Վերջին օրերին մամուլում շարունակ շրջանառվում են իրականությանը չհամապատասխանող տեղեկություններ Արթուր Վանեցյանի՝ Հայաստանի ֆուտբոլի ֆեդերացիայի նախագահի պաշտոնից հեռանալու մասին: Նույնիսկ նշվում են թեկնածուներ, որոնք կարող են զբաղեցնել ՀՖՖ-ի նախագահի պաշտոնը: Մտահոգիչն այն է, որ սպորտային գերատեսչությունից Վանեցյանի հնարավոր հեռանալու համար նշվում են քաղաքական դրդապատճառներ: Այս կերպ ուղղակի կերպով ֆուտբոլը, որը մասսայականություն է վայելում ոչ միայն Հայաստանում՝ քաղաքականացվում է: Ավելի մտահոգիչ է ու ցավալի, որ նեգատիվ այս պրոցեսը տեղի է ունենում մեզ համար խիստ կարևոր մի փուլում:
Այսօր Հայաստանի ազգային հավաքականը գտնվում է մի այնպիսի հանգրվանում, որտեղ մեր երկրի համար աննախադեպ հաջողությունը ոչ միայն տեսանելի է, այլ դրա համար կան լուրջ նախադրյալներ: Հոկտեմբերին Հայաստանի ազգային հավաքականը 2020 թվականի Եվրոպայի առաջնության ընտրական փուլի շրջանակներում երկու, ըստ էության, վճռորոշ հանդիպումներ է անցկացնելու Լիխտենշտեյնի և Ֆինլանդիայի հավաքականների դեմ: Ընդ որում` այս մրցավեճերում լինելու ենք հյուրընկալվողի դերում, ինչը որոշակիորեն բարդացնում է խնդիրը: Անհրաժեշտ է, որ այս խաղերում Հայաստանի հավաքականը վաստակի 6 միավոր: Միայն այս դեպքում Եվրո-2020-ում հայտնվելը կդառնա իրատեսական: Ի դեմս ՀՖՖ-ի ղեկավարության հիմա պետք է արվի հնարավորը ազգային թիմին պատշաճ կերպով նախապատրաստելու և կարևորագույն հանդիպումներին տրամադրելու համար: Ու փոխարեն միահամուռ կերպով քայլեր անենք հաղթանակի հասնելու համար, շատերի կողմից ուղղակիորեն փորձ է արվում գաղջ մթնոլորտ ստեղծել հայկական ֆուտբոլում:
Հայաստանի ազգային հավաքականի հանգրվանի կարևորության մասին հստակ կերպով արձագանքել էր նաև ՀՀ վարչապետ Նիկոլ Փաշինյանը: Լրագրողների հետ հանդիպմանը Փաշինյանը մասնավորապես ասել էր․ «Այս պահին, կարծում եմ, պարոն Վանեցյանը կկենտրոնանա Հայաստանի ֆուտբոլի ազգային հավաքականը Եվրոպայի առաջնության եզրափակիչ դուրս բերելու շատ կարևոր, ազգային և պետական խնդրի լուծման վրա»: Մեկնաբանությունները, կարծում ենք, ավելորդ են: Այս հայտարարությամբ երկրի առաջնորդը ուղղակիորեն հորդորել էր՝ կանգնեն ազգային հավաքականի կողքին: Վերջին մեկ տարվա ընթացքում կատարված աշխատանքի արդյունքում Հայաստանի հավաքականը գտնվում է բոլորովին նոր հարթության վրա, և հիմա ուղղակի իրավունք չունենք հետ քայլ կատարելու:
Հետևաբար` այս փուլում, այս օրերին ֆուտբոլի ֆեդերացիայի, վերջինիս նախագահի նկատմամբ իրականությանը չհամապատասխանող հայտարարություններ անելը կամ տեղեկություն տարածելը կարելի է որակել թերևս այսպես՝ ոտնձգություն: Ոտնձգություն՝ ընդդեմ Հայաստանի ազգային հավաքականի, որը նախապատրաստվում է վճռորոշ հանդիպումների: Տպավորությունն այնպիսին է, որ ոմանք ցանկանում են, որ Հայաստանի հավաքականը ձախողվի և այդ ուղղությամբ քայլեր են ձեռնարկում: Թե ովքեր են այդ անձինք, կարծում ենք, շատերի համար է պարզ: Ցավոք, մեր երկրում կան մարդիկ, ովքեր պետության տարբեր ոլորտներում ձախողումները համարում են հաղթանակ ժողովրդի կողմից ընտրված իշխանությունների նկատմամբ: Նման դրսևորումների ականատեսը մենք արդեն եղել ենք: Լիահույս ենք, որ տեղի ունեցող զարգացումները որևէ կերպ չեն անդրադառնա թե՛ հայկական ֆուտբոլի և թե՛ Հայաստանի ազգային հավաքականի վրա:
Եվս մեկ կարևոր հանգամանք․ Վանեցյանի գլխավորությամբ հայկական ֆուտբոլը մեկ տարում աննախադեպ առաջընթաց է գրանցել, և հիմա ՀՖՖ-ի նախագահի հեռանալու մասին խոսելը, ոչ այլ ինչ է, քան աբսուրդ:
