«Շախտյոր»-«Ռոմա»: Հռոմում կայացած հանդիպման ժամանակ «հանքափորներ»-ը գործի մեծ մասը կատարել էին, սակայն անկանխատեսելի «Ռոմա»-ից ամեն ինչ կարելի է սպասել: Հանդիպման առաջին րոպեներից «գայլեր»-ը նախաձեռնությունը վերցրին իրենց ձեռքն ու փորձում էին ապացուցել, որ թիմի նորանշանակ մարզիչ Մոնտելլայի՝ խաղից առաջ արտասանած ճառը հենց այնպես օդում ասված խոսքեր չէին:
Մեկնարկային 15 րոպեների ընթացքում իտալացիները տանտերերին զրկել էին գնդակից և մեկը մյուսի հետևից վտանգավոր գրոհներ էին կազմակերպում, սակայն գործեց ֆուտբոլի չգրված օրենքը` դու չես խփում, քեզ են խփում: 18-րդ րոպեին Վիլյանի սուր փոխանցումից հետո Տոմաշ Հյուբշմանը կրնկով գնդակն ուղղեց դեպի Դոնիի դարպասը` 1:0: Բաց թողած գոլից հետո «Ռոմա»-ն էլ ավելի մեծ ուժերով սկսեց գրոհել, ինչը շուտով տվեց իր արդյունքը: 28-րդ րոպեին տեղի տվեցին Հենրիկ Մխիթարյանի նյարդերը: Հայ ֆուտբոլիստը սեփական տուգանային հրապարակում կանոնները խախտեց «Ռոմա»-ի հարձակվող Բորիելլոյի նկատմամբ, ինչը չվրիպեց փորձառու Հովարդ Վեբի աչքից: Գնդակին մոտեցավ տուժողը: Ռոմայի երկրպագուների մոտ կրկին խաղը փրկելու հույս առաջացավ, սակայն Պյատովը սառնասրտորեն որսաց գնդակն ու այդ պահից ի վեր խաղի բնույթը փոխվեց: Քառորդ եզրափակիչի ուղեգրի հարցը գործնականում լուծվեց 42-րդ րոպեին, երբ Հովարդ Վեբը երկրորդ դեղին քարտով պատժեց Մեքսեսին ու հեռացրեց նրան խաղադաշտից:
Երկրորդ խաղակեսն անցավ տանտերերի թելադրանքով: «Հանքափորներ»-ը հրաշալի կատարեցին Լուչեսկուի տված առաջադրանքն ու ևս երկու գնդակ ուղարկեցին Դոնիի դարպասը: Վիլյանն ու Էդուարդոն դարձան մեկական գոլի հեղինակ:
Շնորհավորում եմ, «Շախտյոր»-ը ակումբային ամենահեղինակավոր խաղարկության քառորդ եզրափակիչում է: Մենք կրկին հնարավորություն կունենաք հետևել Հայաստանի հավաքականի առաջատար ֆուտբոլիստ Հենրիկ Մխիթարյանի խաղին:
