«2012 թվականն ինձ համար շատ լավ տարի է եղել և´ անձնական, և´ գործնական առումներով: 2012-ը եղավ ամենաբարձր արդյունքի նվաճման տարին, քանի որ ունեցանք Pro FC վարկածով առաջին հայազգի աշխարհի չեմպիոնը: Սա մեծ աշխատանքի արդյունք էր: 2012 թվականին անցկացրել ենք 4 պրոֆեսիոնալ մրցաշարեր, 5 հանրապետական միջացառումներ, ստեղծել ենք մարզադպրոցներ տարբեր մարզերում` զարգացնելով ընդհանուր մենամարտերը»,- 1in.am Sport-ի հետ զրույցում ասաց Հայաստանի պրոֆեսիոնալ Արմֆայթինգ ֆեդերացիայի նախագահ Հայկ Ղուկասյանը:
«Նոյեմբերին բացեցինք երկրորդ վարկանիշային կազմակերպությունը: Եթե մեր հարևան պետությունները չունեն վարկանիշային կազմակերպություն, ապա մենք ունենք արդեն երկուսը: Այն ճանաչված կլինի մի քանի միջազգային կազմակերպությունների կողմից: Սա մեզ համար հաղթանակած տարի էր:
2013 թվականին օգտագործելու ենք այսպիսի քաղաքականություն. բոլոր միջազգային մրցաշարերում բարձրացնելու ենք Լեռնային Ղարաբաղի դրոշը: Ես պետք է բաց նամակով դիմեմ ԼՂՀ նախագահին և վարչապետին, որ նրանք մեզ ապահովեն դրոշներով: Մենք բազմաթիվ միջազգային մրցաշարերի ենք մասնակցում, որոնց մասնակցում են նաև Թուրքիան ու Ադրբեջանը: Մենք նրանց պետք է ցույց տանք, որ ԼՂՀ-ն ինքնավար պետություն է: Սա քաղաքականություն չէ:
2013-ին պետք է մեկնեմ Գերմանիա, Բրեմեն, լինելու եմ տեղի ընտրանու գլխավոր մարզիչը: Փորձելու եմ Գերմանիայում ստեղծել ընդհանուր մենամարտերի ամենախոշոր ակադեմիաներից մեկը: Ակադեմիայի անվանումը կլինի Armenia: 2013-ի հիմնական ծրագիրը դա է:
Մեր հայրենակիցներին մաղթում եմ բարություն, սեր, երջանկություն, միայն ու միայն կանաչ ճանապարհ»:
