Վաղը Բելառուսի Բորիսով քաղաքից Երևան է ուղևորվելու «ԲԱՏԷ» ֆուտբոլային թիմի ֆան-ակումբի ավտոբուսը: Հուլիսի 18-ին, ժամը 20-ին, Վազգեն Սարգսյանի անվան «Հանրապետական» մարզադաշտում կայանալու է Չեմպիոնների լիգայի խաղարկության որակավորման երկրորդ փուլի «Ալաշկերտ»-«ԲԱՏԷ» հանդիպումը:
Հիշեցնենք, որ այս թիմերի միջև հուլիսի 12-ին Բորիսովում կայացած հանդիպումն ավարտվել էր ոչ-ոքի՝ 1:1 հաշվով: Գրանցված հաշիվը ստիպում է ենթադրել, որ Երևանում լարված և դիտարժան հանդիպում է սպասվում: «ԲԱՏԷ» ակումբի պաշտոնական կայքում առկա հայտարարության համաձայն ՝Բելառուսից Երևան կարող են մեկնել բոլոր ցանկացողները: Ավտոբուսով Երևան ժամանելու ցանկություն էր հայտնել նաև Բորիսովում բնակվող Ռաֆիկ Օհանյանը, սակայն Բելառուսի չեմպիոնի երկրպագուները, տեղեկանալով, որ Օհանյանը հայ է, սպառնացել են ուղևորության ժամանակ սպանել նրան:
«Ցանկությունս մեծ էր ժամանելու Երևան և դիտելու պատասխան հանդիպումը: Արդեն 10 տարի «ԲԱՏԷ»-ի երկրպագուն եմ, մշտապես հաճախում եմ մեր քաղաքի թիմի հանդիպումներին և ճանաչում եմ ֆան-ակումբի բազմաթիվ անդամների: Նշված հեռախոսահամարով զանգահարեցի, որպեսզի ծանոթանամ ուղևորության պայմաններին: Ինձ ասացին, որ մոտենամ նախկին «Ռիբկա», ներկայում «Գոլ» սրճարանին, որը գտնվում է «ԲԱՏԷ»-ի հին մարզադաշտի հարևանությամբ: Հավաքված ֆանատները, ովքեր, կարելի է ասել, հարբած էին, հասկանալով, որ հայ եմ, կոպտեցին՝ վիրավորեցին ինձ, անվանեցին սադրիչ և սպառնացին սպանել Հայաստանի ճանապարհին: Նրանք ասում էին, որ հայերն իրենց զզվեցրել են, և եթե «ԲԱՏԷ»-ն չհաղթահարի «Ալաշկերտի» արգելքը, իրենք երևանյան խաղից հետո կպայթեցնեն «Հանրապետական» մարզադաշտը»,- «Առաջին լրատվական»-ի հետ զրույցում ասաց Օհանյանը:
Վերջինս նշեց, որ հանգուցյալ հայրը եղել է «ԲԱՏԷ» ակումբի նախագահ՝ Անատոլի Կապսկիի մտերիմ ընկերը, և տեղի ունեցածի մասին պատրաստվում է պատմել նրան: «Ոստիկանություն չեմ դիմել, քանզի «ԲԱՏԷ»-ի ֆանատների զգալի մասը բանտերում է: Մեզ մոտ շատ խիստ է, և նույնիսկ փոքր ծեծկռտուքի դեպքում կարող ես 3 տարով ազատազրկվել: Չեմ ցանկանում, որ այս ամենը տխուր վերջաբան ունենա, բայց տեղի ունեցած մասին Կապսկիին անպայման կտեղեկացնեմ»,- նշեց մեր զրուցակիցը:
«Ալաշկերտի» հետ հանդիպումից հետո Բելառուսի չեմպիոնի երկրպագուները մեծ հիասթափություն են ապրել: Նշենք, որ Բելառուսում Բորիսվը քրեականությամբ համարվում է երկրորդ քաղաքը՝ զիջելով միայն Բոբրույսկին: «ԲԱՏԷ»-ի ֆանատները մշտապես աչքի են ընկնում ոչ ադեկվատ պահվածքով: Նրանց գլխավոր թշնամիները Մինսկի «Դինամոյի» ֆանատներն են, որոնք համարվում են նաև ֆաշիստական շարժման ակտիվիստներ: Այսօր բելառուսական բանտերում մեծ թիվ են կազմում նշված երկու թիմերի երկրպագուները:
Նշենք, որ «Աշալկերտի» հետ հանդիպումից հետո «ԲԱՏԷ»-ի ֆանատները պահանջում էին թիմի գլխավոր մարզիչ Ալեքսանդր Երմակովիչի հրաժարականը: Մեր զրուցակիցը «ԲԱՏԷ»-ի ֆանատների ագրեսիվ պահվածքը բացատրում է վերջին շրջանում թիմի ոչ այնքան հաջող ելույթներով: Չեմպիոնների լիգայի 2014/2015 թվականների խաղարկությունում «ԲԱՏԷ»-ն հանդես է եկել խմբային փուլում և նույնիսկ սեփական հարկի տակ 3:2 հաշվով առավելության է հասել իտալական «Ռոմայի» նկատմամբ:
Անհաջողությունների շարքը սկսվել է 2016 թվականին: Մասնավորապես, Չեմպիոնների լիգայի նախորդ խաղարկությունում «ԲԱՏԷ»-ն որակավորման երկրորդ փուլում Ֆինլանդիայի ՍԻԿ-ի արգելքը հաղթահարելուց հետո երրորդ փուլում սեփական հարկի տակ 1:0 հաշվով իռլանդական «Դանդլոկին» հաղթելուց հետո մրցակցի հարկի տակ պարտվել էր 3:0 հաշվով և հրաժեշտ տվել Չեմպիոնների լիգայի խաղարկությանը: Եվրոպա լիգայի խաղարկության խմբային փուլի ուղեգրի համար պայքարում էլ «ԲԱՏԷ»-ն երկու հանդիպումների արդյունքում 4:2 հաշով զիջել էր Ղազախստանի «Աստանային»:
Բելառուսական ֆուտբոլի էտալոն համարվող «ԲԱՏԷ»-ն այսօր ներքին առաջնությունում 15-րդ տուրից հետո 33 միավորով երկրորդն է և 3 միավորով զիջում է առաջատար «Սոլիգորսկին»: Այս արդյունքը ևս դժգոհության առիթ է հանդիսացել: