Լեհաստանի Վալբրժիխ քաղաքում ընթացող անցումնային տարիքի՝ մինչև 23 տարեկանների ըմբշամարտի Եվրոպայի անդրանիկ առաջնությունում, երեկ մեդալների համար պայքարն սկսեցին հունահռոմեական ոճի ըմբիշները՝ 59 կգ, 71 կգ, 80 կգ և 98 կգ քաշային կարգերում:
Լևոն Ջուլֆալակյանի գլխավորությամբ հանդես եկող մինչև 23 տարեկանների Հայաստանի հավաքականի 5 ներկացուցիչներից մրցագորգ ելան երկուսը, քանի որ Հայաստանը ներկայացուցիչ չուներ 71 կգ և 98 կգ քաշային կարգերում: Արդեն հայտնել էինք, որ 80 կգ քաշային կարգում հանդես եկող, 2014թ երիտասարդների աշխարհի առաջնության բրոնզե մեդալակիր Սարգիս Քոչարյանը կեսօրվա մրցահերթում հաջողությամբ հաղթահարելով նախնական փուլերի բոլոր արգելքները, մտել էր եզրափակիչ:
Երեկոյան մրցահերթում նրա ու Վրաստանի ներկայացուցիչ Լաշա Գոբաձեի միջև կայացած վճռորոշ գոտերմարտում մարզական բախտը ժպտաց վրացի ըմբիշին, ով 3:2 հաշվով հաղթելով՝ նվաճեց Եվրոպայի չեմպիոնի տիտղոսը: Սարգիս Քոչարյանն այս անգամ բավարարվեց արծաթե մեդալով և Հայաստանի ընտրանուն թիմային 9 միավոր պարգևեց:
Արդեն հայտնել ենք, նաև որ 59 կգ քաշային կարգում մեդալակիր դառնալու հնարավորություն ուներ նաև Վազգեն Խաչատրյանը: Սակայն նա սփոփիչ գոտեմարտում 4:7 հաշվով զիջեց Սերբիայի պատվիրակ Թամաշ Մաջին ու զբաղեցրեց 7-րդ տեղը՝ մեր ընտրանու համար վաստակելով 4 միավոր: Մրցաշարի 1-ին օրը Եվորպայի չեմպիոններ դարձան. 59 կգ՝ Վիկտոր Չոբանու, Մոլդովա, 71 կգ՝ Դանիել Կատարագա, Մոլդովա, 80 կգ՝ Լաշա Գոբաձե,Վրաստան, 98 կգ՝ Ֆաթիհ Բասկով, Թուրքիա:
Հայաստանի ըմբշամարտի ֆեդերացիայի մամլո ծառայություն