«Մանչեսթեր Սիթի»-ի գլխավոր մարզիչ Պեպ Գվարդիոլան լրագրողների հետ զրույցում կատակելով նշել է, որ մեկ պարտությունն իր թիմին հարկավոր կլիներ մարզիչների ու խաղացողների շրջանում կրքերը հանդարտեցնելու համար։ Թիմը հաղթել է ընթացիկ մրցաշրջանի բոլոր խաղերում՝ մեծամասամբ ջախջախիչ հաշիվներով։
«Երբևէ տեսե՞լ եք, որ թիմը հոգնած տեսք ունենա 4։0 հաշվով հաղթանակից հետո։ Ես առայժմ չեմ տեսել նման բան։ Երբ հաղթում ես, քեզ ավելի հարմարավետ ես զգում, բարձրանում է թիմի մարտական ոգին։
Մի օր կպարտվենք։ Միգուցե, սթափվելու համար պետք է հնարավորինս շուտ պարտվել։ Հասկանում եք՝ ինչ ի նկատի ունեմ։ Հարկավոր է հանդարտեցնել կրքերը»,- Գվարդիոլայի խոսքերը մեջբերում է Goal.com-ը։
