Գերմանիայի Քիլ քաղաքում` «Սպարկասեն արենա» մարզապալատում, ավարտվեց պրոֆեսիոնալ բռնցքամարտի երկրորդ միջին քաշային կարգում WBO վարկածով աշխարհի չեմպիոն Արթուր Աբրահամի տիտղոսային մենամարտը բրիտանացի Փոլ Սմիթ-կրտսերի հետ:
Մենամարտի հենց սկզբից Աբրահամը մրցակցին ցույց տվեց` ով է դրության տերը: Բոլոր ռաունդներն անցան նույն սցենարով: Սկզբնամասում Սմիթը նետվում էր գրոհի, բայց մոտ 30 վայրկյան տևած ապարդյուն գրոհները միավոր չէին բերում նրան: Հարվածները հիմնականում դիպչում էին Արթուրի ձեռնոցներին:
Արթուրն իր հերթին խուսափում էր մերձամարտից, աչալուրջ էր պաշտպանությունում: Ռաունդի միջնամասից Արթուրը ծանր հարվածներ ու հարվածաշարեր էր անցկացնում: 4-6-րդ ռաունդներում առանձնանում էին հատկապես Աբրահամի դիմային ուժգին հարվածները: Արթուրը նկատել էր նաև բացը մրցակցի պաշտպանության ձախ հատվածում, որն ավելի ակնառու էր դառնում հատկապես այն ժամանակ, երբ Սմիթը ցանկանում էր նետվել գրոհի: Արթուրը նրա գրոհը դիմավորում էր աջ կողային հուժկու հարվածով: Ամբողջ մենամարտն անցավ Արթուրի բացահայտ առավելության պայմաններում:
Մրցավարների միաձայն որոշմամբ Արթուր Աբրահամը հաղթեց 117:111, 117:111, 119:109 հաշվով և պահպանեց սուպերմիջին քաշային կարգում WBO վարկածով աշխարհի չեմպիոնի կոչումը: