մինչ դեռ Մխիթարյանը գտնվում էր 100 տոկոսանոց գոլային դիրքում։ Տեղի ունեցածը ֆուտբոլայի տգեղ դրսևորում էր, որը «հարված» հասցրեց թե Մխիթարյանին և թե «Ինտերին»։ Վերջինս երեկ հաղթելու դեպքում ժամանակից շուտ կնվաճեր 1/8-րդ եզրափակչի ուղեգիր և հնարավորություն կստանար պայքարելու առաջին հորիզոնականի համար։ Ալբանացու ժլատության հետևանքով իտալական թիմը փլեյ-օֆֆի ուղեգիր նվաճելու համար պետք է հոկտեմբերի 26-ին կայանալիք 5-րդ տուրում սեփական հարկի տակ հաղթի Չեխիայի չեմպիոն Պլզենի «Վիկտորիային»։ Այս պահին C ենթախումբը 12 միավորով գլխավոր է «Բավարիան», որը ապահովել է մասնակցությունը 1/8-րդ եզրափակչում։ «Ինտերը» 7 միավորով 2-րդն է, իսկ «Բարսելոնան՝ 4 միավորով 3-րդը։ 4-րդ տեղում գտնվող «Վիկտորիային» չի հաջողվել միավոր վաստակել։ Ինչևէ, արձանագրենք թերևս հետևյալը, 33-ամյա Մխիթարյանը փայլուն ֆուտբոլ է ցուցադրում «Ինտերում» և մասնավորապես Չեմպիոնների լիգայում։ «Բարսելոնայի» դեմ դիմակայությունում տեղի ունեցավ նաև Մխիթարյանի բենեֆիսը։ «Մխիթարյանը շատ լավ մտավ փոխարինման։ Դա կարևոր պահ էր, որն օգնեց մեզ։ Երկրորդ խաղակեսի սկզբում տեխնիկապես լավ չէինք գործում, բայց մրցակցի գոլից հետո ավելացրեցինք։ Մխիթարյանը մեր տարբերակներից մեկն է։ Նա խելացի խաղացող է։ Այսօր նա դաշտի կենտրոնում արեց ինչ, ինչ ես իրեն խնդրել էի։ 2։1 հաշվի ժամանակ փոխարինեցի հարձակվողներից մեկին, որպեսզի թիմը շատ չհոգնի։ Գիտեք, որ մի քանի խաղացողներ շարքից դուրս են մնացել։ «Ռոմայի» հետ խաղից հետո ես գտա այն թիմը, որը փնտրում էի։ «Բարսելոնայի» և «Սասուոլոյի» նկատմամբ տարած հաղթանակները անկյունաքարային են թիմի համար»,- Իտալիայի Ա սերիայի 9-րդ տուրի «Սասուոլոյի» դեմ խաղից հետո ասել էր «Ինտերի» գլխավոր մարզիչ Սիմոնե Ինձագին։
Վերջինիս խոսքերը վկայում են, որ Մխիթարյանը կարժ ժամանակում դարձել է միլանյան թիմի առանցքային ֆիգուրներից մեկը։ «Մեր մրցակիցն ուժեղ էր, և մենք ցանկություն ունեինք ապացուցելու նաև մեր ուժեղ լինելը՝ հաշվի առնելով վերջին հանդիպումները: Կարևոր հաղթանակ տոնեցինք` ցույց տալով ներքին ուժ, լավագույն որակներ:
Այս հաղթանակը վերադարձրեց մեր վստահությունը»,- «Սասուլոյի» դեմ խաղից հետո ասել էր Մխիթարյանը։ Հիշեցնենք, որ այս մրցավեճում «Ինտերին» հաղթանակ էր պարգևել բոսնիացի հարձակվող Էդին Ջեկոն։ Վերջինիս գոլային փոխանցում էր կատարել հենց Մխիթարյանը։ Ա սերիայում «Ինտերը» հաջորդ հանդիպումը կանցկացնի հոկտեմբերի 16-ին սեփական հարկի տակ մրցելով «Սալերտինայի» հետ։
