Ֆուտբոլի Հայաստանի Բարձրագույն խմբի առաջնությունը մոտենում է ավարտին, և մոտ մեկ ամսից մեր թիմերը պայքարը կսկսեն եվրագավաթների խաղարկությունում: Նշենք, որ Հայաստանի չեմպիոնը իրավունք է ստանում մասնակցելու Չեմպիոնների լիգայի, իսկ փոխչեմպիոնը, բրոնզե մեդալակիրը և գավաթակիրը՝ Եվրոպա լիգայի խաղարկությանը: Այս պահին Բարձրագույն խմբի առաջնության մրցաշարային աղյուսակը գլխավորում է «Փյունիկը», սակայն վերջին տուրում «Բանանցին» հաղթելու դեպքում «Արարատ-Արմենիան» կդառնա չեմպիոն: Արդեն իսկ պարզ է, որ «Արարատ-Արմենիան» առաջին անգամ մասնակցելով Բարձրագույն խմբի առաջնությանը հավակնում է դուրս գալ եվրոպական ասպարեզ:
Նշենք սակայն, որ ՈւԵՖԱ-ի կանոնադրության համաձայն Եվրագավաթների խաղարկությանը մասնակցելու իրավունք ունեն այն թիմերը, որոնք առնվազն երեք մրցաշրջան խաղացել են ներքին առաջնությունում: Մեր դեպքում «Արարատ-Արմենիան» առաջին անգամ է մասնակցում Բարձրագույն խմբի առաջնությանը: Մինչ այդ այս ակումբն ուներ «Ավան-Ակադեմիա» անվանումը: Վերջինս մասնակցել է Հայաստանի 2017/2018 թվականի Հայաստանի Առաջին խմբի առաջնությանը: Ստացվում է, որ «Արարատ-Արմենիան» ՈւԵՖԱ-ի կանոնակարգի համաձայն իրավունք չունի մասնակցելու 2019/2020 թթ․ եվրագավաթների խաղարկությանը:
Որպեսզի իրավիճակի վերաբերյալ ավելի հստակ պատկեր ունենանք, «Առաջին լրատվական»-ը զրուցեց Ռուսաստանում և Եվրոպայում հայտնի սպորտային իրավաբան Յուրի Զայցևի հետ: «Ակումբներին եվրագավաթների խաղարկությանը մասնակցելու համար անհրաժեշտ է համապատասխան արտոնագիր: Այն տրամադրում են ազգային ֆեդերացիաները, Ձեր դեպքում ՀՖՖ-ն:»Ազգային ֆեդերացիաները սակայն այդ արտոնագրերը պետք է տրամադրեն ՈւԵՖԱ-ի կողմից սահմանված օրենքների հիման վրա: ՈւԵՖԱ-ում գոյություն ունի ակումբների լիցենզավորման կարգավորումների դրույթ, որը թարմացվել է 2018 թվականին: Այս կանոնակարգի 12-րդ կետի համաձայն ակումբը, որը հավակնում է ելույթ ունենալ Եվրագավաթներում առնվազն 3 տարի պետք է լինի ազգային ֆեդերացիայի անդամ և վերջինիս կողմից ստացած լինի արտոնագրի ներքին մրցումներին մասնակցելու: Կարճ ասած թիմը պետք է 3 տարի մասնակցած լինի ներքին առաջնությանը: Սա հիմնական պահանջն է ՈւԵՖԱ-ի կողմից եվրագավաթներին մասնակցելու համար: Կարող են լինել նաև բացառություններ, բայց դրանք արվում են բացառիկ դեպքերում և բացառիկ իրավիճակներում, երբ ազգային առաջնություններում կա թիմերի սակավության խնդիր: Այդ դեպքում ազգային ֆեդերացիան պետք է խնդրանքով դիմի ՈւԵՖԱ-ին: Որքանով ես տեղյակ եմ Հայաստանում գոյություն ունեն թիմեր որոնք 3 մրցաշրջանից քիչ են մասնակցել ներքին առաջնությանը, սակայն ՀՖՖ-ի կողմից ստացել են Եվրագավաթներին մասնակցելու լիցենզիան: Այս դեպքում, սակայն միայն ՀՖՖ-ն կարող է պատասխանել ՈւԵՖԱ-ից ստացել է իրավունք արտոնագիր տրամադրելու, թե ոչ»,- ասաց Զայցևը: Վերջինս նշեց նաև, որ կանոնակարգում գոյություն ունի կետ, որի համաձայն ակումբի անվանափոխության կամ սեփականատիրոջ փոփոխության պարագայում այդ երեք տարվա մասնակցության վերաբերյալ պահանջը չեղարկվում է: Մասնավորապես, մեր օրինակով եթե ակումբը կրում էր «Ավան-Ակադեմիա» անվանումը և այն վերանվանվել է «Արարատ-Արմենիա», ապա «Արարատ-Արմենիան» երեք տարի պետք է մասնակցեր ներքին առաջնությանը և նոր իրավունք ստանար խաղալու եվրագավաթներում:
Մեր տեղեկություննրով՝ ՀՖՖ-ն արդեն իսկ Եվրոպայում խաղալու արտոնագրեր տրամադրել է «Արարատ-Արմենիային» և Վանաձորի «Լոռիին», որը միայն երկրորդ մրցաշրջանն է ինչ խաղում է ներքին առաջնություններում: Մեր զրուցակիցը նշեց նաև, որ ՈւԵՖԱ-ն սովորաբար վստահում է ազգային ֆեդերացիաներին և ինքնակամ չի ուսումնասիրում արտոնագրերի տրամադրման գործընթացը: Բողոքի կամ այլ իրավիճակների ի հայտ գալու դեպքում ՈւԵՖԱ-ն ուղղակի զրկում է թիմին այդ արտոնագրից: Հաշվի առնելով ստեղծված իրավիճակը ակնկալում ենք, որ ՀՖՖ-ն պարզաբանում ներկայացնի «Արարատ-Արմենիայի» և «Լոռիին» ՈւԵՖԱ-ի արտոնագիր տրամադրելու վերաբերյալ:
Հայկական ֆուտբոլային ակումբներին էլ հորդորում ենք դիմելու ՈւԵՖԱ-ին պարզաբանում ստանալու, թե ինչպես են նշված երկու ակումբները ստացել այդ արտոնագրերը: Այս քայլի հիմքում պետք է լինի արդար մրցակցության ապահովումը: Այլապես ստացվում է, որ ոմն մեկը կարող է թիմ գնել, փոխել անունը, ազգային ֆեդերացիայի հետ պայմանավորվածություն ձեռք բերել և հաջորդ տարի ելույթ ունենալ ասենք Չեմպիոնների լիգայի խաղարկությունում: Սա պարզապես աբսուրդ է: Եթե մեր ֆուտբոլային կառույցի և ակումբների միջև որևէ անօրինական պայմանավորվածություն չկա, ապա մասնավորապես «Արարատ-Արմենիան» չպետք է ելույթ ունենա եվրագավաթներում:
Ըստ այդ 2019/2020 թթ խաղարկությունում մեր եկիրը պետք է ներկայացնեն «Փյունիկը», «Բանանցը», «Ալաշկերտը» և Գյումրիի «Շիրակը», որը զբաղեցրել է 6-րդ հորիզոնականը: «Արարատ-Արմենիայի» և «Լոռիի» արտոնագրերից զրկվելու պարագայում Գյումրիի թիմը ընդգրկվում է Եվրոպական մրցաշարարերին մասնակցող թիմերի քառյակում:
