Ամառային տրանսֆերային պատուհանի ընթացքում Ֆուտբոլի Հայաստանի ազգային հավաքականի ավագ Հենրիխ Մխիթարյանի՝ Լոնդոնի «Արսենալ»-ից իտալական «Ռոմա» տեղափոխությունը քննարկման լայն առարկա էր դարձել հասարակության շրջանում: Հիշեցնենք, որ Մխիթարյանը «Ռոմա»-ին միացել է մեկ տարվա վարձակալությամբ, ինչից հետո հռոմեական ակումբը ֆուտբոլիստի ամբողջական տրանսֆերն «Արսենալ»-ից գնելու իրավունք կստանա: Նշվում էր, որ Մխիթարյանը «Ռոմա»-ում կստանա տարեկան 3.5 միլիոն եվրո աշխատավարձ: Ըստ բրիտանական մամուլի՝ հայ ֆուտբոլիստը «Արսենալ»-ում ստանում էր շաբաթական 180 հազար ֆունտ աշխատավարձ: Ակնհայտ է, որ ֆինանսական տեսանկյունից Մխիթարյանի Ա սերիա տեղափոխվելը հետքայլ էր: Մարզական տեսանկյունից, սակայն, մեր ֆուտբոլիստի առաջ բացվում է միանգամայն նոր հորիզոն:
Մխիթարյանը հայաստանցի այն բացառիկ ֆուտբոլիստն է, որ խաղաց եվրոպական թոփ առաջնություններից 3-ում՝ Բունդեսլիգայում, Պրեմիեր լիգայում և Ա սերիայում: Գերմանիայում Մխիթարյանը փայլեց, Անգլիայում նրա ելույթն ավելի համեստ էր, և հիմա հերթը Իտալիայինն է:
Ինչևէ, մրցաշրջանի մեկնարկից առաջ կայացած ուսումնամարզական հավաքի ընթացքում Ունայ Էմերիի թիմն անցկացրեց մի քանի տպավորիչ հանդիպումներ՝ տանելով նաև համոզիչ հաղթանակներ: Հավաքի ժամանակ, կարծում ենք, բոլորն էին համոզվել, որ Մխիթարյանը շարունակում էր մնալ թիմի առանցքային ֆիգուրներից մեկը: Խոսվում էր այն մասին, որ մեկնարկելիք մրցաշրջանում մեր ֆուտբոլիստը կշարունակի ելույթները լոնդոնյան թիմում: Տրանսֆերային պատուհանի բացվելուն պես «Արսենալ»-ում լարված իրավիճակ էր ստեղծվել: Մասնավորապես, նշվում էր, որ «Արսենալ»-ի ղեկավարությունը ընդամենը 45 միլիոն ֆունտ է հատկացրել գլխավոր մարզիչ Ունայ Էմերիին նոր ֆուտբոլիստներ ձեռք բերելու համար: Մրցաշրջանի մեկնարկին ընդառաջ, սակայն, «Արսենալ»-ն այնուամենայնիվ իրականացրեց մի քանի նշանակալի տրանսֆերներ: Դրանցից կարելի է առանձնացել «Չելսիի» կենտրոնական պաշտպան Դավիդ Լյուիսին ձեռք բերելը: Նշանակալի տրանսֆեր կարելի է համարել նաև ֆրանսիական «Լիլից» Նիկոլա Պեպեի տեղափոխությունը: Շատերը Պեպեին համարում էին Մխիթարյանի գլխավոր մրցակիցը մեկնարկային կազմի համար պայքարում: Պրեմիեր լիգայի առաջին տուրում Էմերին Մխիթարյանին ընդգրկել էր թիմի հիմնական կազմում, սակայն մյուս հանդիպումներում հայ ֆուտբոլիստը պահեստայինների շարքում էր, և իսպանացի մասնագետը նրան խաղալու հնարավորություն էր տալիս միայն մրցավեճերի վերջնամասում: Ասել, որ Մխիթարյանը կորցրել էր տեղը «Արսենալ»-ի հիմնական կազմում՝ ճիշտ չի լինի: Մեր հավաքականի ավագը ուներ հնարավորություն ամրապնդելու դիրքը, բայց…
Բնական է, որ «Ռոմա» տեղափոխվելու հարցում առանցքային է եղել հենց Մխիթարյանի դերը: Հայ ֆուտբոլիստն ըստ էության կանգնած էր երկընտրանքի առաջ: Նա կա՛մ պետք է մնար «Արսենալ»-ում և փորձեր ամրացնել դիրքերը, կա՛մ ընտրեր բոլորովին նոր ուղի: Էմերին «Արսենալ»-ում փորձում է իրականացնել արմատական փոփոխություններ՝ շեշտը դնելով երիտասարդ կադրերի վրա: Էմերիի որդեգրած քաղաքականության մեջ գոյություն ուներ առանցքային մի գործոն: Եթե նույնիսկ նույն Ուիլոքը կամ Պեպեն տվյալ պահին խաղամակարդակով զիջեին Մխիթարյանին կամ Օզիլին, Էմերին, միևնույն է, նախապատվությունը կտար երիտասարդներին: Էմերին կառուցում էր նոր մոդել և խնդիր էր դրել նոր կադրերին ձուլել այդ մոդելում: Ժամանակը ցույց տվեց, սակայն, որ Էմերիի ծրագիրը ոչ այլ ինչ էր, քան փուչիկ, որը պայթեց, և իսպանացի մասնագետը պաշտոնանկ եղավ:
Եթե տեղի ունեցած տրանսֆերը ավելի խորը վերլուծենք, կհամոզվենք, որ Մխիթարյանը կայացրել էր ճիշտ որոշում: Իտալական ֆուտբոլը էապես տարբերվում է անգլիականից: Ա սերիայում չկան այն արագությունն ու դինամիկան, որ բնորոշ են Պրեմիեր լիգային: Միևնույն ժամանակ իտալական թիմերը դավանում են ուժային և ինչ-որ տեղ կոպիտ ֆուտբոլ: Իտալիայում առանցքային է տակտիկական պայքարը:
Բունդեսլիգայում և Պրեմիեր լիգայում ձեռք բերած փորձը, վստահ ենք, թույլ կտա Մխիթարյանին նոր կարիերայի նոր և արդյունավետ ճանապարհ անցնել «Ռոմա»-ում: Վերջինս Իտալիայի ամենահեղինակավոր ակումբներից է, որը տասնամյակներ շարունակ տոն է տվել նաև եվրագավաթների խաղարկություններում: Վստահաբար կարող ենք ասել, որ կարգով և կազմով «Ռոմա»-ն ամենևին չի զիջում «Արսենալ»-ին:
