Շախմատային հասարակությունը շարունակում է մնալ աշխարհի գավաթի խաղարկության կիսաեզրափակչի Արոնյան-Վաշյե-Լագրավ դիմակայության տպավորության տակ: Ոմանք այն կարծիքին են, որ Լևոն Արոնյանն իր կարիերայի ամենալարված պարտիաներն անցկացրեց: Դասական շախմատի երկու պարտիաներից հետո հաշիվը հավասար էր: Արագ շախմատի առաջին պարտիան հաղթեց սպիտակ ֆիգուրներով հանդես եկող Վաշյե-Լագրավը: Թվում էր, թե արագ շախմատի երկրորդ պարտիայում ֆրանսիացի գրոսմայստերին կհաջողվի ոչ-ոքի խաղալ և դուրս գալ եզրափակիչ:
Արագ շախմատի երկրորդ պարտիան Արոնյանն ուղղակի փայլուն անցկացրեց: Միջնախաղում ձեռնարկելով սուր գրոհ՝ մեր գրոսմայստերն արդեն 26-րդ քայլում ստիպեց հանձնվել մրցակցին: Դիմակայությանը հետևող մասնագետները շտապում էին կարծիք հայտնել, որ բլից պարտիաների վարպետ Արոնյանը վստահ հաղթանակ կտանի: Նման կարծիքի էին նաև հայ երկրպագուները: Բլից պարտիաները թե Արոնյանն ու թե Լագրավը, կարելի է ասել, անթերի անցկացրին: Կողմերն էլ չվրիպեցին՝ երկու անգամ կիսելով միավորը:
Երկու ոչ-ոքի գրանցվեց նաև արմագեդոնի շախմատի պարտիաներում, ինչը բացառիկ երևույթ է: Մահվան դիմակայությունում Արոնյանն ուղղակի ֆանտաստիկ պարտիա անցկացրեց: Մինչև վերջին վայրկյանը Վաշյե-Լագրավը հույս ուներ, որ հայ շախմատիստը վրիպում թույլ կտա, և պարտիան ոչ-ոքի կավարտվի: Նշենք, որ ոչ-ոքիի դեպքում աշխարհի առաջնության եզրափակիչ դուրս կգար ֆրանսիացի շախմատիստը:
Պարտիան առցանց կերպով մեկնաբանող Chess.com-ի ճանաչված մեկնաբան Սերգեյ Շիպովը Արոնյանի պարտիայի ընթացքում ուղղակի տարերքի մեջ էր: «Մաքսիմ, քաղցրիկս, մենք քեզ հետ կոպիտ ենք վարվելու»,- ասում էր Շիպովը, երբ վճռորոշ պարտիայի վերջնախաղում մեր շախմատիստը որակական առավելություն էր ստացել:
Վերջնախաղում էլ ռուս մեկնաբանն ուղղակի խնդրում էր Արոնյանին, որպեսզի մեր շախմատիստը քայլ կատարի Թագավորով, ոչ թե Թագուհիով: «Լյովա, խնդրում եմ, հանկարծ թագուհիով չխաղաս, միայն թագավորով: Դու գիգանտ ես: Վերջ, մենք եզրափակչում ենք»,- շարունեց Շիպովը:
Վերջինս իսկապես ցնծության մեջ էր և սրտանց ուրախանում էր հայ շախմատիստի հաջողության համար: Պարտիայից հետո Շիպովը խոստովանել է, որ վերջին պարտիայի միջնամասում հույսը կորցրել էր և հիասթափություն ապրել՝ կարծելով, թե Արոնյանը կպարտվի կամ ոչ-ոքի կխաղա:
«Լյովան ֆանտաստիկ տղա է: Նա շախմատային գիգանտ է: Արոնյանը չեղած տեղի կերտեց հաղթանակը: Ես ցնցված եմ: Ճիշտ է, որոշակի սխալներ թույլ տվեց Մաքսիմը, բայց այն, ինչ արեց հայ գրոսմայստերը, կրկնում եմ՝ ֆանտաստիկայի ժանրից է: Հայերը պետք է հպարտ լինեն, որ այսպիսի շախմատիստ ունեն»,- հայտարարել էր ռուս շախմատային մեկնաբանը:
«Այսօր դրամատիկ օր էր: Շատ ուրախ եմ, որովհետև օրն ավարտվեց, և ես ի վերջո հաղթեցի: Այն հարցին, թե ինչպես կարողացա հաղթել, կասեմ, որ այս դեպքում երևի թե պետք է հաջողակ լինել: Չկա որևէ բաղադրատոմս, ուղղակի պետք է արագ խաղալ և հուսալ, որ հակառակորդը սխալ թույլ կտա: Մաքսիմը ուժեղ մրցակից է, կարծում եմ՝ կարողացա ապացուցել, որ ես էլ մյուսներից վատ չեմ խաղում: Այս հաղթանակը շատ կարևոր էր ինձ համար, քանի որ այսօր Հայաստանի անկախության օրն է»,- ասել է հայ գրոսմայստեր Լևոն Արոնյանը:
Կիսաեզրափակչի մյուս դիմակայությունում չինացի Լիրեն Դինգը բլից պարտիաներում առավելության է հասել ամերիկացի Ուեսլի Սոյի նկատմամբ: Նշենք, որ Դինգն այս պահին համարվում է Չինաստանի ուժեղագույն շախմատիստը և ՖԻԴԵ-ի դասակարգման աղյուսակում 2771 գործակցով 13-րդն է: Այդուհանդերձ, եզրափակչում մասնագետները նախապատվությունը տալիս են Լևոն Արոնյանին:
Այսօր շախմատիստները կհանգստանան, իսկ վաղը տեղի կունենա աշխարհի գավաթի խաղարկության եզրափակչի առաջին պարտիան: Նշենք, որ դիմակայությունը բաղկացած է դասական շախմատի 4 պարտիաներից:
