Անգլիայի Պրեմիեր լիգայի 32-րդ տուրում Լոնդոնի «Արսենալը» սայթաքեց մրցակցի հարկի տակ՝ նվազագույն հաշվով զիջելով «Էվերթոնին»: Ունայ Էմերիի թիմը առաջնության ավարտից առաջ պայքար է մղում լավագույն քառյակում տեղ ունենալու համար: Ուստի Պրեմիեր լիգայի յուրաքանչյուր հանդիպում կարելի է համարել փոքրիկ եզրափակիչ: Այս պահին «Արսենալը» 63 միավորով 4-րդ հորիզոնականում է: Լոնդոնի մեկ այլ թիմ՝ «Տոտենհեմը», 32-րդ տուրում «Կրիստալ Փելեսի» նկատմամբ տարած հաղթանակի շնորհիվ 64 միավորով հանգրվանել է 3-րդ հորիզոնականում: 63 միավոր ունի նաև «Չելսին», որը, սակայն, լրացուցիչ ցուցանիշներով զիջում է «Արսենալին» և 5-րդ հորիզոնականում է: «Մանչեսթեր Յունայթեդը» 61 միավորով 6-րդն է:
«Էվերթոնի» դեմ մրցավեճում Էմերին նախընտրել էր վերջին հանդիպումներում հաջողություն բերած 3-4-2-1 մարտավարությունը: Իսպանացի մասնագետը կրկին հագեցրել էր դաշտի միջին հատվածը, սակայն կադրային խնդիրներն այս անգամ թույլ չտվեցին դրական արդյունքի հասնել: Մասնավորապես, ֆունկցիոնալ առումով այս խաղին պատրաստ չէր կիսապաշտպանության ձախ եզրում գործող բոսնիացի Սեադ Կոլաշինացը: Վերջինս վնասվածքի պատճառով դեռևս բաց էր թողել մարտի 23-ին տեղի ունեցած Հայաստանի ազգային հավաքականի հետ ընտրական հանդիպումը: Երեք օր անց Կոլաշինացը մասնակցել էր Հունաստանի հետ մրցավեճին: Վերադառնալով «Արսենալ»՝ նա լոնդոնյան թիմի կազմում առանց փոխարինման մասնակցել էր «Նյուքասլի» հետ խաղին: Էմերին նրան հանգստանալու հնարավորություն չէր տվել՝ չունենալով այլընտրանքային տարբերակ: Եվ ահա ծանրաբեռնվածությունն արեց իրենը, և հենց Կոլաշինացի կոպիտ սխալի արդյունքում «Էվերթոնը» խփեց միակ և հաղթական գնդակը:
Էմերին երկրորդ կեսում փոխարինեց Կոլաշինացին, բայց արդեն ուշ էր: Թույլ խաղով աչքի ընկավ նաև հիմնական կազմում հայտնված եգիպտացի կիսապաշտպան Էլնենին, իսկ Օզիլն ուղղակի ձախողվեց: Կարծում ենք՝ չենք սխալվի, եթե պնդենք, որ հանդիպման հակահերոսը հենց Օզիլն էր: Այս երեք խաղացողների վատ խաղալու հետևանքով Էմերիի սխեման ամբողջովին տապալվեց: Պաշտպանները գործում էին մեծ ծանրաբեռնվածությամբ, իսկ առջևի գծի խաղացողները ստիպված էին զբաղվել կանխարգելիչ գործողություններով: Ամեն դեպքում ճիշտ չի լինի ասել, որ Էմերին սխալ մարտավարություն էր ընտրել: Նա օգտագործեց այն գործիքակազմը, որն ուներ ձեռքի տակ: Այն, որ վերջին շրջանում «Արսենալը» վերելք է ապրում՝ անհերքելի է, բայց մրցաշրջանի ավարտին մոտ զգացնել են տալիս ծանրաբեռնվածությունն ու կադրային խնդիրները: «Արսենալը» սկսել է սպառվել, և այս փուլում այս պրոցեսը կանգնեցնելը բավական բարդ է: Թիմը պայքար է մղում երկու ֆրոնտներում՝ Անգլիայի Պրեմիեր լիգայում և Եվրոպա լիգայի խաղարկությունում: Կա վտանգ, որ լոնդոնյան թիմի ռեսուրսն ուղղակի չի բավականացնի, և «Արսենալը» չի կարողանա իր նպատակին հասնել երկու մրցաշարերից և ոչ մեկում:
Ինչ վերաբերում է Հայաստանի ազգային հավաքականի ավագ Հենրիխ Մխիթարյանին, ապա «Էվերթոնի» դեմ նա խաղաց նորմալ՝ կատարելով մեծ ծավալի աշխատանք: Կիսապաշտպանության կենտրոնի ձախողման հետևանքով Մխիթարյանը ևս ստիպված էր կատարել նաև քանդող գործողություններ, ինչի հետևանքով էլ առջևի գծում նա իր պոտենցիալը չօգտագործեց: Ըստ էության Մխիթարյանը խաղում էր նաև Օզիլի փոխարեն, բայց․․․ Նման լարված խաղերում առանձին ֆուտբոլիստներից հրաշքներ ակնկալելը, կարծում ենք, ճիշտ չի լինի: Մխիթարյանն այս խաղում արժանացել է միջին՝ 6․5 գնահատականի:
«Այսօր մեր օրը չէր: Երկու տարբեր խաղակեսեր էին: Մենք չկարողացանք ստեղծել շատ գոլային պահեր: Այո, լավ էինք պաշտպանվում, բայց եզրային նետումից հետո գոլ բաց թողեցինք: Գիտեի, որ այս խաղը բարդ է լինելու: Մենք փորձեցինք փոխել խաղը երկրորդ կեսում: Փոփոխություններ կատարեցինք, և եթե գոլ խփեինք, ապա խաղն այլ ընթացք կունենար: Ցավոք, մենք քիչ ժամանակ ունեինք խաղում փոփոխություններ մտցնելու համար: Պետք է փորձենք շտկել սխալները: Առջևում «Նապոլիի» հետ Եվրոպա լիգայի խաղարկության քառորդ եզրափակչի հանդիպումն է, որը պակաս կարևոր չէ: Մոռանալով «Էվերթոնի» հետ հանդիպումը՝ պետք է կենտրոնանանք առաջիկա հանդիպման վրա, որից հետո կմտածենք Պրեմիեր լիգայի հաջորդ տուրի «Ուոտֆորդի» դեմ մրցավեճի մասին: Ես հավատում եմ մեր տղաներին: Մենք ամեն ինչ պետք է անենք մեր առաջ դրված խնդիրը լուծելու համար»,- «Էվերթոնի» հետ մրցավեճից հետո ասել է Էմերին:
«Նապոլիի» հետ հանդիպումը կայանալու է ապրիլի 11-ին «Էմիրեյթս» մարզադաշտում: Ապրիլի 15-ին էլ տեղի կունենա Պրեմիեր լիգայի 33-րդ տուրի «Ուոտֆորդի» հետ մրցավեճը:
Բացի այն, որ «Արսենալը» կադրային խնդիրներ ունի լարված այս շրջանում՝ հագեցած է նաև խաղերի գրաֆիկը: Այս իրավիճակում կարևոր է առանցքային խաղացողների ուժերի ճիշտ բաշխումը: Նոր վնասվածքների դեպքում «Արսենալի» պլանները կարող են վերջնականապես փլուզվել: