Հայկական ֆուտբոլի ներկայիս դժգույն ֆոնին, այնուամենայնիվ, լուսավոր մի կետ է նշմարվում: Խոսքը Գյումրիի «Շիրակի» և Հայաստանի երիտասարդական հավաքականի՝ հարձակվողական ոճի կիսապաշտպան, 18-ամյա Վահան Բիչախչյանի մասին է: Այսօր մեր ֆուտբոլիստին ձեռք բերելու համար պայքարում են եվրոպայում ճանաչում ունեցող թիմեր, և արդեն իսկ պարզ է, որ գալիք մրցաշրջանում Բիչախչյանն այլևս հանդես չի գա Հայաստանի ճահճացած առաջնությունում: Դեռևս անցյալ տարի Բիչախչյանին ցանկանում էին ձեռք բերել իտալական «Ֆիորենտինան», Մոսկվայի ԲԿՄԱ-ն և էլի մի շարք բարձրակարգ ակումբներ: Երբ հայ ֆուտբոլիստը փորձաշրջան էր անցնում «Ֆիորենտինայում» իտալական պարբերականները գրել էին, որ Բիչախչյանը խաղաոճով շատ նման է Բելգիայի ազգային հավաքականի կիսապաշտպան Քևին Դե Բրյունեին, ինչպես նաև Հայաստանի ազգային հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանին: Նշենք, որ Բիչախչյանը 18 տարեկան դարձավ միայն երեկ, և հիմա անարգել կարող է պայմանագիր կնքել արտասահմանյան ցանկացած թիմի հետ:
Ֆրանսիական slbfrance-ի փոխանցմամբ՝ հայ կիսապաշտպանին ձեռք բերելու պատրաստակամություն է հայտնել պորտուգալական հեղինակավոր «Բենֆիկան»: Մեծ է հավանականությունը, որ «Շիրակի» ֆուտբոլիստը կարիերան կշարունակի հենց պորտուգալական թիմում: «Մենք ցանկանում ենք Բիչախչյանի համար լավ թիմ գտնել: Կարծում եմ՝ «Բենֆիկան» համապատասխանում է մեր պահանջներին, և պետք է ասեմ, որ մեր կիսապաշտպանն ունի բոլոր հնարավորությունները նոր Մխիթարյան» դառնալու»,- Բիչախչյանի գործակալ Ռուբեն Վեսմադյանի խոսքերն է մեջ բերել ֆրանսիական պարբերականը:
Վեսմադյանի խոսքով՝ հայ ֆուտբոլիստին այս պահին ցանկանում են ձեռք բերել նաև իտալական և անգլիական երկուական ակումբներ, ինչպես նաև Սանկտ Պետերբուրգի «Զենիթը»: «Բիչախչյանին ցանկանում էր ձեռք բերել նաև Ստամբուլի «Գալաթասարայը», սակայն մենք մերժեցինք թուրքական թիմի առաջարկը»,- հավելել է Վեսմադյանը:
Թե որ երկրում կհայտնվի Բիչախչյանը՝ հայտնի կդառնա մոտ ապագայում: Նշենք, որ Բիչախչյանն օժտված է փայլուն տվյալներով և ունի հստակ խաղային ձեռագիր: Հատկապես տպավորիչ են նրա կատարմամբ տուգանային հարվածները: Եվրոպա լիգայի խաղարկության որակավորման առաջին փուլի՝ Սլովենիայի «Գորիցայի» հետ պատասխան խաղում Բիչախչյանը, դառնալով գոլի հեղինակ, հաշիվը դարձրեց 2:1 և որոշ ժամանակ անց կարող էր նաև կրկին աչքի ընկնել և որակավորման երկրորդ փուլի ուղեգիր պարգևել Գյումրիի թիմին: Բնականաբար, այս մրցավեճը իր դրական ազդեցություն է թողել արտասահմանյան ակումբների ներկայացուցիչների վրա, որոնք շարունակ հետևում էին հայ ֆուտբոլիստի ելույթներին: Անցյալ տարի Վահան Բիչախչյանը ռեկորդ էր սահմանել Եվրոպա լիգայի գավաթի խաղարկության որակավորման առաջին փուլի «Դիլա»-ի դեմ պատասխան խաղում: Պատանին նորամուտն էր նշել Եվրոպայի լիգայում «Դիլա»-ի դեմ պատասխան խաղում` փոխարինման դուրս գալով 2-րդ խաղակեսում և դառնալով գոլի հեղինակ: 16 տարեկան 364 օրական Բիչախչյանը ամենաերիտասարդ ֆուտբոլիստն է, որը գոլ է խփել եվրագավաթային խաղերում: Այս տարվա մայիսին Վահան Բիչախչյանը հոլանդական «voetbalzone.nl» կայքի վարկածով ընդգրկվել է Արևելյան Եվրոպայի լավագույն 20 երիտասարդ ֆուտբոլիստների ցուցակում:
Անցյալ տարվա հոկտեմբերին էլ հեղինակովոր The Guardian պարբերականը հրապարակել էր աշխարհի տաղանդավոր 60 ֆուտբոլիստների անունները, որոնց շարքում էր նաև Գյումրիի «Շիրակի» կիսապաշտպանը: Վերջինս նաև ընդգրկվել էր իտալական «Tuttosport» «Golden Boy 2017» մրցանակի հավակնորդների շարքում: Այս մրցանակը շնորհվում է տարվա լավագույն երիտասարդ ֆուտբոլիստին: Բիչախչյանի արդյունքներն իսկապես տպավորիչ են և հուսադրող:
Չնայած այս հաջողություններին՝ Վահան Բիչախչյանը դեռևս չի հրավիրվել Հայաստանի ազգային հավաքական: Ֆուբոլային աշխարհում ճանաչված «Տրանսֆերմարկետ» պարբերականի համաձայն՝ Վահան Բիչախչյանի տրանսֆերային արժեքն այս պահին 250 հազար եվրո է: