Ռուսաստանի ժողովրդական արտիստ Դմիտրի Նազարովը Советский Спорт-ին տված հարցազրույցում քննադատել է Ռուսաստանի հավաքականին և Դիկ Ադվոկատին:
«Սարսափով եմ սպասում Հայաստանի հավաքականի հետ պատասխան հանդիպմանը: Եթե մենք հանկարծ խմբում երկրորդ տեղը զբաղեցնենք և անցումային խաղերի արդյունքում հայտնվենք Եվրոպայի առաջնության եզրափակիչ փուլում, ապա ինչ պիտի անեն այնտեղ բոլոր այս մարդիկ: Իրենց հարգող հավաքականները թույլ մրցակցի հետ խաղերում հենց այնպես գնդակ չեն գլորում, նրանք առաջին կես ժամում 3-4 գնդակ են խփում և հետո արդեն խաղում իրենց հաճույքի համար»,- ասել է Նազարովը:
Ադվոկատի մասին խոսելիս՝ դերասանը չի թաքցրել իր զգացմունքներն ու հոլանդացուն վախկոտ է անվանել:
«Վախկոտը չի կարող գլխավորել Ռուսաստանի հավաքականը, իսկ Ադվոկատը վախկոտ է` ոչ թե զգուշավոր, այլ` վախկոտ: Միայն այդպես կարելի է բացատրել նրա ընտրած 4-4-2 խաղային սխեման, փոփոխություններ չանելն ու ռոտացիա չկիրառելը»: