Հայաստանի արտաքին գործերի նախարար Միրզոյանը այսօր մեկնում է Հունգարիա, որտեղ նա բանակցություն կվարի իր հունգարացի գործընկերոջ հետ: Միրզոյանի այցը տեղի է ունենում այն տեղեկության ֆոնին, որ Հունգարիան արգելափակում է Եվրամիության Խաղաղության հիմնադրամից Հայաստանին մոտ տասը միլիոն դոլարի պաշտպանական միջոցներ տրամադրելու գործընթացը: Խոսքը այն «ոչ մահաբեր» միջոցների մասին է, որ հայտարարեց Հայաստանում Եվրամիության դեսպանը:
Հունգարիան արգելափակում է այդ որոշումը, ըստ լրատվամիջոցների, պայմանով, որ այդ հիմնադրամից օժանդակություն ցուցաբերվի նաեւ Ադրբեջանին, այսպես ասած բալանսը պահելու համար: Հունգարիան արգելափակում է Ադրբեջանի՞ խնդրանքով, հաշվի առնելով սերտ կապերը: Հայաստանը Հունգարիայի հետ դիվանագիտական հարաբերությունը սառեցնելու որոշում կայացրեց 2012 թվականի սեպտեմբերին, հայ սպա Գուրգեն Մարգարյանին Բուդապեշտում ՆԱՏՕ վարժանքների ընթացքում սպանած ոճրագործ, առանց արտահանձնամն իրավունքի ցմահ դատապարտված Ռամիլ Սաֆարովի արտահանձնման հայտնի որոշումից հետո:
Հունգարիայի եւ Ադրբեջանի միջեւ այդ գործարքից հետո Սաֆարովը վերադարձավ Բաքու եւ հերոսացվեց՝ ազատ արձակվելով: Հայաստանը Հունգարիայի հետ հարաբերությունը վերականգնելու մասին սկսեց խոսել 44-օրյա պատերազմից հետո, 2021 թվականին: 2021 թվականի դեկտեմբերին հայտարարվեց, որ Հունգարիայի միջնորդությամբ 5 հայ գերի է վերադառնում Բաքվից Երեւան: Մեկ տարի անց՝ 2022-ի դեկտեմբերին, Երեւանն ու Բուդապեշտը հայտարարեցին դիվանագիտական հարաբերությունները վերականգնելու որոշման մասին: 2023 թվականի հոկտեմբերի 27-ին Հայաստան ժամանեց Հունգարիայի արտգործնախարար Սիյարտոն:
Հայ-հունգարական հարաբերության այս աճող բարելավման ֆոնին տարակուսելի է, որ Բուդապեշտը արգելակում է Հայաստանին հատկացվելիք եվրոպական օժանդակությունը, այն էլ մի պարագայում, երբ խոսքը սպառազինության մասին չէ, այլ պաշտպանական տարբեր «ոչ մահաբեր» միջոցների, որոնք իհարկե որեւէ կերպ սպառնալիք չեն Ադրբեջանի համար: Սա հայկական դիվանագիտության բացթողու՞մ է, որ մեկնում է շտկելու Արարատ Միրզոյանը, թե՞ Բրյուսել-Բուդապեշտ հարաբերության հարց, որը այսօր մեղմ ասած այնքան էլ հարթ չէ: Բայց, այդ դեպքում Բուդապեշտը ինչի՞ է ուզում հասնել Հայաստանի համար օժանդակությունն արգելակելով, եթե դա պարզապես Բաքվի խնդրանք չէ, թեեւ Ադրբեջանը կարծես թե առայժմ չի դիմել եվրոպական նույն հիմնադրամից իր համար էլ օժանդակություն ստանալու հայցով:
