Ֆուտբոլի Հայաստանի հավաքականը վաղը Վելիկա Գորիցա քաղաքում ընկերական հանդիպում կանցկացնի աշխարհի փոխչեմպիոն Խորվաթիայի հետ։ Երեկ մեր թիմն առաջին մարզումն է անցկացրել Զագրեբում, որին մասնակցել է 22 ֆուտբոլիստ։ Վարազդատ Հարոյանը նույնպես միացել է հավաքական, սակայն իր թիմի՝ «Աստանայի» կազմում ստացած վնասվածքի պատճառով բաց է թողել մարզումը: Հարոյանի մասնակցությունը Խորվաթիայի դեմ հանդիպմանն այս պահին հարցականի տակ է: Ամեն ինչ պարզ կդառնա այսօրվա բուժզննումից հետո:Հաշվի առնելով հավաքական ժամանած ֆուտբոլիստների տարբեր մարզավիճակը՝ հավաքականի ֆիզպատրաստության մարզիչ Խավիեր Մինյանոն տարբեր առաջադրանքներ է տվել մի շարք խաղացողների: VBET Հայաստանի Պրեմիեր Լիգայի վերջին տուրին մասնակցած, ինչպես նաև մայիսի 28-29-ին իրենց առաջնություններում հանդիպումներ անցկացրած ֆուտբոլիստները մարզվել են թեթև՝ խնայողական ռեժիմով: Մնացած ֆուտբոլիստները մարզվել են սովորական ռեժիմով: Վաղվա խաղին վատառողջ լինելու պատճառով չի մասնակցի Գևորգ Ղազարյանը։ Վնասվածքի պատճառով հավաքականին չի միացել նաև «Ալաշկերտի» կիսապաշտպան Դավիդ Դավիդյանը։
Վերջին պահին հավաքական են հրավիրվել «Ռիգայի» կիսապաշտպան Էդգար Բաբայանը և «Նոայի» պաշտպան Ժոաո Արարատը։ «Առաջիկա երկու հանդիպումները շատ կարևոր են: Մրցելու ենք թիմերի դեմ, որոնք պատրաստվում են Եվրոպայի առաջնությանը՝ նախապատրաստվելով սեպտեմբերին կայանալիք պաշտոնական հանդիպումներին: Երբ խաղում է ազգային հավաքականը, չկան ընկերական հանդիպումներ. բոլոր խաղերն էլ կարևոր են, քանի որ մենք ներկայացնում ենք ազգը և երկիրը»,- նախօրեին ասել էր մեր հավաքականի գլխավոր մարզիչ Խոակին Կապառոսը։ Վերջինս տակտիկական նկատառումներով այս անգամ հավաքական չի հրավիրել Հենրիխ Մխիթարյանին, Հովհաննես Համբարձումյանին, Ալեքսանդր Կարապետյանին, Նորբորտո Բրիասկո Բալեկյանին և էլի մի քանի ֆուտբոլիստների։ Կարծում ենք պարզ է, որ վաղվա խաղում խաղադաշտում կտեսնենք թե տակտիկական և թե կադրային նոր լուծումներ։ Ինչ խոսք կարևոր է նաև արդյունքը, բայց․․․․։ Խոակին Կապառոսը նախորդ հանդիպումներում ձևավորել է խաղային մեխանիզմ, որը գործում է արդյունավետ։ Ընկերական հանդիպումների միջոցով Կապառոսը կփորձի նոր էլեմենտներ հաղորդել այդ մեխանիզմին։ Նախորդ երեք հանդիպումներում փոխարինման դուրս գալով գերազանց խաղ ցուցադրեցին կիսապաշտպաններ Ժիրայր Շաղոյանն ու Էդուրարդ Սպերցյանը։
Հավանականությունը մեծ է, որ այս ֆուտբոլիստները վաղն ավելի շատ խաղաժամանակ կստանան։ Չի բացառվում, որ այս խաղացողներին տեսնենք մեկնարկային կազմում։ Նախորդ հանդիպումներում ըստ էության խաղաժամանակ չէր ստացել «Ժիլինայի» կիսապաշտպան Վահան Բիչախչյանը։ Վերջինս ևս ամենայն հավանականությամբ վաղը կլինի դաշտում։ Հիշեցնենք, որ հունիսի 5-ին էլ մեր հավաքականը Շվեդիայում ընկերական հանդիպում է անցկացնելու այս երկրի ազգային թիմի հետ։ Հաջորդ պաշտոնական հանդիպումը Կապառոսի թիմը կանցկացնի առաջիկա սեպտեմբերին՝ հյուրընկալվելով Հյուսիսային Մակեդոնիային։ Այս մրցավեճին որակազրկման պատճառով չեն մասնակցի Վարազդատ Հարոյանը, Խորեն Բայրամյանը և Տիգրան Բարսեղյանը։ Առաջիկա ընկերական հանդիպումներին Կապառոսը պետք է լուծումներ գտնի նաև կադրային այս խնդիրը լուծելու համար։ Ինչևէ, ինչ արդյունք կարելի է ակնկալել մեր հավաքականից վաղվա խաղում։ Մրցելու ենք աշխարհի ուժեղագույն հավաքականներից մեկի հետ, որն ունի հզոր կազմ։ Խորվաթիան, այո, ֆավորիտ է և այս հավաքականի հաղթանակի հնարավորությունը բուքմեյքերներն անհամեմատ ավելի բարձր են գնահատում։
Անկախ փորձարկումներից և տակտիկական խնդիրներից, Հայաստանի ազգային հավաքականը վաղը պետք է պայքարի հաղթանակի համար։ Ինչպես նշել էր Կապառոսը, երբ խաղում է ազգային հավաքականը ընկերական հանդիպումներ գոյություն չունեն։ Ազգային հավաքականը ներկայացնում է պետություն, ներկայացնում է ազգին։ Կապառոսի այս փիլիսոփայությունը նպաստեց, որ մեր գլխավոր թիմը փայլուն ելույթներ ունենա Ազգերի լիգայում և աշխարհի առաջնության ընտրական փուլում։ Վստահ ենք, որ վաղը ևս մեր հավաքականը արժանապատիվ խաղ կցուցադրի։
