Եվրոպայի լիգայի խաղարկության 1/8-րդ եզրափակչի «Ռոստովի» հետ մրցավեճում «Մանչեսթեր Յունայթեդի» մեկնարկային կազմն անակնկալ էր: Ժոզե Մոուրինյոն խաղադաշտ էր դուրս բերել միանգամից երեք կենտրոնական պաշտպանների՝ Սմոլինգին, Ջոնսին և Ռոխոյին, ինչպես նաև Հենրիխ Մխիթարյանին: Հանդիպումից առաջ Մոուրինյոն հայտարարել էր, որ թիմի հիմնական կազմում տեղ կգտնեն այն ֆուտբոլիստները, ովքեր ի զորու են խաղալ խայտառակ խոտածածկի վրա:
Մարտի 13-ին «Մանչեսթեր Յունայթեդը» Անգլիայի գավաթի քառորդ եզրափակչում հանդիպելու է սկզբունքային մրցակից «Չելսիի» հետ, և թվում էր, թե Մոուրինյոն ի դեմս Մխիթարյանի՝ առաջատար ևս մի քանի ֆուտբոլիստների կխնայի:
Ժամանելով Դոնի Ռոստով՝ Մոուրինյոն ըստ էության հասկացել էր, որ թույլ կազմով չափազանց վատ պայմաններում դժվար կլինի դրական արդյունքի հասնել: Ասպարեզ դուրս բերելով երեք կենտրոնական պաշտպանների՝ Մոուրինյոն փորձել էր ամուր պատնեշ ստեղծել պաշտպանության կենտրոնում: Հատկապես Ջոնսն ու Սմոլինգը պետք է վնասազերծեին հարձակվողներ Պոլոզին և Բուխարովին: Խաղային այս դասավորությունը, կարելի է ասել, չարդարացրեց իրեն. Բուխարովը «Մանչեսթեր Յունայթեդի» դարպասը գրավեց կենտրոնական պաշտպանի դիրքից: Մոուրինյոյի կողմից ճիշտ էր Ֆելաինիին ենթահարձակվողի դիրքում օգտագործելը: Այսպես ասած՝ ռուսական չոր ֆուտբոլի դեմ Ֆելաինիին հաջողվում էր ճեղքումներ կատարել:
Նկատենք, որ Մխիթարյանի հեղինակած գոլում Ֆելաինին ակտիվ մասնակցություն ունեցավ: Երկու շաբաթ զրկված լինելով խաղային պրակտիկայից՝ Մխիթարյանը հիանալի կերպով մանյովրում էր մրցակցի կիսադաշտում: Կարծում ենք՝ չենք սխալվի, եթե նշենք, որ Մխիթարյանն այսօր «Մանչեսթեր Յունայթեդի» ամենակրեատիվ ֆուտբոլիստն է: Պաշտպանական ոճի ֆուտբոլիստներին այսօր չի հաջողվում կարդալ Մխիթարյանի խաղը: Նրա արագ տեղաշարժումները անլուծելի խնդիր են ոչ միայն մրցակից խաղացողների, այլև մարզիչների համար:
Հայ ֆուտբոլիստը Ժոզե Մոուրինյոյի զենքն է, որը հատկապես դժվար իրավիճակներում փայլուն կրակոցներով փրկության հաղթաթուղթ է դառնում: «Անկախ արդյունքից՝ Մխիթարյանը պետք է խաղադաշտում լիներ 60 րոպե: Միասին ենք քննարկել այս հարցը և կայացրել որոշում: Բժիշկներն զգուշացրել էին, որ նա չի կարող խաղալ 90 րոպե: Բացի այդ, Մխիթարյանը լավագույն մարզավիճակում չէր: Ես նրան հանձնարարել էի խաղալ հարձակման գծում Զլատան Իբրահիմովիչի հետ: Մխիթարյանը լավ կատարեց իր աշխատանքը և հանդիպումն ավարտեց առանց վնասվածքի, ինչը շատ կարևոր է»,- լրագրողների հետ հանդիպմանն ասել է Ժոզե Մոուրինյոն:
ՈւԵՖԱ-ի կողմից այս հանդիպման լավագույն ֆուտբոլիստ է ճանաչվել հենց Մխիթարյանը: Թեև Հայաստանի հավաքականի ավագը փոխարինվեց, սակայն նրա օգտակար գործողությունները ՈւԵՖԱ-ի մասնագետների կողմից բարձր են գնահատվել: Գրավելով «Ռոստովի» դարպասը՝ Մխիթարյանը կրկնել է Ուեյն Ռունիի ռեկորդը՝ եվրագավաթների խաղարկությունում երեք խաղում անընդմեջ դառնալով գոլի հեղինակ: Ռունիին եվրագավաթների խաղարկությունում երեք խաղում անընդմեջ գոլի հեղինակ հաջողվել էր դառնալ յոթ տարի առաջ: Մխիթարյանին Եվրոպայի լիգայի խաղարկությունում հաջողվել է գրավել Լուգանսկի «Զարյայի», ֆրանսիական «Սենտ Էտյենի» և ռուսական «Ռոստովի» հետ խաղերում:
Հ.Գ. Հայաստանի ազգային հավաքականի ավագը «Ռոստովի» հետ հանդիպումից հետո շնորհակալություն է հայտնել մարզադաշտ եկած հայ երկրպագուներին: «Շատ էինք ուզում ավելի լավ արդյունքի հասել, սակայն տուն ենք տանում ոչ-ոքի: Դրսում խփած գնդակը շատ կարևոր է այս դիմակայությունում: Շնորհակալություն երկար ճանապարհ անցած երկրպագուներին»,- ֆեյսբուքյան իր էջում գրել է Մխիթարյանը:
