ՀՀ սպորտի փոխնախարար Արսեն Քարամյանն անդրադառնալով «Տարվա մարզիկ» անվանակարգում ընտրության նոր ձևաչափին և քվեարկության արդյունքներին ֆեյսբուքյան իր էջում գրել է․ «Մենք ավարտեցինք Հայաստանի 2017 թվականի 10 լավագույն մարզիկների ընտրությունը։ Ցանկանում եմ շնորհակալություն հայտնել բոլորին, ում ջանքերով կայացրեցինք սկզբունքորեն նոր ձևաչափով ու չափորոշիչներով մրցույթը։
Սա այն էր, ինչ նախարարությունը բոլոր մարզական ֆեդերացիաների, հավատարմագրված լրագրողների, մարզասեր հասարակայնության հետ միասին իրականացրեց։ Մենք փորձեցինք ձևավորել նոր մշակույթ և նշաձող գալիք տարիների համար։ Մենք ձևավորեցինք լավագույն տասնյակ, որտեղ չկա առաջին ու վերջին տեղեր, ձևավորեցինք տասնյակ որտեղ հանգրվանել են տարբեր մարզաձևերի ներկայացուցիչներ այդ թվում խաղային մարզաձևի, ովքեր բարձր են պահել Հայաստանի մարզական պատիվը և ի վերջո նպաստել են Հայաստանի հանրահռչակմանը։
Շնորհակալ եմ բոլորին։ Փառք ու պատիվ մեր 10 լավագույն մարզիկներին։ Ցավոք, իմ տրամադրության տակ այս պահին միայն Արթուրի և Հենրիխի միասին արված լուսանկարներն են, որը և հրապարակում եմ մեծ հպարտությամբ»։