Եվրոպական ֆուտբոլը կարծես թե վերակենդանանում է համավարակի հետևանքով հայտարարված դադարից հետո։ Թոփ երկրներից Իտալիայում, Անգլիայում, Գերմանիայում և Իսպանիայում 2019/2020 մրցաշրջանը ավարտին կհասցվի։ Երեկ հայտնի դարձավ, որ անգլիական Պրեմիեր լիգան ներկայացնող ակումբները կողմ են մրցաշրջանը վերսկսելուն: Այս մասին գրում են բրիտանական ԶԼՄ-ները: Այժմ Պրեմիեր լիգայի կազմակերպիչները աշխատանքներ են տանում կառավարությունից թույլտվություն ստանալու ուղղությամբ: Արդեն վաղվանից Իտալիայում մարզիկները անհատական մարզումներ անցկացնելու իրավունք կունենան։ Մայիսի 18-ից էլ արդեն ակումբները հնարավորություն կունենան մարզումներ անցկացնելու։
Ըստ իտալական ԶԼՄ-ների Իտալիայի առաջնությունները վերսկսվելու են հունիսի 14-ից ոչ ուշ։ Կորոնավիրուսի պանդեմիայի պատճառով Իտալիայի առաջնությունը դադարեցվել է մարտի 13-ին: Իսպանիայի վարչապետ Պեդրո Սանչեսը նախօրեին նշել էր, թե ինչպես կընթանա հետկարանտինային մարզումային շրջանը: Մայիսի 4-ից ֆուտբոլիստները կարող են սկսել անհատական մարզումները, մայիսի 18-ից ակումբները կարող են ոչ մեծ խմբերով անցնել ընդհանուր մարզումների: Իսկ ահա արդեն հունիսի 1-ից թիմերին կթույլատրվի ընդհանուր մարզումը: Լա լիգան կարող է վերսկսվել հունիսի 5-ին կամ հունիսի 12-ին: Ինչ վերաբերում է Գերմանիային, ապա այս երկրում առաջնությունը պետք է վերսկսվեր արդեն մայիսի 9-ին։ Գերմանիայի առողջապահության նախարարությունը հանդես է եկել հայտարարությամբ, ըստ որի մայիսի 9-ից հնարավոր կլիներ վերսկսել Բունդեսլիգան: Գերմանական մի շարք ակումբներ վերսկսել էին մարզումներն իրենց բազաներում: Խաղերը պետք է անցկացվեին առանց հանդիսականների, ակումբներից յուրաքանչյուրից մարզադաշտում կլինի 126 անձ, այդ թվում՝ֆուտբոլիստները: Վերջին պահին, սակայն Գերմանիայի կառավարությունն անորոշ ժամանակով հետևաձգեց առաջնությունը։ Գերմանիայի կանցլեր Անգելա Մերկելը իր հայտարարությունում հատուկ անդրադառնալով մարզական միջոցառումներին նշել էր, որ բոլոր զանգվածային հանդիպումները, փառատոններն ու խաղերը չեն կայանա նվազագույնը մինչև օգոստոսի վերջ: Իր հերթին կանցլերը նշել է նաև, որ մոռացությանն չի մատնել կիսատ մնացած գլխավոր իրադարձությունը՝ Բունդեսլիգան: Մերկելը հավաստիացրել է, որ, այս կապակցությամբ որոշում կկայացվի մայիսի 6-ին:
Փաստորեն Բունդեսլիգայի վերաբերեյալ Գերմանիայի կառավարությունը կնդունի հատուկ որոշում հնարավորություն տալով ավարտին հասցնել այն։ Այսօր հայտնի դարձավ, որ Եվրոպական մի քանի երկրներում ևս կվերսկսեն կորոնավիրուսի պանդեմիայի պատճառով ընդհատված առաջնությունները:Մասնավորապես, Դանիայի և Լեհաստանի ֆուտբոլի ֆեդերացիաները հայտարարել են մրցաշրջանը ավարտին հասցնելու որոշման մասին: Լեհաստանում առաջնությունը կվերսկսվի մայիսի 27-ին, իսկ Դանիայում` մայիսի 29-ին:Դանիայի առաջնությունում է հանդես գալիս Հայաստանի ֆուտբոլի ազգային թիմի կիսապաշտպան Էդգար Բաբայանը: Օրեր առաջ էլ տեղի էր ունեցել ՀՖՖ գործադիր կոմիտեի հերթական նիստը, որի ընթացքում քննարկվել էին ՀՀ Բարձրագույն և Առաջին խմբերի առաջնությունների, ինչպես նաև Գավաթի խաղարկության վերսկսման և ընթացիկ մրցաշրջանի ավարտի հնարավոր ժամկետները: Քննարկման արդյունքում մշակվել են առաջնությունների ժամկետների և ձևաչափերի հնարավոր փոփոխման մի քանի նախնական՝ աշխատանքային տարբերակներ:
ՀՖՖ աշխատակազմին առաջարկվեց մոտակա օրերի ընթացքում նշված նախնական տարբերակները քննարկել ՀՀ պարետատան հետ: Գործադիր կոմիտեի հաջորդ նիստի ընթացքում կներկայացվեն պարետատան հետ քննարկման արդյունքները, ինչի հիման վրա կկայացվի առաջնությունների վերսկսման հետ կապված վերջնական որոշում: Դիտարկվում են ՀՀ առաջնությունների վերսկսման հետևյալ հնարավոր ժամկետները. հունիսի սկիզբ և հունիսի վերջ՝ կախված ՀՀ տարածքում արտակարգ դրության հնարավոր ավարտից կամ վերջինիս ժամկետների հնարավոր երկարացումից:Հիշեցնենք, որ պարետատունը ապրիլի 23-ից թույլատրել էր հայկական ակումբներին վերսկսել մարզումները։ Անդրադառնանք նաև այն երկրներին, որոնք պաշտոնապես որոշել են չվերսկսել առաջնությունները։ Արդեն կան 3 արդպիսի երկրներ՝ Հոլանդիան, Բելգիան և Ֆրանսիան։ Սա լուրջ հարված է հատկապես ՈՒԵՖԱ-ին, որը ամեն գնով ցանկանում է մինչև օգոստոս ավարտել 2019/2020 մրցաշրջանը և անմիջապես սկսել հաջորդ մրցաշրջանը։
Հիշեցնենք, որ ավելի վաղ ՈՒԵՖԱ-ն իր անդամ երկրների համար վերջնաժամկետ էր սահմանել ազգային առաջնություններն ավարտելու համար։ Մասնավորապես, մինչև հուլիսի 31-ը եվրոպական կառույցի անդամ երկրները պետք է ավարտին հասցնեն ներքին առաջնությունները։