2017 թվականը հայկական բասկետբոլի համար կարելի է շրջադարձային համարել: Հայաստանի ազգային հավաքականը առաջին անգամ ելույթ ունեցավ աշխարհի առաջնության ընտրական փուլում՝ տոնելով տպավորիչ հաղթանակներ: Տևական դադարից հետո վերսկսվեցին Հայաստանի առաջնությունները:
«2017 թվականին Հայաստանի տարբեր տարիքային 6 հավաքականներ անցկացրել են պաշտոնական 34 հանդիպում, որոնցից 22-ում հաղթել են, իսկ մնացած 12-ում պարտություն կրել: Այդ խաղերից 8-ը անցկացրել է ազգային հավաքականը՝ 4 հաղթանակ և 4 պարտություն: Ազգային հավաքականն առաջին անգամ ընդգրկվել է ՖԻԲԱ-ի վարկանիշային աղյուսակում և ներկայումս 89-րդ հորիզոնականում է: Այս թվերը վկայում են առաջընթացի մասին և գոհացնող են, թեև մենք գիտակցում ենք, որ ավելի մեծ ներուժ ունենք և դեռ շատ-շատ անելիքներ կան»,- «Առաջին լրատվական»-ի հետ զրույցում ասաց Հայաստանի բասկետբոլի ֆեդերացիայի գլխավոր քարտուղար Արթուր Նազարյանը:
Ներկայում Հայաստանի ազգային հավաքականը ելույթ է ունենում Եվրոպայի առաջնության ընտրական փուլում: «Եկող տարի ազգային հավաքականի գլխավոր խնդիրը Եվրոպայի 2021 թվականի նախընտրական առաջին փուլի արգելքը հաղթահարելն է: Խմբային փուլի 2 հանդիպումներից հետո ունենք 3 միավոր: Հաջորդ 2 խաղերում հաղթանակներ են անհրաժեշտ: Փետրվարի 25-ին Երևանում հյուրընկալելու ենք Ալբանիային, որին նոյեմբերին հաղթել ենք Տիրանայում: Ցավոք, փետրվարին ևս ԱՄՆ-ում հանդես եկող մի շարք խաղացողներ չեն կարողանա միանալ մեզ, քանի որ ուսանողական լիգայում խաղեր ունեն: Մարտական կազմը հնարավոր կլինի հավաքել միայն հունիսին, երբ հյուրընկալվենք Դանիային: Եթե անցնենք հաջորդ փուլ, ապա օգոստոսից նոր խաղեր են մեզ սպասվում»,- հավելեց Նազարյանը:
Ինչ վերաբերում է մյուս հավաքականներին, ապա եկող տարի տղաների 16 և 18 տարեկանների հավաքականները հանդես կգան C դիվիզիոնում, իսկ մինչև 20 տարեկանները՝ կրկին B դիվիզիոնում: 2017 թվականին Հայաստանի մինչև 16 տարեկանների հավաքականը հաղթել էր C դիվիզիոնում, սակայն որոշում է կայացվել մնալ այնտեղ, քանի որ կազմն ամբողջությամբ փոխվում է և նպատակահարմար չէ խաղալ B դիվիզիոնում:
Կանանց պայքարում 2018-ին հավաքականներ չենք ունենա, քանի որ մի շարք խաղացողներ Ռուսաստանից են, որտեղ լեգեոների սահմանափակումների հարցը դեռ չի կարգավորվել: Անդրադառնալով Հայաստանի առաջնություններին՝ մեր զրուցակիցը նշեց. «Երկարատև ընդմիջումից հետո Հայաստանում սկսել են անցկացվել կանոնավոր առաջնություններ: Մինչև 16 տարեկանների առաջնությանը մասնակցում են 12 թիմեր, 7-ը՝ Երևանից, և 5-ը՝ մարզերից: Առաջին շրջանից հետո շատ մասնագետներ նշում են, որ առաջնությունը մեծ օգուտ է տալիս պատանի բասկետբոլիստներին և նրանց մոտ զգալի առաջընթաց կա: Հույս ունենք, որ հաջորդ տարի մինչև 12 և մինչև 14 տարեկանների առաջնություններն էլ կանոնավոր կլինեն: Նույնը նախատեսում ենք կազմակերպել նաև աղջիկների համար: Ինչ վերաբերում է մեծահասակներին, ապա Ա լիգայում 7 թիմեր շարունակում են պայքարը, և սպասվածից ավելի հետաքրքիր առաջնություն է ստացվել»:
