Մյունխենի «Բավարիա»-ի կիսապաշտպան Ֆրանկ Ռիբերին պնդում է, որ իր թիմին դեռ վաղ է հռչակել Գերմանիայի Բունդեսլիգայի ընթացիկ առաջնության չեմպիոն: Հիշեցնենք, որ Խոսեպ Գվարդիոլայի սաները շաբաթ օրը մրցակցի հարկի տակ 3:0 հաշվով հաղթանակ տոնեցին սկզբունքային մրցակցի` Դորտմունդի «Բորուսիա»-ի նկատմամբ:
«Մենք դեռ «Բորուսիա»-ի հետ խաղից առաջ էինք խոսում այն մասին, որ հաղթանակը թիմերից և ոչ մեկին տիտղոս չի բերի: Չեմ հասկանում, թե ինչու են այդ խոսքերն անտեսվում: Ճիշտ է, «Բավարիա»-ն լավ հանդիպում անցկացրեց ու հաղթեց սկզբունքային մրցակցին` մի փոքր հեշտացնելով իր կյանքը Գերմանիայի առաջնությունում:
Սակայն, ոչինչ նվաճված չէ, տիտղոսները դեռ շատ հեռու են, քանի որ մրցաշրջանի մեծ մասը դեռ առջևում է: Երկրպագուները գուցե էյֆորիայի զգացում ունենան, բայց մենք ամուր կանգնած ենք ոտքերի վրա»,- ֆրանսիացի ֆուտբոլիստի խոսքերը մեջբերում է Bild-ը:
