Անցյալ տարվա մարտին իտալական մամուլում տեղեկություն տարածվեց, որ արգենտինական «Ուրականի» և Հայաստանի ազգային հավաքականի հարձակվող Նորբերտո Բրիասկո Բալեկյանը կարող է կարիերան շարունակել եվրոպական գրանդ ակումբներից մեկում՝ «Միլանում»։ Խոսվում էր, որ արդեն ամառային տրանսֆերային պատուհանի ժամանակ մեր հավաքականի ֆուտբոլիստը կարող է տեղափոխվել տիտղոսակիր թիմ։
«Այո, «Միլանը» կապ է հաստատել ինձ հետ, բայց չեմ ցանկանում ժամանակից շուտ ինչ-որ բան ասել։ Հիմա կենտրոնացած եմ իմ ակումբի՝ «Ուրականի» վրա, այնուհետև կտեղափոխվեմ Եվրոպա։ Կարծում եմ՝ ակումբը դեմ չի լինի, որ ես ցանկություն ունենամ հեռանալու»,- նշել էր Բալեկյանը։
Վերջինս նշել էր նաև, որ իր գործակալը գտնվում է Միլանում, և հավանականությունը մեծ է, որ գործարքը կկայանա։ Կարճ ժամանակ անց, սակայն, Բալեկյանի տեղափոխության վերաբերյալ խոսակցությունները դադարեցին։ «Միլանը», որը վերջին տարիներին լուրջ արդյունքներ չի գրանցել, ամառային տրանսֆերային պատուհանի ընթացքում զգալիորեն ուժեղացրեց կազմը այլ բարձրակարգ ֆուտբոլիստներով։ Այսօր «Միլանում» է նաև լեգենդար հարձակվող Զլատան Իբրահիմովիչը։ Իտալական մամուլը գրում էր, որ Իբրահիմովիչը չի ցանկանում երկարաձգել պայմանագիրը «Միլանի» հետ։ Նույն աղբյուրի համաձայն էլ՝ իտալական ակումբի ղեկավարությունը որպես Իբրահիմովիչի փոխարինող դիտարկում էր հենց Բալեկյանի թեկնածությունը։
Վերջին շրջանում հայ հարձակվողն ամրապնդվել էր իր թիմի հիմնական կազմում և ելույթ է ունենում կենտրոնական հարձակվողի դիրքում: Նշենք, որ «Ուրականը» սովորաբար խաղում է 4-2-3-1 մարտավարությամբ, և հայ հարձակվողի դերը բավական մեծ է։ Հայ հարձակվողը ուշադրության կենտրոնում էր հայտնվել հատկապես այն բանից հետո, երբ նրա մասին խոսել էր 20-րդ դարի լավագույն ֆուտբոլիստներից լուսահոգի Դիեգո Մարադոնան։ Վերջինս, որը գլխավորում էր արգենտինական «Խիմնասիա Լա-Պլատա» ակումբը, անցյալ տարվա փետրվարին «Ուրականի» դեմ Արգենտինայի առաջնության 18-րդ տուրի հանդիպումից հետո գովեստի խոսքեր է հնչեցրել Բալեկյանի հասցեին։ «Նա հիանալի խաղացող է։ Բալեկյանը մրցակցի տուգանային հրապարակում նման է գազանի։ Նորբերտոն այսօր փայլուն հանդիպում անցկացրեց և մեծ խնդիրներ ստեղծեց մեզ համար»,- նշել էր Մարադոնան։
Ինչևէ, այսօր արդեն կարող ենք փաստել, որ հավանականությունը մեծ է, որ Բալեկյանը մոտ ժամանակներս կհայտնվի թոփ ակումբում։ Արգենտինական ԶԼՄ-ները, անդրադառնալով հայ հարձակվողի հնարավոր տրանսֆերին, նշել են, որ Բալեկյանն ընդգրկվել է այն 100 ֆուտբոլիստների ցուցակում, որտեղից «Միլանը» պետք է ընտրի ուժեղագույններին։ Ըստ արգենտինական ԶԼՄ-ների՝ դա ապացույցն է Բալեկյանի մեծ պոտենցիալ ունեցող հարձակվող լինելու։
Եվ ահա, արգենտինական մամուլում տեղեկություն է տարածվել նաև, որ Բալեկյանի ծառայությունով հետաքրքրված է հանրահայտ «Ռիվեր Փլեյթ» ակումբը։ Վերջինս, ի տարբերություն «Միլանի», վերջին տարիներին կայուն կերպով ելույթ է ունենում թե՛ Արգենտինայի առաջնությունում և թե՛ Լատինական Ամերիկայի գավաթային մրցաշարերում։ Հավանականությունը մեծ է, որ Բալեկյանը մոտ ժամանակներս փորձաշրջան կանցնի «Ռիվեր Փլեյթում»։
Հայաստանի ազգային հավաքականի կազմում Բալեկյանն անցկացրել է ընդամենը 4 հանդիպում։ Պետք է խոստովանենք, որ այս ֆուտբոլիստի խաղը մեր հավաքականում չի տպավորել, և ֆուտբոլասերներից շատերը մեծ հույսեր չէին կապում Բալեկյանի հետ։ Վերջինս առաջին անգամ Հայաստանի ազգային հավաքական էր հրավիրվել 2018 թվականի մարտին և մասնակցել Էստոնիայի ու Լիտվայի հետ ընկերական հանդիպումներին։ Բալեկյանին հրավիրել էր մեր հավաքականի նախկին գլխավոր մարզիչ Արթուր Պետրոսյանը։ Բալեկյանին Հայաստանի հավաքական էր հրավիրել նաև մեկ այլ գլխավոր մարզիչ՝ Արմեն Գյուլբուդաղյանցը։ Մասնավորապես, Բալեկյանը մասնակցել էր 2020 թվականի Եվրոպայի առաջնության ընտրական փուլի մեկնարկային Բոսնիա-Հերցեգովինայի հետ արտագնա հանդիպմանը, ինչպես նաև այս խաղին հաջորդած Ֆինլանդիայի հետ երևանյան մրցավեճին։
Հայաստանի ազգային հավաքականի ներկայիս գլխավոր մարզիչ Խոակին Կապառոսը Բալեկյանին հրավիրել էր Ազգերի լիգայի խաղարկության մեկնարկային՝ Հյուսիսային Մակեդոնիայի և Էստոնիայի հետ հանդիպումներին։ Մասնավորապես, Հյուսիսային Մակեդոնիայի դեմ մրցավեճում Բալեկյանը, խաղալով հանդիպման վերջին 15 րոպեներին, վատ տպավորություն չէր թողել։ Կապառոսը Բալեկյանին հրավիրել էր նաև մյուս հանդիպումներին, սակայն կորոնավիրուսի համավարակի պատճառով հավաքականին նրա միանալը չէր ստացվել։
Փաստ է, որ Յուրա Մովսիսյանից հետո մեր հավաքականը չունի բարձրակարգ կենտրոնական հարձակվող, որի միջոցով հնարավոր կլինի արդյունավետ կառուցել խաղը առջևի գծում։ Չենք կասկածում, որ այս պահին Հայաստանի հավաքականի մարզչական շտաբի կողմից հարձակման գիծը կարգի բերելու գործընթացում դիտարկվում է Բալեկյանի տարբերակը։