Նշենք, որ Լիբանանում հանդես է գալիս հայկական ՀՄԸՄ ակումբը, որը վերջերս հաղթել է նաև Արաբական երկրների բասկետբոլի լիգայում, ինչը լուրջ արդյունք է: Մարզասերները շարունակ հետաքրքրվում են՝ արդյոք Հայաստանի բասկետբոլի ֆեդերացիան համագործակցո՞ւմ է ՀՄԸՄ-ի հետ:
«Մենք վաղուց ենք ցանկանում համագործակցել ՀՄԸՄ-ի հետ և մեծ ուշադրությամբ հետևում ենք ակումբի ելույթներին: Ցավոք սրտի, այս պահին հայկական ակումբի կազմում շատ քիչ հայեր են խաղում: Որոշակի խաղաժամանակ են ստանում Սևակ Կետենջյանը և Հայկ Գյոկչյանը, որոնք ժամանակին հրավիրվել են Հայաստանի հավաքական, սակայն տարբեր պատճառներով չեն միացել ազգային թիմին: Մենք բազմիցս փորձել ենք կապ հաստատել Բեյրութի ՀՄԸՄ-ի ղեկավարների հետ և հանդիպումներ կազմակերպել, սակայն արդյունքի չենք հասել: Վերջերս հանդիպել եմ Երևանում ՀՄԸՄ-ի պատասխանատուի հետ և քննարկել հետագա անելիքները: Ծրագրում ենք, որ 2018 թվականի փետրվարին Բեյրութում հանդիպում լինի, որի ընթացքում կխոսենք ավելի կոնկրետ համագործակցության մասին: Շատ լավ կլիներ, որ ՀՄԸՄ-ն թիմ ունենար նաև Հայաստանի առաջնությունում: Մենք շատ ենք կարևորում «Հոմենեթմենի» հետ համագործակցությունը և կարծում ենք, որ հայկական բասկետբոլի հենասյուներից մեկը հենց ՀՄԸՄ-ն է: Չմոռանանք, որ «Հոմենեթմենը» բազմաթիվ բասկետբոլային թիմեր ունի նաև ԱՄՆ-ում, որտեղ հանդես են գալիս հարյուրավոր հայ բասկետբոլիստներ: Ներկայիս հավաքականներում էլ կան տղաներ, ովքեր ԱՄՆ-ում խաղում են կամ խաղացել են հոմենեթմենական թիմերում»,- ասաց Նազարյանը:
Ինչևէ, Հայաստանի բասկետբոլի ֆեդերացիան բավական փոքր ռեսուրսներ և սուղ միջոցներ ունի: Վերջին հաջողությունները շատերի մեջ ուղղակի զարմանք են առաջացրել, թե ինչպես է ստացվում նման պայմաններում այսպիսի մեծ ծավալի աշխատանք կատարել:
«Առկա իրավիճակում շատ կարևոր է, որ միջոցները օգտագործվեն շատ ճիշտ, աշխատանքները կազմակերպվեն հնարավորինս անթերի: Ֆեդերացիայի նախագահ Հրաչյա Ռոստոմյանը մշտապես լսում է ֆեդերացիայի անդամների կարծիքը, միայնակ որոշումներ չի ընդունում, ինչը տալիս է իր արդյունքը: Աստիճանաբար ավելանում են նաև բասկետբոլի նկատմամբ հետաքրքրվող անձինք: Շուտով կլինի ֆեդերացիայի տարեկան ժողովը, որի ընթացքում կհայտարարենք նաև կադրային որոշակի փոփոխությունների մասին»,- եզրափակեց Նազարյանը:
