Ֆուտբոլի Հայաստանի ազգային հավաքականի վերջին հաջողություններին զուգահեռ տեղի են ունենում կարևոր զարգացումներ, որոնք դրական երանգներ են հաղորդում հայկական ֆուտբոլին։ Խոսքը վերաբերվում է արտերկրում հանդես եղող մեր ֆուտբոլիստների առաջխաղացումներին։ Այսօր ունենք միանգամայն դրական պատկեր, մասնավորապես եվրոպական ակումբային ֆուտբոլի կտրվածքով։ Եվ այսպես․ եվրոպական թոփ 5 առաջնություներից չորսում ունենք ներկայացուցիչներ (Իտալիա, Իսպանիա, Անգլիա, Ֆրանսիա, Գերմանիա)։ Իտալիայի Ա սերիայում ընթացիկ մրցաշրջանում ելույթ է ունենում Հայաստանի ազգային հավաքականի ավագ Հենրիխ Մխիթարյանը։
Վերջինս «Ռոմայի» կազմում գոլ + գոլային փոխանցում հաշվարկում տևական ժամանակ առաջատարների շարքում էր ոչ միայն Իտալիայում այլ թոփ 5 լիգաներում։ Գերմանական Բունդեսլիգայում Հայաստանը ներկայացնում է Սարգիս Ադամյանը, որը ելույթ է ունենում «Հոֆենհայմում»։ Նախորդ մրցաշրջանում ստացած ծանր վնասվածքից հետո Ադամյանն ընթացիկ մրցաշրջանում սովորաբար մնում է պահեստայինների նստարանին։ Փոխարենը Ադամյանը լավ ելույթով աչքի ընկավ Հայաստանի ազգային հավաքականի կազմում նպաստելով մարտին գրանցված երեք կարևոր հաղթանակներին։ Նախորդ տարվա դեկտեմբերին Իսպանիայի լա Լիգայում նորամուտը նշեց «Լևանտեի» 19-ամյա կիսապաշտպան Էդգար Սևիկյանը։ Մամուլում տարածված տեղեկությունների համաձայն՝ Հայաստանի ֆուտբոլի ֆեդերացիան բանակցում է այս ֆուտբոլիստի հետ և ՀՀ քաղաքացիություն ստանալուն պես առաջիկա ամիսներին Սևիկյանը պաշտոնապես կդառնա Հայաստանի ազգային թիմի ֆուտբոլիստ։ Եվ վերջապես, նախօրեին Ֆրանսիայի Լիգա 1-ում ելույթ ունեցող «Նանտում» հայտնվեց կիսապաշտպան Գոռ Մանվելյանը։
Նա մինչ այս ելույթ էր ունենում «Նանտի» երիտասարդական թիմում, սակայն արդյունավետ ելույթներից հետո պրոֆեսիոնալ պայմանագիր կնքեց հիմնական թիմի հետ։ Մանվելյանի՝ Հայաստանի հավաքականին միանալու վերաբերյալ դեռևս տեղեկություններ չկան։ Կարծում ենք սակայն այս ֆուտբոլիստը ևս Հայաստանի ազգային թիմի գլխավոր մարզիչ Խոակին Կապառոսի տեսադաշտում է և նրան ևս կարելի է համարել մեր գլխավոր թիմի իրական թեկնածու։ Փաստորեն հայ ֆուտբոլիստ չկա թերևս Անգլիայի Պրեմիեր լիգայում։ Այսօր կան իրական նախադրյալներ, որ մոտ ապագայում Հայաստանի ազգային հավաքականում ելույթ ունենան ֆուտբոլիստներ, որոնք ներկայացնում են Եվրոպական թոփ 4 առաջնությունները։ Ուրախալի, որ նշված 4 ֆուտբոլիստներից 2-ը՝ Սևիկյանը և Մանվելյանը, ընդամենը 19 տարեկան են և ունեն հնարավորություն ամրապնդվելու աշխարհի ուժեղագույն առաջնություններում։ Հայաստանի ազգային հավաքականում անցկացրած գերազանց հանդիպումներից հետո տեղեկություն տարածվեց, որ իսպանական տիտղոսակիր ակումբներից «Սևիլիան» հետաքրքրված է Երևանի ԲԿՄԱ-ի 20-ամյա կիսապաշտպան Ժիրայր Շաղոյանի ծառայություններով։
Հիշեցնենք, որ Խոակին Կապառոսը երկար տարիներ աշխատել է այս թիմում՝ զբաղեցնելով նաև գլխավոր մարզչի պաշտոնը։ Այսինքն չի բացառվում նաև, որ այս տարի թոփ առաջնություններում ելույթ ունեցող հայ ֆուտբոլիստների թիվն ավելանա։