Ֆուտբոլի Ղազախստանի ազգային հավաքականի գլխավոր մարզիչ Ալեքսանդր Բորոդյուկը հրապարակել է ֆուտբոլիստների ցանկը, ովքեր նախապատրաստվելու են մարտին 26-ին Երևանում կայանալիք աշխարհի առաջնության ընտրական փուլի Հայաստանի հավաքականի հետ հանդիպմանը: Հրավիրված 24 ֆուտբոլիստներից 23-ը հանդես են գալիս Ղազախստանի առաջնությունում: Միակ լեգեոները Բելառուսի Սոլիգորսկ քաղաքի «Շախտյորի» հարձակվող Սերգեյ Խիժնիչենկոն է: 24 ֆուտբոլիստներից ծագումով ղազախ են ընդամենը 11-ը: Մյուս խաղացողները պարզապես Ղազախստանի քաղաքացիներ են:
Վերջին տասնամյակում Ղազախստանում մեծ գումարներ են ներդնում ֆուտբոլը զարգացնելու համար: Ըստ պաշտոնական աղբյուրի՝ 2014-2015 թվականներին Հայաստանի ազգային հավաքականի կիսապաշտպան Մարկես Պիզելին հանդես գալով «Ակտոբե»-ում՝ ամսական 60 հազար ԱՄՆ դոլար աշխատավարձ է ստացել, ինչպես նաև 15 հազար դոլար պարգևավճար: Նշենք, սակայն, որ «Ակտոբեն» չի դասվում ղազախական թոփ երեք թիմերի շարքում: Հայաստանի ազգային հավաքականի հետ հանդիպմանը Պիզելիի նախկին թիմից որևէ ֆուտբոլիստ չի հրավիրվել: Ներկայում Ղազախստանի ամենաուժեղ ակումբը գործող չեմպիոն «Աստանան» է: Վերջինը պատմության ընթացքում առաջին և միակ թիմն է, որին հաջողվել է հանդես գալ Չեմպիոնների լիգայի խմբային փուլում: Ղազախական ակումբը հեղինակավոր մրցաշարին մասնակցել է 2015 թվականին:
«Աստանայից» առաջիկա հանդիպմանը հրավիրվել են 4 ֆուտբոլիստներ: Մարտի 8-ին մեկնարկած 2017 թվականի Ղազախստանի առաջնությանը, որն անցկացվում է գարուն-աշուն մրցակարգով, մասնակցում է 12 թիմ:
2016 թվականի Ղազախստանի լավագույն ֆուտբոլիստ է ճանաչվել «Կայրաթի» կիսապաշտպան Բաուրժան Իսլամխանը, ով հրավիրված է Հայաստանի հավաքականի հետ հանդիպմանը: Երևանյան հանդիպմանը հրավիրված է նաև «Կայսարի» կիսապաշտպան Մակսատ Բայժանովը, ով փետրվարին Թուրքիայում տեղի ունեցած ուսումնամարզական հավաքի ժամանակ ոչ ֆուտբոլային պահվածքով հայտնվել էր միջազգային ԶԼՄ-ների ուշադրության կենտրոնում:
Երևանի «Բանանցի» հետ հանդիպման ժամանակ Բայժանովը հարվածելով «Բանանցի» խաղացող Հակոբ Համբարձումյանին՝ զանգվածային հրմշտոց էր հրահրել: Այս դրվագում ուշագրավ էր մեր խաղացողի ռեակցիան: «Լավ չես, արա՜» գոռալով և հրելով՝ Համբարձումյանը փորձ էր կատարել, այսպես ասած, խեղճացնել մրցակցի թիմի ավագին: Սակայն վերոնշյալ արտահայտությունը, ըստ երևույթին, հունից հանել էր Բայժանովին, ով կոպիտ հնարքով գետնին էր գցել «Բանանցի» խաղացողին: Ղազախական լրատվամիջոցները սկանդալային միջադեպի օբյետիվ մեղավոր ճանաչելով Բայժանովին՝ հույս ունեն, որ «Կայսարի» կիսապաշտպանը մոռացած կլինի հայ ֆուտբոլիստների հետ տեղի ունեցած տհաճ միջադեպը և Երևանում ոչ ֆուտբոլային պահվածքով աչքի չի ընկնի: «Բանանցի» հետ հանդիպմանը գլխավոր մրցավարը դաշտից հեռացրել էր թե՛ Բայժանովին և թե՛ Համբարձումյանին:
Նշենք, որ Բայժանովը Ղազախստանի ամենափորձառու ֆուտբոլիստներից մեկն է: 32-ամյա կիսապաշտպանը ազգային թիմում հանդես է գալիս 2005 թվականից: Մինչ Հայաստանի ազգային հավաքականի հետ հանդիպումը Ղազախստանի ընտրանին կանցկացնի նաև ընկերական մրցավեճ: Բորոդյուկի թիմը մարտի 22-ին Լառնակայում կմրցի Կիպրոսի Ազգային հավաքականի հետ: Ընտրական մրցաշարում Ղազախստանն այս պահին 2 միավորով եզրափակում է մրցաշարային աղյուսակը: Մեր մրցակցին հաջողվել է ոչ-ոքի խաղալ Լեհաստանի և Ռումինիայի հավաքականների հետ:
Ստորև այն ֆուտբոլիստներն են ովքեր հրավիրվել են Կիպրոսի և Հայաստանի հավաքականի հետ հանդիպումներին:
Դարպասապահներ. Դավիդ Լորիա՝ «Իրտիշ», Ստաս Պոկատիլով՝ «Կայրաթ», Ալմաթ Բեկբաև՝ «Օրդաբասի»: Պաշտպաններ. Դմիտրի Շոմկո՝ «Աստանա», Յուրի Լոգվիենկո՝ «Աստանա», Ալեքսանդր Կիսլիցին՝ «Իրտիշ», Գաֆուրջան Սույումբաև՝ «Կայրաթ», Սերգեյ Մալի՝ «Տոբոլ», Վիկտոր Դմիտրենկո՝ «Տոբոլ», Դմիտրի Միրոշնիչենկո՝ «Տոբոլ», Գրիգորի Սարտակով՝ «Տոբոլ»:
Կիսապաշտպաններ. Սերիկժան Մուժիկով՝ «Աստանա», Իսլամբեկ Կուատ՝ «Կայրաթ», Բաուրժան Իսլամխան՝ «Կայրաթ», Գեորգի Ժուկով՝ «Կայրաթ», Մակսատ Բայժանով՝ «Կայսար», Ազատ Նուրգալիև՝ «Օրդաբասի», Մարդան Տոլեբեկ՝ «Օրդաբասի», Երկեբուլան Տունգիշբաև՝ «Օրդաբասի», Ասխատ Տագիբերգեն՝ «Տոբոլ»:
Հարձակվողներ. Ռոման Մուրտազաև՝ «Աստանա», Տանատ Նուսերբաև՝ «Օրդաբասի», Ալեքսեյ Շչետկին՝ «Տոբոլ», Սերգեյ Խիժնիչենկո՝ «Շախտյոր» (Բելառուս):
