Եվրա-չինական երկխոսությունը պահանջված է առավել քան երբեւէ, հայտարարել է Ֆրանսիայի նախագահ Մակրոնը Փարիզում հյուրընկալելով եվրոպական շրջագայություն սկսած Չինաստանի նախագահ Սի Ցզինպինին: Նա Ֆրանսիայից է սկսել այցը եվրոպական երկրներ: Ֆրանսիայից բացի Չինաստանի նախագահը այցելելու է նաեւ Սերբիա եւ Հունգարիա: Ընդ որում ուշագրավ է, որ Ֆրանսիայում նա Մակրոնից բացի հանդիպել է նաեւ Եվրամիության հանձնաժողովի նախագահ Ուրսուլա Ֆոն Դեր Լայենի հետ:
Ի տարբերություն Մակրոնի, Լայենը ՍիՑզինպինի հետ քնննարկումներում եղել է զուսպ, անգամ թափանցիկ քննադատության է ենթարկել Չինաստանի տնտեսական քաղաքականությունը, խոսելով Եվրոպայի դեինդուստրիալիզացիայի վտանգի մասին: Հատկանշական է, որ Չինաստանի նախագահը Լայենի հետ հանդիպել է Փարիզում: Այդպիսով Պեկինը թերեւս ժեստ է արել հենց Ֆրանսիայից, ընդգծելով Փարիզի եվրոպական առաջնորդության հանդեպ իր վերաբերմունքը: Իսկ Եվրամիության ներկայիս ղեկավար կազմի հանդեպ վերաբերմունքի որոշակի դրսեւորում է եւ այն, որ Չինաստանի նախագահը այցելում է Բրյուսելում կառավարող միավորի հանդեպ ընդդիմախոսությամբ աչքի ընկնող Հունգարիա եւ Սերբիա:
Արդյո՞ք Պեկինը ակնկալում է, որ պաշտոնական Փարիզը որոշակի այլ շեշտադրումներով առաջնորդի Եվրամիությանը, դրա դիմաց խոստանալով աջակցություն այդ առաջնորդությանը: Ֆրանսիայի նախագահն այդ աջակցությունը փնտրում է նվազագույնը ավելի քան տարի: Նախորդ տարի ապրիլին նա այցելեց Պեկին: Ի դեպ, մի ուշագրավ դետալ՝ այդ ժամանակ Պեկինում էր նաեւ Իրանի արտաքին գործերի նախարարը եւ Մակրոնի չինական այցի ընթացքում Ֆրանսիայի արտգործնախարար Կոլոմինան Պեկինում հանդիպում է ունեցել Իրանի արտաքին գործերի նախարարի հետ:
Այժմ Չինաստանի նախագահն է կատարում պատասխան այց՝ եվրոպական ընտրություններից մեկ ամիս առաջ: Դա ունենալու է էական նշանակություն, իսկ այդ ընտրությունների արդյունքը չի կարող էական նշանակություն չունենալ Եվրամիության առաջատարության գլխավոր հավակնորդի, ինչպես Մակրոնն է ասում՝ ցամաքային Եվրոպայի մմիակ միջուկային տերության համար: Ֆրանսիա այցից առաջ Չինաստանի նախագահը հարցազրույց էր տվել ֆրանսիական Ֆիգարոին, որտեղ խոսել էր ուկրաինական հակամարտության կարգավորումը արագացնելու անհրաժեշտության մասին: Այստեղ առերեւույթ բավականին ուշագրավ վիճակ է: Չինաստանը սերտ գործակցում է Ռուսաստանի հետ, եւ ավելին՝ ըստ ամերիկյան գնահատականների, աջակցում տեխնոլոգիական առումով:
Մինչդեռ, Ֆրանսիան գոնե առերեւույթ աչքի է ընկնում կոշտ հակառաւոսական հայտարարություններով: Ինչպե՞ս կհարաբերվեն այդ դեպքում Սի Ցզինպինն ու Մակրոնը Փարիզում: Թե՞ այդուհանդերձ, խորքային շերտերում իրավիճակը բոլորովին միարժեք չէ, ինչպես կարող է թվալ հրապարակային հռետորաբանության մակարդակում եւ խոսելով եվրոպա-չինական կոմունիկացիայի՝ ինչպես երբեւէ կարեւորության մասին, Ֆրանսիայի նախագահը գործնականում հայտնում է լայն պայմանավորվածությունների պատրաստ լինելու մասին: Լինելու դեպքում, դրանք իրենց ազդեցությունն են թողնելու նաեւ Կովկասի վրա, անխոս:
