Հայաստանի ատլետիկայի ֆեդերացիան ՀՀ սպորտի նախարարությանը ներկայացրել է 8 մարզիկ թեկնածուների, ովքեր պատրաստվում են Օլիմպիական խաղերի վարկանիշ ձեռք բերելուն:
այաստանի ատլետիկայի ֆեդերացիայի գլխավորքարտուղար Նարինե Շահբազյանը հայտարարել է, որ վարկանիշ ասածը ատլետիկայում նորմատիվային պլանի կատարումն է: Եթե մարզիկը նորմատիվային պահանջով ցատկեց 8 մետր 15 սմ, ապա իրավունք է նվաճում մասնակցելու օլիմպիական խաղերին:
«Ունենք առաջատար մարզիկներ, ովքեր մեր հույսերն են: Ահա նրանք. Ամալյա Շառոյան, Լևոն Աղասյան, Մելիք Ջանոյան, Լիանա Ղուկասերյան, Գոռ Ներկարարյան, Արսեն Սարգսյան, Լիլիթ Հարությունյան, ովքեր այսօր պատրաստ են Օլիմպիական վարկանիշ կատարելու: Թե նրանցից ով կկատարի օլիմպիական վարկանիշը, ցույց կտան մրցումները»,- նշեց նա:
Վարկանիշային մրցաշարերը շարունակվելու են մինչեւ հուլիսի 11-ը: Շահբազյանի խոսքով՝ մինչ այդ ցանկացած միջազգային և ներհանրապետական մրցաշար, որ ընդգրկված է ատլետիկայի ֆեդերացիայի օրացուցային պլանով, մարզիկին հնարավորություն է տալիս, նորմատիվային պլանի կատարման դեպքում, Օլիմպիական խաղերի ուղեգիր նվաճել:
Այդ մրցաշարերից են, մասնավորապես, Գառնիկ Ղուկասյանի անվան հուշամրցաշարը, որը կանցկացվի Արտաշատում մայիսի 14-15-ին: Մայիսի 28-29-ը կանցկացվի Հայաստանի Հանրապետության առաջնությունը, ապա հունիսի 4-5-ին Մալայան եղբայրների հուշամրցաշարն է, որից հետո՝ հուլիսի 6-10-ը հայ ատլետները կմասնակցեն Ամստերդամում կայանալիք Եվրոպայի առաջնությանը:
