Իտալական «Միլան»-ի գլխավոր մարզիչ Մասիմիլիանո Ալեգրին մեկնաբանել է Չեմպիոնների լիգայի շրջանակներում թիմի առաջիկա խաղը: Նշենք, որ «Միլան»-ը սեպտեմբերի 18-ին ուժերը չափելու է «Անդերլեխտ»-ի հետ:
«Առաջին հերթին՝ պետք չէ զղջալ որևէ բանի համար. սա ոգեշնչման հետ որևէ առնչություն չունի: Վաղը մեզ առաջին խաղն է սպասվում Չեմպիոնների լիգայում, իսկ դրան հարկավոր է պատրաստվել դրական լիցքերով: Շաբաթ օրը մենք չհաղթեցինք, սակայն պահեր ստեղծեցինք: Դա բավարար չեղավ հաղթելու համար. պետք է դրա վրա աշխատենք:
«Անդերլեխտ»-ը մեծ փորձ և ամուր հեղինակություն ունի Եվրոպայում: Այս խաղում մենք պետք է լինենք հավասարակշռված, համբերատար ու բարձրակարգ ֆուտբոլ ցուցադրենք:
Վատ մեկնարկը չի նշանակում, որ պետք է վատ տրամադրվել գալիք հանդիպումներին: Նախ՝ պետք է կենտրոնանալ հաջորդ հանդիպման վրա: Խաղացողները հասկանում են, որ մենք բարձր տեղերի հավակնորդ ենք, և հիմա նախորդ անհաջողությունները վերացնելու լավ հնարավորություններից է»,- ՈւԵՖԱ-ի պաշտոնական կայքի փոխանցմամբ՝ ասել է Ալեգրին:
