Այսօր «Տեսակետ» ակումբում կայացած մամուլի ասուլիսի ժամանակ աշխարհահռչակ հայ պրոֆեսիոնալ բռնցքամարտիկ Վիկ Դարչինյանն անդրադարձավ նաև իր համաքաղաքացի` Վանաձորցի բռնցքամարտիկ Սամսոն Խաչատրյանի ձերբակալությանը:
«Ես հավաքի եմ եղել այդ պահին: Սամսոնն իմ լավ ընկերն է: Ես այդ պահին չեմ իմացել ինչ է եղել ոնց է եղել. ես որ գնում եմ, բոլոր հեռախոսներս անջատում եմ, որ ավելի լավ կարողանամ մարզվեմ: Սամսոնը շատ տաղանդավոր սպորտսմեն է: Չի կարելի մեր սպորստսմեններին նման կերպ վերաբերվել: Ես չգիտեմ իհարկե՝ ինչ է եղել այդ պահին, բայց չեմ կարծում, որ Սամսոնը կարող էր ինչ որ մեկին նեղացնել: Լավ սպորստսմենը չի կարող ինչ որ մեկին նեղացնել, ինքն էլ մեր լավ սպորստսմեննրից է»,- ասաց Դարչինյանը:
Խոսելով Հայաստանում բռնցքամարտի զարգացման մասին Վիկն ասեց հետևյալը. «Քանի որ այդ հարցն ինձ արդեն 4-5 անգամ տվել են, ես միշտ ասել եմ, որ եթե ուզում են մեր մոտ բռնցքամարտը զարգանա` պետք է մենք պրոֆեսիոնալ բռնցքամարտ ունենանք: Պրոֆեսիոնալը կօգնի սիրողականին: Ինձ չեն լսում և երևի չեն ուզում լսեն, որովհետև երևի իրենք սիրողականից ավելի շատ գումարներ են աշխատում: Բայց չի կարելի լռել, հերիք է արդեն: Ուզում եք տեղ գրավել, աշխարհի չեմպիոններ ունենալ, պրոֆեսիոնալ սպորտը զարգացրեք, որ օգնի սիրողականին, բայց սիրողականին մի թողեք պրոֆեսիոնալ դառնա, մինչև Եվրոպայի, աշխարհի չեմպիոն չդառնա: Չեն հասկանում այս ժողովուրդը, հազար անգամ ասել եմ արդեն»,- ասեց Դարչինյանն ու հավելեց, որ ինքն այդ մասին ասել է բռնցքամարտի բոլոր պատասխանատուներին, բայց մինչ օրս ոչ-ոք չի արձագանքել:
