Այս տարվա մարտին հայկական ֆուտբոլում տեղի էր ունենում բավական հետաքրքիր մի պրոցես: Ֆուտբոլիստների, մարզիչների, ակումբի նախագահների միջև ծավալվել էր ակտիվ, նույնիսկ սուր քննարկում մեր առաջնությունում լեգեոներների քանակի սահմանափակման խնդրի շուրջ: Խնդրին անդրադաձել էր նաև Երևանի «Արարատի» գլխավոր մարզիչ Աբրահամ Խաշմանյանը՝ լեգեոներների լիմիտի մասին հնարավոր օրենքն անվանելով հիմարություն՝ Խաշմանյանի դիտարկմանը բավական կոշտ կերպով էին արձագանքել Հայաստանի ազգային հավաքականի ֆուտբոլիստներ՝ Էդգար Մանուչարյանը, Էդգար Մալաքյանը և Գոռ Մալաքյանը:
Օրինակ Գոռ Մալաքյանը ֆեյսբուքյան իր էջում գրել էր «Խաշմանյանն ասում է, որ հիմարություն է լեգեոներների լիմիտ մտցնելը: Երբ մարդ ինտելեկտով ցածր է, սեփական շահից ու իր սեփական կարծիքից այն կողմ չի տեսնում և չի լսում մնացածի կարծիքը և տեսակետը, ապա կարծում եմ, որ դա է հիմարությունը: Ամեն ոք կարող է ասել իր տեսակետը, իր կարծիքն այս հարցի շուրջ: Ընդհանուր բանավեճի և կարծիքների փոխանակումից կկայացվի ճիշտ որոշում հանուն մեր ֆուտբոլի զարգացման: Իհարկե մեզ (ֆուտբոլային ասպարեզում գտնվող մարդկանց) հայտնի է, թե որն է իր կողմից ասված «հիմարություն է լեգեոներների լիմիտ սահմանելու» պատճառը: Փակագծերն այս պահին բացելու իմաստ չեմ տեսնում: Կոչ եմ անում լինել ուշադիր և հարգալից կարծիք ասել հետագա անախորժություններից խուսափելու համար»: Ընդունենք, որ իրավիճակն իսկապես լարված էր: Այն ժամանակ արձանագրեցինք, որ մեր ֆուտբոլում ստեղծվել է ազատ կամարտահայտման հնարավորություն: Մեր ֆուտբոլիստները առանց կաշկանդվելու հնչեցրեցին իրենց մտահոգությունը, ինչը ոչ միայն ողջունելի է: Խնդրի շուրջ ձևավորվել էր երկու բևեռ, որոնք ներկայացնում էին իրենց կարծիքն ու փաստարկները:
Այս առթիվ ՀՖՖ-ի նախագահ Արթուր Վանեցյանը հայտարարել էր․ «Ես կարծիք չեմ հայտնի լեգեոնականների թվի սահմանափակման վերաբերյալ: Միայն ուրախ եմ, որ նման մեծ քննարկում է առաջացել: Ֆուտբոլի ֆեդերացիայում կլսենք բոլոր կարծիքները, և կընդունենք հավասարակշռված որոշում, որպեսզի որևէ մի կողմի չնեղացնենք»: Հայաստանի առաջնությունում լեգեոներների մասին քննարկումները բավական արագ դադարեցին: Ինչ տեղի ունեցավ: Այսօր հայկական թիմերը բնականոն ընթացքով շարունակում են ելույթները Բարձրագույն խմբի առաջնությունում:
Այսօր էլ շատերն անհամբեր սպասում են թե խնդրի վերաբերյալ ինչ որոշում կկայացնի ՀՖՖ-ն: Երկու ամիս առաջ վստահ էինք, որ երկու բևեռները հստակ տեսնում էին խնդրի արդարացի լուծման ուղին, ինչն ամենակարևորն էր: Կրքերի բավական արագ հանդարտացումից հետո, ավելի արդիական է դառնում պնդումը, որ լարված իրավիճակը ստեղծել էր արհեստականորեն: Իսկ թե ինչու և ինչ նպատակով էր այն ստեղծվել դժվար է ասել: Ներկայիս իրավիճակը բնականաբար ձեռնտու է լեգեոներների սահմանափակման դեմ արտահայտվողներին: Այսօր մեր առաջնությունում կան ընդամեն 3-4 թիմեր, որոնք մտադիր են ապագան կապել տեղացի կադրերի հետ: Հայաստանի առաջնությունը մոտենում է ավարտին և մոտ երկու ամսից մեր թիմերը պայքարը կսկսեն եվրագավաթների խաղարկություններում: Մինչև 2019/2020 մրցաշրջանի սկիզբը կարծում ենք Հայաստանի ֆուտբոլի ֆեդերացիան որոշակի հստակեցում պետք է մտցնի լեգեոներների խնդրի վերաբերյալ:
Այս մասին շատ է խոսվել սակայն ՀՖՖ-ի կողմից պաշտոնական դիրքորոշում այդպես էլ չի ներկայացվել: